Last updated on February 2nd, 2026 at 11:00 am
ತಪಸ್ಯ ಕಲಾ ಸಾಹಿತ್ಯ ವೇದಿ, ಕಾಸರಗೋಡು ಜಿಲ್ಲೆ ಮುಕ್ಲೆನ ಐವನೇ ವರ್ಸೊದ ಬಂಗಾರ್ ಪರ್ಬೊದ ನಿಲೆಟ್ ನಡಪುನ ಸಾಂಸ್ಕೃತಿಕ ಯಾತ್ರೆ, ರಡ್ಡನೆ ದಿನವಾಯಿನ ಕೋಡೆ 01-02-2026ತಾನಿ ಕಾಂಡೆ 9.00 ಗಂಟೆಗ್ ಶ್ರೀ ಕಣ್ವತೀರ್ಥ ಮಠರ್ದ್ ಪಿದಡ್ಂಡ್.
ಶ್ರೀ ಟಿ.ಪಿ ಶ್ರೀನಿವಾಸನ್ ಮೆರೆನ ಗುರ್ಕರ್ಮೆಡ್ ಪ್ರೋ. ಶ್ರೀ ಪಿ.ಜಿ.ಹರಿದಾಸ್(ರಾಜ್ಯ ಕಾರ್ಯಾಧ್ಯಕ್ಷೆರ್ ತಪಸ್ಯ ಕಲಾ ಸಾಹಿತ್ಯ ವೇದಿ) ಯಾತ್ರೆದ ಉದಿಪನ ಮಂತೆರ್.
ಶ್ರೀ ಕ್ಷೇತ್ರೊದ ಪೂಜೆದ ಬಟ್ರ್ ಶ್ರೀ ರಮೇಶ್ ಉಪಾಧ್ಯಾಯ, ರಾಮಾಂಜನೇಯ ಸೇವಾ ಸಮಿತಿದ ಗುರ್ಕಾರ್ಲು ಶ್ರೀಮತಿ ಪ್ರೇಮಾ ಎಂ ಪೊಣ್ಣೆ, ಶ್ರೀ ಮಧುಸೂದನ ಆಚಾರ್ಯ, ಶ್ರೀ ಚಂದ್ರಹಾಸ ಮುಗುಲ್ಯ, ಶ್ರೀಮತಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ, ಅಂಚೆನೆ ಊರುದ ಮಸ್ತ್ ಜನಮಂದೆ ಒಪ್ಪ ಇತ್ತೆರ್. ಗಡಿನಾಡ್ದ ಪುಗಾರ್ತೆದ ಕವಿ ಕೈಯ್ಯಾರ ಕಿಞ್ಞಣ್ಣ ರೈ ಕುಲೆನ ಮಗೆ ಶ್ರೀ ಪ್ರಸನ್ನ ರೈ, ಕೈಯ್ಯಾರೆರೆನ ಪದ ಪಂಡೆರ್. ಕಣ್ವತೀರ್ಥಡ್ ಶ್ರೀ ವಿಜಯ ಧ್ವಜ ಸ್ವಾಮಿಲು ಶ್ರೀ ಭಾಗವತಗ್ ವಿಶ್ಲೇಷಣೆ ಬರೆಯೆರೆ ಕುಲ್ಲಿನಂಚಿನ ಅತ್ತೊಸದ ಮರತ ಮುದೆಲ್ರ್ದ್ ಸಾಹಿತ್ಯ ಯಾತ್ರೆ ಪಿದಡುನವು ಬಾರೀ ಅರ್ಥಪೂರ್ಣ ಸಂಗತಿಂದ್ ಶ್ರೀ ಮಧುಸೂದನ ಆಚಾರ್ಯೆರ್ ಕ್ಷೇತ್ರೊದ ಪೊಲಬು ಮಂತೊಂದು ಪಂಡೆರ್.
ಈ ಪೊರ್ತುಡು ಕಣ್ವತೀರ್ಥಡ್ ಸಾಮಾಜಿಕ, ಸಾಂಸ್ಕೃತಿಕ ಬೊಕ ಸಾಹಿತ್ಯ ಕ್ಷೇತ್ರಡ್ ಬೆಂದಿನಕ್ಲೆಗ್ ತಪಸ್ಯ ಕಲಾ ಸಾಹಿತ್ಯ ವೇದಿದ ನಿಲೆಟ್ ಮಾನಾದಿಗೆ ಮಂತೆರ್.
ಯಾತ್ರೆನ್ ಶ್ರೀ ಚಂದ್ರಹಾಸ ಮುಗುಲ್ಯ ಎದ್ಕೊಂದು ಶ್ರೀ ಟಿ. ದಿನೇಶನ್ ಸೊಲ್ಮೆ ಸಂದಾಯೆರ್.