Last updated on March 11th, 2026 at 01:46 pm
ಉಳ್ಳಾಲ, ಮಾ. 11: ಸೋಮವಾರ ನಾಪತ್ತೆ ಆದಿತ್ತಿನ ಜವನನ ಪುನ ಸೋಮೇಶ್ವರದ ಸೋಮನಾಥ ಕ್ಷೇತ್ರೊದ ಗದಾತೀರ್ಥ ಕೆದುಟ್ ಇನಿ ಕಾಂಡೆ ತಿಕ್ಕ್ದ್ಂಡ್. ಉಳ್ಳಾಲ ತಾಲೂಕ್ದ ಕೊಣಾಜೆದ ಮುಚ್ಚಿಲ ಕೋಡಿದ ದಿನೇಶ್ ಶೆಟ್ಟಿಗಾರ್ ಪನ್ಪಿನಾರೆನ ಮಗೆ ವಿವೇಕ್ ಶೆಟ್ಟಿಗಾರ್ ( 32) ತೀರ್ದಿನ ಜವನೆ.
ಕುಡ್ಲದ ಪ್ರೈವೇಟ್ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ವಿವೇಕ್ ಸೋಮಾರ ಕಾಂಡೆ ಇಲ್ಲರ್ದ್ ಬೇಲೆಗ್ ಪಿದಡ್ದ್ ಪೋದಿತ್ತೆರ್. ಆನಿ ರಾತ್ರೆ 9 ಗಂಟೆದ ಅಂದಾಜಿಗ್ ಅಪ್ಪೆಗ್ ಫೋನ್ ಮಲ್ತ್ದ್ ದೇಲಂತಡೆಗ್ ಪೋಪೆ ಪನ್ದ್ ಪನ್ದಿತ್ತೆರ್ಗೆ. ರಾತ್ರೆ 12 ಗಂಟೆ ಆಂಡಲಾ ಮಗೆ ಪಿರ ಬರಂದಿನೆನ್ ತೂದು ಆರೆನ ಅಪ್ಪೆ ಪೋನ್ ಮಲ್ತಿತ್ತ್ದ್, ವಿವೇಕ್ ಫೋನ್ ರಿಸೀವ್ ಮಲ್ತಿಜ್ಜಂಡ್. ವಿವೇಕ್ ಅಂಗಾರೆಲಾ ಇಲ್ಲಗ್ ಬರಂದೆ, ಫೋನ್ಲಾ ರಿಸೀವ್ ಮಲ್ಪಂದೆ ಇತ್ತಿನೆನ್ ತೂದು ಪೋಡಿದ್ ಇಲ್ಲದಕುಲು ಒರ್ಮೆಲಾ ನಾಡ್ದ್, ಅಕೇರಿಗ್ ಕೊಣಾಜೆ ಪೊಲೀಸ್ ಸ್ಟೇಶನ್ಡ್ ನಾಪತ್ತೆ ಆತಿನ ಬಗೆಟ್ ಒಯಿಲ್ ಬರೆಪಾದೆರ್.
ಆರೆನ ಟೂವೀಲರ್ ಗಾಡಿದ ಒಟ್ಟುಗು ಆರೆನ ಜೋಡು ಅಂಗಾರೆ ಕಾಂಡೆ ಸೋಮೇಶ್ವರ ಕಡಲ ಕರೆಟ್ ತಿಕ್ಕ್ದಿತ್ತ್ಂಡ್. ತೀರ್ದಿನ ವಿವೇಕ್ ಅಪ್ಪೆ, ಅಮ್ಮೆ ಬೊಕ್ಕ ಒರ್ತಿ ಒಪ್ಪಪುಟ್ಟಿನಾರೆನ್ ಅಗತ್ದೆರ್.