Last updated on March 9th, 2026 at 12:31 pm
ಮಾ. 09: ಅಂತರಾಷ್ಟ್ರೀಯ ಮಹಿಳಾ ದಿನಾಚರಣೆದ ಕುಸಿತ ನಡುಟೇ ಸಾಮಾಜಿಕ ಬಲೆತ್ತಾನೊಡು ಜವನ್ದಿ ಒರ್ತಿನ ವಿಡಿಯೋ ಒಂಜಿ ಭಾರೀ ವೈರಲ್ ಆತ್ಂಡ್. ಇಲ್ಲದಕುಲೆನ ಮದಿಮೆದ ಒತ್ತಾಯೊರ್ದು ಬಚಾವಾಯೆರ ಪೊಣ್ಣು ಒರ್ತಿ ಅಲಕ್ಕ ತರೆ ಗೀಸಾವೊಂದಿನ ನಡಕೆ ವರದಿ ಆತ್ಂಡ್.
ಇನ್ಸ್ಟಾಗ್ರಾಮ್ಡ್ ಕಾಜಲ್ ಪನ್ಪಿನಾರ್ ಈ ವಿಡಿಯೋನ್ ಪಟ್ಟೊಂದಿತ್ತ್ದ್, ಒಂತೆ ಗಂಟೆದುಲಯಿಡೇ ಲಕ್ಷಗಟ್ಲೆ ವೀವ್ಸ್ ಬೈದ್ಂಡ್. ವಿಡಿಯೋಡ್ ಪಾತೆರೊಂದು ಆರೆನ ಅಸಹಾಯಕತೆನ್ ಪನ್ಡೊನ್ದಿನ ಆರ್, ಎಂಕ್ ಎನ್ನ ಕುಜಲ್ ಪನ್ಡ ಜೂವ, ಆಂಡ ಏಪೊಲ ಮದಿಮೆ ಆಲ, ಮದಿಮೆ ಆಲ ಪನ್ದ್ ಅಪ್ಪೆ ಅಮ್ಮೆ ಬೊಕ್ಕ ಸಂಬಂಧಿಕೆರ್ ಕೊರೊಂದಿತ್ತಿನ ಪ್ರೆಷರ್ ತಡೆಯೊನರೆ ಆವಂದೆ ಈ ನಿರ್ಧಾರೊಗು ಬೈದೆ ಪನ್ದ್ ತೆರಿಪಾದೆರ್. ಪೊಣ್ಣು ಜೋಕುಲೆನ ಸೌಂದರ್ಯಗ್ ಕುಜಲ್ ಮುಖ್ಯ ಪನ್ಪಿನ ಸಮಾಜೊದ ನಿಯಮೊನೇ ತನ್ನ ಅಸ್ತ್ರ ಮಲ್ತೊಂದಿನ ಕಾಜಲ್, ತರೆ ಗೀಸಾವೊಂಡ ಎನನ್ ಏರ್ಲಾ ಮದಿಮೆ ಆವರೆ ದುಂಬು ಬರ್ಪುಜೆರ್ ಬೊಕ್ಕ ಇಲ್ಲದಕುಲೆನ ಒತ್ತಾಯೊಲಾ ತಪ್ಪುಂಡು ಪನ್ಪಿ ಆಲೋಚನೆಡ್ ಈ ಸಾಹಸೊಗು ಕೈಪಾಡ್ದೆರ್.
ಪೊಣ್ಣು ಪೊಂಜೊವುಲೆನ ವೈಯಕ್ತಿಕ ನಿರ್ಧಾರೊಲೆನ್ ಸಮಾಜ ದಾಯೆ ವಿಚಿತ್ರವಾದ್ ತೂಪುಂಡು ಪನ್ದ್ ಪ್ರಶ್ನೆ ಮಲ್ದಿನ ಕಾಜಲ್, ಆಣುಲು ಇಂಚಿನ ನಿರ್ಧಾರ ಗೆತೊನುನಗ ಏರ್ಲಾ ಎದುರು ಪಾತೆರುಜೆರ್, ಆಂಡ ಪೊಣ್ಣುಲೆನ ವಿಷಯೊಗು ಬನ್ನಗ ಮಾತ್ರ ಕಟ್ಟ್ಕಟ್ಲೆಲೆನ ಪಾತೆರ ಬರ್ಪುಂಡು ಪನ್ದ್ ಬೆಸರ್ ತೂಪಾದೆರ್. ಎಂಕ್ ಎರೆನನಾ ಸಹಾನುಭೂತಿ ಬೋಡೂಂದು ಇಜ್ಜಿ, ಎನ್ನ ಲೆಕನೇ ಇಲ್ಲದಕ್ಲೆನ ಒತ್ತಾಯೊಗು ತಿಕ್ಕ್ದ್ ಬೂರ್ದು ಜೂವನೊದ ಈಡ್ ಮದತಿನ ಅವೇತೋ ಪೊಣ್ಣುಲೆಗ್ ಧೈರ್ಯ ದಿಂಜಾಯೆರೆ ಈ ವಿಡಿಯೋ ಮಲ್ತ್ದೆ ಪನ್ದ್ ಆರ್ ಪನ್ಡೊನ್ದೆರ್. ಕಾಲ ತತ್ತ್ ಪೋಯಿಬೊಕ್ಕ ಏರ್ಲಾ ಬತ್ತ್ದ್ ನಮ್ಮ ಇಷ್ಟ-ಕಷ್ಟೊಲೆನ ಬಗೆಟ್ ಕೇನುಜೆರ್, ಅಂಚಾದ್ ನಮ್ಮ ಬದ್ಕ್ನ್ ನಮಕ್ ಬೋಡಾಯಿಲೆಕ ಕಟ್ಟೊನರೆ ಇನಿಯೇ ಧೈರ್ಯ ತೋಜಾವೊಡು ಪನ್ಪಿ ಸೊಲ್ಲಂಜ ಕೊರ್ತೆರ್.
ಈ ವಿಡಿಯೋ ತೂಯಿನಕುಲು ಪರ-ವಿರೋಧ ಪಾತೆರೊಂದಿತ್ತ್ಂಡಲಾ, ಎಚ್ಚಿನಕುಲು ಜವನ್ದಿನ ತಂಕೊನು ಪುಗರ್ದೆರ್. ಕಾಲಿ ಮದಿಮೆದ ನೆವನೊಗು ಪೊಣ್ಣು ಜೋಕುಲೆನ ಕನೊಕುಲೆನ್ ಬಲಿ ಕೊರ್ಯೆರೆ ಬಲ್ಲಿ ಪನ್ದ್ ಪಾಕ ಜನ ಕಾಮೆಂಟ್ ಮಲ್ತ್ದೆರ್. ಮದಿಮೆ ಪನ್ಪಿನವು ಒರಿಯರ್ದೊರಿ ಒತ್ತೊಂದು ನಡಪೊಡಾಯಿನ ಗೌಜಿ ಅತ್ತಂದೆ, ಇಂಚಿನ ಒತ್ತಾಯದ ಪುದೆ ಆವರೆ ಬಲ್ಲಿ ಪನ್ಪಿನವು ಸಾರ್ವಜನಿಕೆರೆನ ಅಭಿಪ್ರಾಯ ಆದುಂಡು.