Last updated on February 19th, 2026 at 10:17 am
ಕುಡ್ಲ, ಫೆ. 19: ವಿಶ್ವ ಪೊಂಜೊವುಲೆ ದಿನೊತ ಲೆಕ್ಕೊಡು ಶ್ರೀ ದುರ್ಗಾಪರಮೇಶ್ವರಿ ನಾಗಕನ್ನಿಕಾ ದೇಲಂತಡೆತ ನಿರೆಲ್ಡ್ ಅಂಚೆನೇ ಯಕ್ಷ ಸ್ನೇಹ ಕಲಾ ಪ್ರತಿಷ್ಠಾನ (ರಿ) ಇಂದೆತ ಮುತಾಲಿಕೆಡ್ ‘ಯಕ್ಷ ಮಂಜರಿ’ ಮಹಿಳಾ ಯಕ್ಷಗಾನ ತಾಳಮದ್ದಳೆ ಅಷ್ಟಾಹ 2026 ಮಾರ್ಚ್ 1 ರ್ದ್ 8 ಮುಟ್ಟ ನಡಪರೆಗುಂಡು. ಈ ಲೇಸ್ ಕೊಂಚಾಡಿ ದೇಲಂತಡೆದ ಶ್ರೀಮತಿ ಲೀಲಾವತಿ ಬೈಪಡಿತ್ತಾಯ ವೇದಿಕೆಡ್ ದಿನೋಲಾ ಬಯ್ಯಡ್ ಅಟ್ಟನೆ ಆತ್ಂಡ್.
ಆಣ್ಕಲೆ ಪನ್ದೇ ಪುದರಾತಿನ ಯಕ್ಷಗಾನೊಡು ಪೊಣ್ಣುಪೊಂಜೊವುಲೆನ ಸಾದಗೊ, ಸಮರ್ಪಣೆ ಬೊಕ್ಕ ಕಲಾ ಸಾಮರ್ತಿಗೆನ್ ಸಮಾಜೊದ ಎದುರು ಕನಪುನ ಉದ್ದೇಶೊಡು ಈ ಎಣ್ಮ ದಿನೊತ ಅಷ್ಟಾಹ ಸಂಭ್ರಮೊನು ಮಲ್ತೊಂದುಲ್ಲೆರ್. ದೋಸ್ತಿಲೆ ಕೂಟ ಆದ್ ಸುರು ಆಯಿನ ಈ ಕಲಾ ಚಟುವಟಿಕೆ, ಮದ್ದಳೆ ಕಲಾವಿದೆ ಬೊಕ್ಕ ಫೋಟೋಗ್ರಾಫರ್ ಮಧುಸೂದನ್ ಅಲೆವೂರಾಯೆರೆ ಮಾರ್ಗದರ್ಶನೊಡು ಬುಲೆದ್, ಇನಿ ಆಂಜೊವುನಕುಲು, ಪೊಂಜೊವುನಕುಲು ಬೊಕ್ಕ ಜೋಕಲು ಮಾತೆರ್ಲಾ ಇತ್ತಿನ ಸಮಗ್ರ ಕಲಾತಂಡ ಆದ್ ಬುಲೆದ್ ಉಂತುದುಂಡು. ದೇವಿನ ಅನುಗ್ರಹ ಬೊಕ್ಕ ಗುರುಕ್ಲೆನ ಆಶೀರ್ವಾದೊಡು ಈ ಕೂಟ ಇನಿ ರಿಜಿಸ್ಟರ್ಡ್ ಸಂಸ್ಥೆ ಆದ್ ಭಾರತೀಯ ಲಲಿತ ಕಲೆಕ್ಲೆನ್ ಬುಲೆಪಾವುನ ಕಜ್ಜ ಬೆನೊಂದುಂಡು.
ಉದಿಪನ:
ಮಾರ್ಚ್ 1ತಾನಿ ಮದ್ಯಾನ ಅಪ್ಪೆ ಭಾರತಿನ ಪೂಜೆದೊಟ್ಟುಗು ಕಾರ್ಯಕ್ರಮ ಸುರು ಆಪುಂಡು. ಯಕ್ಷ ಸ್ನೇಹ ಕಲಾ ಪ್ರತಿಷ್ಠಾನೊದ ಗುರ್ಕಾರ್ದಿ ಗೀತಾ ಲಕ್ಷ್ಮೀಶ್ ಮೆರೆನ ಗುರ್ಕಾರ್ಮೆಡ್ ನಡಪುನ ಈ ಸಮಾರಂಭೊಡು ಬೇತೆ ಬೇತೆ ಧಾರ್ಮಿಕ, ಸಾಂಸ್ಕೃತಿಕ ಬೊಕ್ಕ ಸಾಮಾಜಿಕ ಕ್ಷೇತ್ರೊಲೆನ ಗಣ್ಯೆರ್ ಮಲ್ಲಬಿನ್ನೆರಾದ್ ಪಾಲ್ಪಡೆಪೆರ್. ಬಯ್ಯಡ್ ಉದಿಪನ ಲೇಸ್ಡ್ ತುಡರ್ ಅರ್ಲಾದ್ ಪೆರಿಯ ಕಲಾವಿದೆರ್, ನೃತ್ಯಗುರುಕುಲು ಬೊಕ್ಕ ಕಲಾ ಪೋಷಕೆರೆ ಒತ್ತುಪಾಲ್ಡ್ ಕಾರ್ಯಕ್ರಮೊ ಅಧಿಕೃತವಾದ್ ತೊಡಂಗುಂಡು.
ಅಷ್ಟಾಹ ಸಂಭ್ರಮೊದ ವೈಶಿಷ್ಟ್ಯ:
ಮಾರ್ಚ್ 1ರ್ದ್ 8 ಮುಟ್ಟ ದಿನೋಲಾ ಬೇತೆ ಬೇತೆ ಮಹಿಳಾ ಯಕ್ಷಗಾನ ಕೂಟೊಲೆರ್ದ್ ಪೆಜ್ಜಿನ ಪ್ರಸಂಗೊಳೆನ ತಾಳಮದ್ದಳೆ ಪ್ರದರ್ಶನ ನಡಪುಂಡು.
“ಸುದರ್ಶನ ಗರ್ವಭಂಗ”, “ಇಂದ್ರಜಿತು ಕಾಳಗ”, “ಇಂದ್ರ ಕೀಲಕ”, “ಕದಂಬ ಕೌಶಿಕೆ”, “ಭಕ್ತ ಸುಧನ್ವ”, “ಸುದರ್ಶನ ವಿಜಯ”, “ಶ್ಯಮಂತಕ ಮಣಿ – ಜಾಂಬವತಿ ಕಲ್ಯಾಣ”, “ಶ್ರೀ ಏಕಾದಶಿ ದೇವಿ ಮಹಾತ್ಮ” ಬೊಕ್ಕ ಸಮಾರೋಪದಾನಿ “ಗಿರಿಜಾ ಕಲ್ಯಾಣ” ಪ್ರಸಂಗೊಲೆನ್ ಗೊಬ್ಯೆರ ಉಲ್ಲೆರ್.
ದಿನೋಲ ನಡಪುನ ಮಿತ್ತರ್ಮೆದ ಲೇಸ್ಡ್ ಧಾರ್ಮಿಕ, ಸಾಂಸ್ಕೃತಿಕ, ಸಾಮಾಜಿಕ, ಮಾಧ್ಯಮ ಬೊಕ್ಕ ಆಡಳಿತ ಕ್ಷೇತ್ರೊದ ಗಣ್ಯೆರ್ ಗುರ್ಕಾರ್ರ್ ಬೊಕ್ಕ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆಗಿತ್ತ್ದ್, ಮಹಿಳಾ ಯಕ್ಷಗಾನ ಕಲಾವಿದೆರೆ ಸಾದಗೊಗು ಮಾನಾದಿಗೆಲಾ ಮಲ್ಪರೆ ಉಂಡು.
ಸಮಾರೋಪ:
ಮಾರ್ಚ್ 8ದಾನಿ ವಿಶ್ವ ಮಹಿಳಾ ದಿನೊತಾನಿ ನಡಪುನ ಸಮಾರೋಪ ಸಮಾರಂಭೊಡು ಪುಗರ್ತೆದ ಭಾಗವತೆರ್, ಯಕ್ಷಗುರುಕುಲು, ಕಲಾ ಪೋಷಕೆರ್ ಬೊಕ್ಕ ಗಣ್ಯೆರ್ ಪಾಲ್ಪಡೆಯೆರೆ ಇತ್ತ್ದ್, ಯಕ್ಷಗಾನ ಕ್ಷೇತ್ರೊಡು ಪೊಂಜೊವುನಕುಲೆನ ಪಾತ್ರ ಬೊಕ್ಕ ಕೊರ್ಪುಗೆಲೆನ್ ವಿಶೇಷವಾದ್ ಗುರ್ತ ಪತ್ತುವೆರ್.
ಒಟ್ಟಾರೆ, ಈ ಅಷ್ಟಾಹ ಸಂಭ್ರಮೊ ಮಹಿಳಾ ಶಕ್ತಿದ ಸಾಂಸ್ಕೃತಿಕ ಅಭಿವ್ಯಕ್ತಿ, ಯಕ್ಷಗಾನೊದ ಸಮಕಾಲೀನ ಬುಲೆಚ್ಚಿಲ್ ಬೊಕ್ಕ ನನದ ತರೆಮಾರ್ಗ್ ಕಲಾ ಪ್ರೇರಣೆದ ಮಾಮಲ್ಲ ಮಿತ್ತರ್ಮೆ ಆವರೆ ಉಂಡು ಪನ್ದ್ ಯಕ್ಷ ಸ್ನೇಹ ಕಲಾ ಪ್ರತಿಷ್ಠಾನೊದ ಗುರ್ಕಾರ್ದಿ ಶ್ರೀಮತಿ ಗೀತಾ ಲಕ್ಷ್ಮೀಶ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.