Last updated on March 3rd, 2026 at 09:06 am
ಕುಡ್ಲ, ಮಾ. 2: ಕುಡ್ಲ ಲೋಕಾಯುಕ್ತ ಪೊಲೀಸೆರ್ ಭ್ರಷ್ಟಾಚಾರ ವಿರೋಧಿ ಕಾರ್ಯಾಚರಣೆಡ್, ಕಮಿಷನ್ ಕೇಂಡಿನ ಆರೋಪಡ್ ದಾಳಿ ಮಲ್ತಿನ ಕುಡ್ಲ ಲೋಕಾಯುಕ್ತ ಪೊಲೀಸೆರ್, ಲೋಕೋಪಯೋಗಿ ಇಲಾಖೆದ ವಿದ್ಯುತ್ ಉಪವಿಭಾಗೊದ ಅಸಿಸ್ಟೆಂಟ್ ಕಾರ್ಯ ನಿರ್ವಾಹಕ ಇಂಜಿನಿಯರ್ ಕಚೇರಿಡ್ ಬೇಲೆ ಮಲ್ತೊಂದಿತ್ತಿನ ಎಸ್ಡಿಎ ಸಂಪತ್ ಪನ್ಪಿನಾಯನ್ ಸೋಮವಾರ ಕೈದ್ ಮಲ್ತ್ದೆರ್.
ಕರ್ನಾಟಕ ಸರ್ಕಾರೊದ ಮಾನ್ಯತೆ ಇತ್ತಿನ ಪ್ರಥಮ ದರ್ಜೆ ಎಲೆಕ್ಟ್ರಿಕಲ್ ಕಂಟ್ರಾಕ್ಟರ್ ಆದುಪ್ಪುನ ದೂರುದಾರೆ 2025ನೇ ಸಾಲ್ಡ್ ಒಡಿಪು ಜಿಲ್ಲೆದ ಬೇತೆ ಬೇತೆ ಗ್ರಾಮ ಪಂಚಾಯತ್ಲೆಡ್ ಸ್ಟ್ರೀಟ್ ಲೈಟ್ ಪಾಡುನ ಬೇಲೆ ಮಲ್ತಿತ್ತೆರ್. ಈ ಬೇಲೆಲೆನ ಬಿಲ್ದ ಕಾಸ್ ಕೊರ್ಪುನೆಕ್ ಸಂಬಂಧಿತ್ದ್ 4 ಶೇಕಡಾ ಪ್ರಮಾಣೊಡು ರೂ. 22,600 ಲಂಚ ಕೊರ್ಯೆರ ಎಸ್ ಡಿಎ ಸಂಪತ್ ಕೇನ್ದೆರ್ ಪನ್ದ್ ಒಯಿಲ್ಡ್ ತೆರಿಪಾದೆರ್. ಈ ಬಗೆಟ್ ಕಾಂಟ್ರಾಕ್ಟರ್ ಕುಡ್ಲ ಲೋಕಾಯುಕ್ತ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ್ದ್, ಒಯಿಲ್ದ ಆಧಾರೊಡು ಸಂಪತ್ನ ಮಿತ್ತ್ ಭ್ರಷ್ಟಾಚಾರ ತಡೆ ಕಾಯ್ದೆದಡಿಟ್ ಪ್ರಕರಣ ದಾಕಲಾದಿತ್ತ್ಂಡ್.
ಯೋಜನೆದ ಪ್ರಕಾರ ಕೋಡೆ ತೇದಿ 02.03.2026 ತಾನಿ ಎಸ್.ಡಿ.ಎ. ಸಂಪತ್ ಕಾಂಟ್ರಾಕ್ಟರ್ನ ಕೈರ್ದ್ 22,600/- ಲಂಚದ ಕಾಸ್ ಗೆತೊನುನಗ ಲೋಕಾಯುಕ್ತ ಪೊಲೀಸೆರ್ ದಾಳಿ ಮಲ್ತ್ದ್ ಆರೋಪಿನ್ ರೆಡ್ ಹ್ಯಾಂಡ್ ಆದ್ ಪತ್ತ್ದೆರ್.
ಕೈದಾತಿನ ಅಧಿಕಾರಿನ್ ವಿಚಾರಣೆ ಮಲ್ತೊಂದುಲ್ಲೆರ್. ಪ್ರಕರಣೊಗು ಸಂಬಂಧಿತ್ದ್ ನನದ ಕಾನೂನು ಕ್ರಮೊಕ್ಲೆನ್ ಗೆತೊಂದಿತ್ತ್ದ್, ಕುಡ್ಲ ಲೋಕಾಯುಕ್ತ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.
ಲೋಕಾಯುಕ್ತ ಪೊಲೀಸ್ ಅಧೀಕ್ಷಕೆ ಬಿ.ಪಿ ದಿನೇಶ್ ಕುಮಾರ್ರೆನ ಮಾರ್ಗದರ್ಶನೊಡು ಉಪಾಧೀಕ್ಷಕೆ ಸುರೇಶ್ ಕುಮಾರ್.ಪಿ, ಡಾ. ಗಾನ ಪಿ. ಕುಮಾರ್, ಪಿ.ಐ. ಭಾರತಿ ಜಿ. ಮೊಕಲೆನ ಉಸ್ತುವಾರಿಡ್ ನಿರೀಕ್ಷಕೆ ಚಂದ್ರಶೇಖರ್ ಕೆ.ಎನ್., ಸಿಬ್ಬಂದಿಲಾಯಿನ ರಾಜಪ್ಪ, ಮಹೇಶ್, ಆದರ್ಶ್, ರಾಮ ನಾಯ್ಕ, ಗಂಗಣ್ಣ, ಮಹಾದೇವ, ಪವಿತ್ರ, ಲಕ್ಷ್ಮಿ, ರವಿ ಪವಾರ್, ನವೀನ್ ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.