Last updated on February 5th, 2026 at 09:44 am
ಕುಡ್ಲ, ಫೆ. 05: ನಂತೂರ್ದ ಕೈತಲ್ ಕೋಡೆ ಬುಧವಾರ ರಾತ್ರೆ ನಡತಿನ ಭೀಕರ ಎಡ್ತೆಡ್ ಸ್ಕೂಟರ್ಡ್ ಪಿರವು ಕುಲ್ದಿತ್ತಿನ ಜವನ್ದಿ ಒರ್ತಿ ತೀರ್ದೆರ್. ಬಲ್ಲಾಳ್ಬಾಗ್ ನಿವಾಸಿ ದೀಪ್ತಿ (26) ತೀರ್ದಿನಾರ್. ಸ್ಕೂಟರ್ ಬುಡೊಂದಿತ್ತಿನ ಕಿಶೋರ್ (32) ಗ್ ಗಡಿಕುಲಾದಿತ್ತ್ದ್, ಆರೆನ್ ಆಸ್ಪತ್ರೆಗ್ ದಾಕಲ್ತ್ದೆರ್.
ಸ್ಕೂಟರ್ ಬಲ್ಲಾಳ್ಬಾಗ್ರ್ದ್ ವಾಮಂಜೂರು ದಂಚಿ ಪೋವೊಂದಿಪ್ಪುನಗ ನಂತೂರು ಬಸ್ ಉಂಡೆದ ಕೈತಲ್ ಪ್ರೈವೇಟ್ ಬಸ್ ಎಡ್ತ್ದ್ಂಡ್. ಎಡ್ತೆದ ಬರಸ್ಗ್ ದೀಪ್ತಿ ಬಸ್ದ ಎದುರುದ ಟಯರ್ಗ್ ತಿಕ್ಕ್ದ್ ಬೂರ್ದಿತ್ತ್ದ್, ಬಸ್ದ ಟಯರ್ ಆರೆನ ಮೇಲ್ಡೆ ಪೋತುಂಡುಗೆ. ಅಪಗನೇ ಎಜೆ ಆಸ್ಪತ್ರೆಗ್ ಲೆತೊಂದು ಪೋಂಡಲಾ ಅಡೆ ಎತ್ತ್ನಗ ತೀರ್ದೆರ್.
ನಂತೂರು ಕೈತಲ್ದ ಬಸ್ ಉಂತಡೆದ ಎದುರುಡೇ ಈ ನಡಕೆ ನಡತಿತ್ತ್ದ್ ಕುಡುಪು ದಂಚಿ ಪೋವೊಂದಿತ್ತಿನ 22 ನಂಬರ್ದ ಪ್ರೈವೇಟ್ ಬಸ್ ಎಡ್ತ್ದ್ಂಡ್. ಬಸ್ ಬೀಸ ಬತ್ತ್ಂಡಾ ಅತ್ತ್ ಸ್ಕೂಟರ್ ಬಲತ ಮೆಯಿಟೆ ಎದುರುಗ್ ಬತ್ತ್ಂಡಾ ಪನ್ದ್ ತೆರಿದಿಜಿ ಪನ್ದ್ ಕೋಡೆ ಕದ್ರಿ ಪೊಲೀಸೆರ್ ತೆರಿಪಾದೆರ್. ಕದ್ರಿ ಟ್ರಾಫಿಕ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಜವನೆ ಬೊಕ್ಕ ಜವನ್ದಿ ವಾಮಂಜೂರ್ಡ್ ಬರ್ತ್ ಡೇ ಪಾರ್ಟಿಗ್ ಪೋವೊಂದಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್.