Last updated on February 11th, 2026 at 04:25 pm
ಕುಡ್ಲ, ಫೆ. 11: ಬೆಂಗಳೂರು ಬೊಕ್ಕ ಕುಡ್ಲದ ನಡುಟು ವಂದೇ ಭಾರತ್ ರೈಲ್ ಸುರು ಆಪುಂಡು ಪನ್ಪಿನ ಕುಸಿಟ್ ಇತ್ತಿನ ತುಳುವೆರೆಗ್ ರೈಲ್ವೆ ಇಲಾಖೆ ಶಾಕ್ ಕೊರ್ತುಂಡು. ಎಚ್ಚಿಗೆ ಸೌಲತ್ತ್ ಕೊರ್ಪುನ ಬುಡ್ದು ಇತ್ತಿನೆನ್ಲಾ ಒಯ್ತೊನುನ ನಿರ್ಧಾರೊಗು ಬಾರೀ ಆಕ್ರೋಶ ತೋಜಿದ್ ಬೈದ್ಂಡ್.
ಒಂಜಿನೆದ, ವಂದೇಭಾರತ್ ರೈಲ್ ಬೆಂಗಳೂರು ಬೊಕ್ಕ ಕುಡ್ಲದ ನಡುಟು ಬಲಿಪುಂಡು, ಆಂಡ ಅವು ಕುಡ್ಲ ಪೇಂಟೆಗ್ (ಸೆಂಟ್ರಲ್) ಬರ್ಪುಜಿ. ಪಡೀಲ್ದ ಪಡೀಲ್ ಬೂರ್ದಿನ ಸ್ಟೇಶನ್ಗ್ ಬತ್ತ್ದ್ ಅಲ್ಪರ್ದ್ ಸೀದಾ ಗೋವಾಗ್ ಪೋಪುಂಡು.
ಈತೇ ಅತ್ತಂದೆ, ಈ ಸೆಂಟ್ರಲ್ಗ್ ಬರಂದೆ ಗೋವಾಗ್ ಪೋಪುನ ರೈಲ್ಗ್ ಬೋಡಾದ್ ಪಗೆಲ್ಡ್
ಬೆಂಗಳೂರು-ಕುಡ್ಲದ ನಡುಟು ಸಾರಗಟ್ಲೆ ಪ್ರಯಾಣಿಕೆರೆನ್ ಲೆತೊಂದು ಪೋಪುನ ಗೊಮ್ಮಟೇಶ್ವರ ಎಕ್ಸ್ ಪ್ರೆಸ್ದ
(16575/16576) ಪೊರ್ತುಪಟ್ಟಿನ್ ಪಗಪೆರೆ ಇಲಾಖೆ ಪಿದಡ್ದ್ಂಡ್ಗೆ. ಈ ಮುಕೇನ ಕುಡ್ಲಗ್ ಡಬಲ್
ಶಾಕ್ ಕೊರ್ತುಂಡು.
ಮಂಗಳೂರು ಜಿಲ್ಲೆ, ಹಾಸನ ಬೊಕ್ಕ ಬೆಂಗಳೂರ್ದ ಪ್ರಯಾಣಿಕೆರ್ ಸುಲಭೊಡು ಪಗೆಲ್ ಪ್ರಯಾಣ ಮಲ್ತ್ದ್ ಪೊರ್ತು ಕಂತೆರಾನಗ ಗೊಮಟೇಶ್ವರ ಎಕ್ಸ್ಪ್ರೆಸ್ಡ್ ಬೆಂಗಳೂರು/ಕುಡ್ಲಗ್ ಎತ್ತೆದೆರ್. ನನ ದುಂಬಗ್ ಮಧ್ಯಾಹ್ನ ಪಿದಡ್ದ್, ನಡೀರ್ ಆನಗ ಕುಡ್ಲ/ಬೆಂಗಳೂರುಎತ್ತುನ ಸಾಧ್ಯತೆ ಉಂಡು ಪನ್ಪಿ ಒಲವು ತಿಕ್ಕ್ದ್ಂಡ್. ಉಂದೆರ್ದಾವರ ಸಾರಗಟ್ಲೆ ಪ್ರಯಾಣಿಕೆರೆಗ್
ಐಟ್ಲಾ ವಿದ್ಯಾರ್ಥಿಲೆಗ್, ರೋಗಿಲೆಗ್, ಬೇಲೆಗ್ ಪೋಪಿನಕ್ಲೆಗ್, ಪೊಂಜೊವುಲೆಗ್ ಈ ರೈಲ್ದ ಅನುಕೂಲೊನೇ ತತ್ತ್ಂಡ್ ಪೋಪುಂಡು ಪನ್ಪಿ ಆಕ್ರೋಶ ಈ ಸಾದಿಯೆ ಪೋಪಿನಕ್ಲೆಡ ತೋಜಿದ್ ಬೈದ್ಂಡ್.
ಪಾಕ ಪೊರ್ಮ್ಬಾಟೊರ್ದು ಬೊಕ್ಕ 2017ಟ್ ಕುಡ್ಲ ಬೊಕ್ಕ ಬೆಂಗಳೂರುದ ನಡುಟು ಪೋದು ಬರ್ಪುನ ಪೊರ್ತು ತಗ್ಗಾಯೆರ ಬೋಡಾದ್ ಈ ರೈಲ್ ಸುರು ಆದಿತ್ತ್ಂಡ್. 2017 ತ ಎಪ್ರಿಲ್ 9 ದಾನಿ ಅಪಗದ ಕೇಂದ್ರ ರೈಲ್ವೆ ಮಂತ್ರಿ ಸುರೇಶ್ ಪ್ರಭು ಮೇರ್ ಮಂಗಳೂರು ಜಂಕ್ಷನ್ರ್ದ್ ಗೋಮಟೇಶ್ವರ ಎಕ್ಸ್ಪ್ರೆಸ್ ಪನ್ಪಿ ಪುದರ್ದ ಈ ರೈಲ್ಗ್ ಚಾಲನೆ ಕೊರ್ದಿತ್ತೆರ್. ಈ ರೈಲ್ ‘ಕುಡ್ಲ ಎಕ್ಸ್ಪ್ರೆಸ್’ ಪನ್ದೇ ಪುದರಾದುಂಡು. ದುಂಬು ಯಶವಂತಪುರ -ಮಂಗಳೂರು ಜಂಕ್ಷನ್ ಗೊಮಟೇಶ್ವರ ಎಕ್ಸ್ಪ್ರೆಸ್ (ರೈಲ್ ಸಂಖ್ಯೆ 16575) ಯಶವಂತಪುರ ಜಂಕ್ಷನ್ರ್ದ್ ಕಾಂಡೆ 7 ಕ್ ಪಿದಡ್ದ್ ಮಂಗಳೂರು ಜಂಕ್ಷನ್ ಗ್ ಬಯ್ಯ 4:40 ಕ್ ಎತ್ತೆದ್ಂಡ್. ಮನದಾನಿ 16576 ರೈಲ್ ಕಾಂಡೆ 11:30 ಕ್ ಮಂಗಳೂರು ಜಂಕ್ಷನ್ರ್ದ್ ಪಿದಡ್ದ್ ರಾತ್ರೆ 8:45 ಕ್ಕ್ ಯಶವಂತಪುರ ಎತ್ತೊಡಿತ್ತ್ಂಡ್. ಆಂಡ ಘಾಟಿಸಾದಿದ ನಡುಟು ಪೋದು ಎತ್ತ್ನಗ ಬಾರೀ ಕಡೆಸ್ಸೊಂದಿತ್ತಿನ ಈ ರೈಲ್ದ ಸಮಸ್ಯೆ ಆದಿತ್ತ್ಂಡ್. ಪಾಕ ಒತ್ತಾಯ ಮಲ್ತಿ ಬೊಕ್ಕ 2024 ರ್ದ್ 16576 ರೈಲ್ ಮಂಗಳೂರು ಜಂಕ್ಷನ್ರ್ದ್ ಕಾಂಡೆ 7 ಗಂಟೆಗ್ ಪಿದಡ್ದ್ ಬಯ್ಯ 4:30ಕ್ಕ್ ಯಶವಂತಪುರ ಜಂಕ್ಷನ್ ಎತ್ತೊಂದುಂಡು.
ಇತ್ತೆ ಬೆಂಗಳೂರ್ರ್ದ್ ಕುಡ್ಲಗ್ ವಂದೇ ಭಾರತ್ ಎಕ್ಸ್ಪ್ರೆಸ್ ಬೋಡು ಪನ್ಪಿ ಕಾಯೆಸ್ನ್ ಗೆನ್ಪಂದೆ, ಕುಡ್ಲ ಪೇಂಟೆಗ್ ಬರಂದೆ ಪಡೀಲ್ ಬೈಪಾಸ್ ಆದ್ ಬೆಂಗಳೂರ್ರ್ದ್ ಗೋವಾಗ್ ವಂದೇ ಭಾರತ್ ಎಕ್ಸ್ಪ್ರೆಸ್ ಬಲಿಪಾವುನ ಪ್ರಸ್ತಾವನೆ ರೈಲ್ವೆ ಇಲಾಖೆದ ಎದುರು ಉಂಡು. ಈ ರೈಲ್ಗ್ ಬೋಡಾದ್ ಕುಡ್ಲ-ಬೆಂಗಳೂರು ನಡುಟು ಪೋಪಿನಕ್ಲೆಗ್ ಬಾರೀ ಸಕಾಯ ಆವೊಂದಿತ್ತಿನ ಗೊಮಟೇಶ್ವರ
ಎಕ್ಸ್ಪ್ರೆಸ್ದ ಪೊರ್ತುಪಟ್ಟಿಡ್ ಎಚ್ಚಿಕಮ್ಮಿ ಮಲ್ತೊಂದುಪ್ಪುನವು ತುಳುವೆರೆನ ವಿರೋಧಗ್
ನೆವನ ಆತ್ಂಡ್.
ರೈಲ್ವೇ ಮಂಡಳಿದಕುಲು ಈ ತೀರ್ಮಾನ ಮಲ್ತಿತ್ತ್ಂಡಲಾ, ನೈರುತ್ಯ ರೈಲ್ವೇ ಅಧಿಕಾರಿಲು ಒವ್ವೇ ಒಲವು ಬೈದಿಜಿ, ಎಂಕ್ಲೆಗ್ ಪೊಸ ಪೊರ್ತುಪಟ್ಟಿ ಕೊರ್ತುಜೆರ್, ಅಂಚಾದ್ ಇತ್ತೆನೇ ದಾಲ ಪನ್ರೆ ಆಪುಜಿ ಪನ್ದ್ ಪನೊಂದುಲ್ಲೆರ್.
ಈ ಬಗೆಟ್ ರೈಲ್ವೆ ಇಲಾಖೆ, ರೈಲ್ವೆ ಮಂತ್ರಿಲೆಗ್ ಜಿಲ್ಲೆದ ರೈಲ್ವೆ
ಪ್ರಯಾಣಿಕೆರೆ ಹಿತರಕ್ಷಣ ಸಮಿತಿಲು ಬಿನ್ನಪು ಮಲ್ತ್ದ. ಬೆಂಗಳೂರು-ಗೋವಾ ವಂದೇ ಭಾರತ್ ಎಕ್ಸ್ಪ್ರೆಸ್ ಬೋಡಾಂಡ ಪಡೀಲ್ ಬೈಪಾಸ್ಡೆ ಆದ್ ಪೋವಡ್ ಅತ್ತ್ ಮಂಗಳೂರು ಜಂಕ್ಷನ್ ಆದ್ ಬೋಡಾಂಡ ಪೋವಡ್. ಆಂಡ ಐಕ್ ಬೋಡಾದ್ ಗೊಮ್ಮಟೇಶ್ವರ ಎಕ್ಸ್ಪ್ರೆಸ್ (ಕುಡ್ಲ ಎಕ್ಸ್ಪ್ರೆಸ್) ಬಲಿ ಆಪುನ ಬೊರ್ಚಿ ಪನ್ದ್ ಪ್ರಯಾಣಿಕೆರ್ ಒತ್ತಾಯ ಮಲ್ತ್ದೆರ್. ಈ ಬಗೆಟ್ ಸಾಮಾಜಿಕ ಬಲೆತ್ತಾನೊಡು ಅಭಿಯಾನೊಲು ಸುರು ಆದಿತ್ತ್ದ್, ಓಲಾಂಡಲಾ ಜನೊಕುಲೆಗ್ ಬಂಙ ಆಪಿಲೆಕ ಗೊಮ್ಮಟೇಶ್ವರ ಎಕ್ಸ್ಪ್ರೆಸ್ ರೈಲ್ದ ಪೊರ್ತು ಎಚ್ಚಿಕಮ್ಮಿ ಆಂಡ ರೈಲ್ ಅಡ್ಡಕಟ್ಟ್ದ್ ಪೊರ್ಮ್ಬಾಟ ಮಲ್ಪೆರಲಾ ರೆಡಿ ಉಲ್ಲ ಪನ್ದ್ ಪನ್ತೆರ್.