Last updated on February 2nd, 2026 at 03:33 pm
ಒಡಿಪು, ಫೆ. 02: ಹೊಟೇಲ್ ಒಂಜೆಟ್ ವನಸ್ ಮಲ್ಪುನ ಪೊರ್ತುಡು ನಡತಿನ ಪಾತೆರೊದ ಮಚ್ಮಚ್ ತಲ್ವಾರ್ ಪತೊಂದು ಆಕುನಡೆ ಮುಟ್ಟ ಪೋತಿನ ನಡಕೆ ಜನವರಿ 30ದಾನಿ ರಾತ್ರೆ ಒಡಿಪುದ ಪಿಪಿಸಿ ಕ್ರಾಸ್ ದಲ್ಪ ನಡತ್ದ್ಂಡ್.
ನಡಕೆಡ್ ಒಡಿಪು ಜಿಲ್ಲಾ ಎನ್ಎಸ್ಯುಐ ಉಪಾಧ್ಯಕ್ಷೆ, ಬೈಲೂರು ಚಿಟ್ಪಾಡಿ ನಿವಾಸಿ ಶರತ್ ಕುಂದರ್(25) ನ ಕೈಕ್ ಗಡಿಕುಲಾದಿತ್ತ್ದ್, ಆಸ್ಪತ್ರೆಗ್ ದಾಕಲಾತೆರ್. ಚಿಟ್ಪಾಡಿದ ಶರತ್ ಕುಂದರ್ ಮೇರ್ ಜನವರಿ 30ದಾನಿ ರಾತ್ರೆ 9 ಗಂಟೆಗ್ ತನ್ನ ದೋಸ್ತಿನ ಕಾರ್ಡ್ ಮಣಿಪಾಲದ ಹಕುನಾ ಮಟಾಟ ಹೊಟೇಲ್ಗ್ ವನಸ್ಗ್ ಪೋದಿತ್ತೆರ್. ಆರೆನ ದೋಸ್ತಿಲಾಯಿನ ಅಕ್ಷತ್ ಪೈ , ಶಶಾಂಕ್ ಬೊಕ್ಕ ರಮಾನಂದ ಪೈ ಅಲ್ಪ ಇತ್ತೆರ್.
ಈ ಪೊರ್ತುಡು ಶರತ್ ಕುಂದರ್ ನ ಕೈಕ್ ರಮಾನಂದ ಪೈ ನ ಕೈ ಕೊಲ್ತ್ದ್ಂಡ್. ಈ ಪೊರ್ತುಡು ಇರ್ವೆರೆ ನಡುಟು ಪಾತೆರೊಗು ಪಾತೆರ ಬುಲೆದ್ಂಡ್. ಬೊಕ್ಕ ಶರತ್ ಕುಂದರ್ ಇಲ್ಲಗ್ ಪಿದಡ್ದೆರ್, ಆರ್ ಕಲ್ಸಂಕ ದಡೆ ಎತ್ತ್ನಗ ಅಕ್ಷತ್ ಪೈ ಫೋನ್ ಮಲ್ತ್ದ್ ಹೊಟೇಲ್ಡ್ ಲಡಯಿ ಆತಿನೆತ ಬಗೆಟ್ ಪಾತೆರ್ಯೆರ ಉಂಡು, ನಿಕುಲು ಪಿಪಿಸಿ ಕ್ರಾಸ್ ದಲ್ಪ ಉಂತುಲೆ ಪನ್ದ್ ಪನ್ತೆರ್. ಆ ಪ್ರಕಾರ ಶರತ್ ಕುಂದರ್, ಧ್ರುವಾ, ಸಿಲಾನ್ ಗಗನ್, ರೋಹಿತ್ ಒಟ್ಟುಗು ಪಿಪಿಸಿ ಕ್ರಾಸ್ ದ ಕೈತಲ್ ಇಪ್ಪುನ ಕೋಸ್ಟಲ್ ಚಿಕನ್ ಅಂಗಡಿದ ಎದುರು ಸಾದಿ ಬರಿಟ್ ಉಂತುದು ಅಕಲೆನ್ ಕಾತೊಂದಿತ್ತೆರ್. ರಾತ್ರೆ ಸುಮಾರ್ 11.30ಕ್ ಟಾಟಾಸಫಾರಿ, ಮಹೀಂದ್ರ ಥಾರ್ ಗಾಡಿಲು ಬತ್ತ್ದ್ ಶರತ್ ಕುಂದರ್ ನ ಬರಿಟ್ ಉಂತುದ.
ಟಾಟಾ ಸಫಾರಿರ್ದ್ ಅಕ್ಷತ್ ಪೈ, ಶಶಾಂಕ್ ಬೊಕ್ಕ ಬೇತೆ 6-7 ಜನ ಜತ್ತ್ದ್, ಕೈಟ್ ತಲ್ವಾರ್ದಂಚಿನ ಕೈದ್ಲೆನ್ ಬೊಕ್ಕ ಕರ್ಬದ ಚಯರ್ಡ್ ಶರತ್ ಕುಂದರ್ನ್ ಕೆರ್ಪುನ ಉದ್ದೇಶೊಡು ತರೆಕ್ ಆಕೆರ ಬೀಜಿದೆರ್. ಅಪಗ ಆರ್ ರಡ್ಡ್ ಕೈನ್ಲಾ ಎದುರು ಅಡ್ಡ ದೀತೆರ್.
ಈ ಪೊರ್ತುಡು ಆರೋಪಿ ರಮಾನಂದ ಪೈ ತಲ್ವಾರ್ ಬೀಜಿದಿತ್ತ್ದ್, ಶರತ್ ಕುಂದರ್ ನ ಬಲತ ಅಂಗೈ, ನಡುತ ಬಿರೆಲ್, ಎಡತ ಕೈ ಬಿರೆಲ್ಲೆಗ್ ಗಡಾಕುಲಾತ. ಶರತ್ ಕುಂದರ್ನ ಒಟ್ಟುಗಿತ್ತಿನ ದೋಸ್ತಿಲು ಬೊಬ್ಬೆ ಪಾಡ್ದಿತ್ತ್ದ್ ಅಪಗ ಮಾತ ಆರೋಪಿಲು ಮೊಕಲೆನ್ ಪೋಡಿಕಟ್ಟಾದ್ ಪೋತೆರ್. ಶರತ್ ಪೇಂಟೆದ ಖಾಸಗಿ ಆಸ್ಪತ್ರೆಗ್ ದಾಕಲಾತೆರ್. ನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.