Last updated on March 12th, 2026 at 07:08 pm
ಸುಳ್ಯ, ಮಾ. 12: ಸುಳ್ಯ ಡಿಗ್ರಿ ಕಾಲೇಜ್ದ ಕನ್ನಡ ಸಕಾಯಕ ಪ್ರಾಧ್ಯಾಪಕೆ ಮಂಜು ಪಿ. (42) ಮೇರ್ ಇನಿ, ಗುರುವಾರ (ಮಾರ್ಚ್ 12) ಮಧ್ಯಾಹ್ನ ಮೆಡಿಕಲ್ ಶಾಪ್ದ ಕೈತಲ್ ಕುಸ್ಕ್ದ್ ಬೂರ್ದು ತೀರ್ದೆರ್. ಮೇರ್ ಮೂಲತಃ ಮೈಸೂರ್ ಜಿಲ್ಲೆದ ಕೆ.ಆರ್. ನಗರ ತಾಲೂಕ್ದ ಬೇರ್ಯದಾರ್.
ಗುರುವಾರ ಏಪೊಲ್ದ ಲೆಕ ಕಾಲೇಜ್ಗ್ ಬತ್ತ್ದ್ ಮಧ್ಯಾಹ್ನ ಮುಟ್ಟ ಕ್ಲಾಸ್ ಗೆತೊಂದಿನ ಮಂಜು ಮೆರೆಗ್, ಬೊಕ್ಕ ಒಂತೆ ಉಸಾರ್ ತತ್ತಿಲೆಕ ಆತ್ಂಡ್. ವಿದ್ಯಾರ್ಥಿ ಒರಿಯನ ಸಕಾಯೊಡು ತನ್ನ ಅದೆಕ್ ಪೋದ್ ಒಂತೆ ಪೊರ್ತು ಕುಲ್ಲುವೆ ಪನ್ದಿತ್ತೆರ್. ಆಂಡ, ಒಂತೆ ತೈರ್ದ್ ಮರ್ದ್ ಗೆತೊನ್ರ ಸುಳ್ಯದ ಶ್ರೀರಾಮ ಪೇಂಟೆದ ಮೆಡಿಕಲ್ ಶಾಪ್ಗ್ ಬತ್ತಿನ ಆರ್ ಒರರ್ದ್ ಒರಾನೆ ಕುಸ್ಕ್ದ್ ಬೂರ್ದೆರ್. ಅಲ್ಪ ಇತ್ತಿನಕುಲು ಅಪಗನೇ ಆರೆನ್ ಆಸ್ಪತ್ರೆಗ್ ಲೆತೊಂದು ಪೋಂಡಲಾ, ಆರ್ ತೀರ್ದೆರ್ ಪನ್ದ್ ಡಾಕ್ಟರ್ ತೆರಿಪಾದೆರ್.
ಮಂಜು ಮೇರ್ ಲೋ ಬಿಪಿ ಅತ್ತ್ಂಡ ಹಾರ್ಟ್ ಅಟ್ಯಾಕ್ ಆದ್ ತೀರ್ದಿನ ಸಾಧ್ಯತೆ ಉಂಡು ಪನ್ದ್ ಅಂದಾಜಿ ಮಲ್ತ್ದೆರ್. ಮೇರ್ ಕರಿನ 10 ವರ್ಸದಾತ್ ಕಾಲ ಕೆ.ಆರ್. ನಗರದ ಸರ್ಕಾರಿ ಪ್ರೌಢಶಾಲೆಡ್ ಶಿಕ್ಷಕೆ ಆದ್ ಬೇಲೆ ಮಲ್ತಿತ್ತೆರ್. 2024ಟ್ ಸುಳ್ಯ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜ್ಗ್ ಉಪನ್ಯಾಸಕೆರಾದ್ ನೇಮಕ ಆದ್ ಮುಲ್ಪ ಬೇಲೆ ಮಲ್ತೊಂದಿತ್ತೆರ್.