Last updated on March 9th, 2026 at 06:24 pm
ಮಾ. 09: ದಿನೊರ್ದು ದಿನೊಕು ಎಚ್ಚ ಆವೊಂದುಪ್ಪುನ ದೊಂಬುರ್ದಾವರ ಬಚ್ಚಿದ್ ಪೋತಿನ ಜನೊಕುಲೆಗ್ ಹವಾಮಾನ ಇಲಾಖೆ ಒಂತೆ ಸಮಾಧಾನ ಆಪಿನ ಸುದ್ದಿ ಕೊರ್ತುಂಡು. ಬಂಗಾಳಕೊಲ್ಲಿದ ಮಿತ್ತ ಮೆಯಿಟ್ ಕಾತ್ದ ಒತ್ತಮೆ ಎಚ್ಚ ಆತಿನೆರ್ದಾವರ ತುಳುನಾಡ್ ಅಂಚೆನೇ ಕರ್ನಾಟಕ, ಕೇರಳದ ಕೆಲಕಡೆಟ್ ಇನಿ ರಾತ್ರೆ ಬರ್ಸ ಬರ್ಪಿನ ಸಾಧ್ಯತೆ ಉಂಡು ಪನ್ದ್ ಸೂಚನೆ ಕೊರ್ತುಂಡು.
ತುಳುನಾಡ್ ಬೊಕ್ಕ ಮಲೆನಾಡು ಭಾಗೊಡು ತೆಡಿಲ್ದೊಟ್ಟುಗು ಬರ್ಸ ಬರ್ಪಿನ ಸಾಧ್ಯತೆ ಎಚ್ಚ ಉಂಡು. ವಿಶೇಷವಾದ್ ತುಳುನಾಡ್ದ ಮಂಗಳೂರು, ಒಡಿಪು ಬೊಕ್ಕ ಕಾಸರಗೋಡು ಜಿಲ್ಲೆಲೆಡ್ ಸೆಕೆ ಎಚ್ಚ ಇತ್ತ್ಂಡಲಾ ಬಯ್ಯಾನಗ ಬರ್ಸ ದೊರಿಪುನ ಸಾಧ್ಯತೆ ಉಂಡು. ಸುಳ್ಯ, ಕುಡುಮ, ಬೋಲ್ತೇರ್ ಬೊಕ್ಕ ಕಾರ್ಲದ ಸುತ್ತಮುತ್ತ ಜಾಗೆಲೆಡ್ ಸುಮಾರ್ 60 ಶೇಕಡಾ ರ್ಸದ ಸಾಧ್ಯತೆ ಉಂಡು ಪನ್ದ್ ಪನ್ತೆರ್.
ಕೊಡಗು ಗಡಿ ಭಾಗ, ವಯನಾಡ್ ಬೊಕ್ಕ ಬಂಡೀಪುರ ಅರಣ್ಯ ಪ್ರದೇಶಡ್ಲಾ ತೆಡಿಲ್ದೊಟ್ಟುಗು ಬರ್ಸ ಬರು. ಶೃಂಗೇರಿ, ಕುದುರೆಮುಖ ಬೊಕ್ಕ ಚಾರ್ಮಾಡಿ ಘಾಟ್ ಭಾಗೊಡು ಮುಗಲ್ ಕಬಿದಿ ವಾತಾವರಣ ಇತ್ತ್ದ್, ಗಾಳಿ ಬರ್ಸದ ಸಾಧ್ಯತೆ ಉಂಡು. ಬರ್ಪಿ ವಾರೊದುಲಯಿ ರಾಜ್ಯೊದ ಪಾಕ ಕಡೆಟ್ ಎಡ್ಡೆ ಬರ್ಸ ಬರ್ಪಿನ ಸಾಧ್ಯತೆ ಉಂಡು.