Last updated on March 5th, 2026 at 11:48 am
ಉಬಾರ್, ಮಾ. 05: ಬಜತ್ತೂರು ಗ್ರಾಮೊದ ಮಾಣಿಕ್ಕಳಡ್ ಅಕ್ರಮ ಕೋರ್ದಟ್ಟದ ಮಿತ್ತ್ ಉಬಾರ್ ಪೊಲೀಸೆರ್ ಅಂಗಾರೆ ದಾಳಿ ಮಲ್ತ್ದ್ ಮೂವೆರೆನ್ ಉಲಕೈ ಮಲ್ತೊಂದು ಐನ್ ಪೂಂಜೆರೆನ್ಲಾ ಉಲಕೈ ಮಲ್ತೊಂದೆರ್.
ಆರೋಪಿಲೆನ್ ಕೊೖಲ ಗ್ರಾಮೊದ ಸಬಲೂರು ನಿವಾಸಿ ಸತೀಶ್ (38) ವಿಟ್ಲ ಪಡ್ನೂರು ಗ್ರಾಮೊದ ಕಡಂಬುದ ಮುರಳಿ (30), ಬೊಕ್ಕ ವಳಾಲ್ ಕುಂಡತ್ತಡ್ಕ ನಿವಾಸಿ ಮೋನಪ್ಪ ಕೆ (36) ಪನ್ದ್ ಗುರ್ತ ಪತ್ತ್ದೆರ್.
ಅಂಗಾರೆ ಬಯ್ಯ ಉಬಾರ್ ಪೊಲೀಸ್ ಸಬ್ ಇನ್ಸ್ಪೆಕ್ಟರ್ ಸುತೇಶ್ ಕೆ.ಪಿ ಬೊಕ್ಕ ಆರೆನ ಕೂಟ ಮಾಣಿಕ್ಕಳ ದ ಕೈತಲ್ ರೌಂಡ್ಸ್ ಪೋನಗ ಈ ಕಾರ್ಯಾಚರಣೆ ಮಲ್ತ್ದೆರ್. ಕೋರಿಲು ಕೆಲೆಪುನ ಕೇನ್ದ್ ಪೊಲೀಸೆರ್ ಬತ್ತ್ದ್ ತೂನಗ ಸಾದಿಬರಿಟ್ ಅಕ್ರಮ ಕೋರ್ದಟ್ಟ ಮಲ್ತೊಂದುಪ್ಪುನ ತೋಜಿದ್ ಬೈದ್ಂಡ್.
ಪೊಲೀಸೆರ್ ದಾಳಿ ಮಲ್ಪೆರೆ ತೂವೊಂದಿತ್ತಿಲೆಕನೆ, ಅಲ್ಪ ಸೇರ್ದಿತ್ತಿನಕುಲು ಮಾತ ಪದ್ರಾಡಾತೆರ್. ಅಧಿಕಾರಿಲು ಮೂವೆರ್ ಶಂಕಿತೆರೆನ್ ಪತ್ತುನೆಟ್ ಯಶಸ್ವಿ ಆತೆರ್.
ಕಟ್ಟೆರೆ ಕನತಿನ ಐನ್ ಪೂಂಜೆರ್, ರಡ್ಡ್ ಸೆಟ್ ಬಾಲ್ ಬೊಕ್ಕ 2,300 ರೂ. ಕಾಸ್ನ್ ಪೊಲೀಸೆರ್ ಉಲಕೈ ಮಲ್ತೊಂದೆರ್. ಆತೇ ಅತ್ತಂದೆ, ಜಾಗೆಡ್ ತಿಕ್ಕಿನ ರಡ್ಡ್ ಪ್ಲಾಸ್ಟಿಕ್ ಚೀರಾವು ಬೊಕ್ಕ ಒಂಜಿ ಬೈಕ್ನ್ಲಾ ವಶೊಕು ಗೆತೊಂದೆರ್.
ಪ್ರಾಥಮಿಕ ವಿಚಾರಣೆಡ್, ಕೈದಾತಿನಕುಲು ಈ ಕಟ್ಟನ್ ದೇರಣ್ಣೆ ಬೊಕ್ಕ ಉಮೇಶ್ ಪನ್ಪಿನ ಇರ್ವೆರ್ ಅಟ್ಟನೆ ಮಲ್ತಿತ್ತೆರ್ ಪನ್ದ್ ಬಾಯಿ ಬುಡ್ತೆರ್. ಪೊಲೀಸೆರ್ ಈ ಬಗೆಟ್ ಜಡ್ತೆ ಮಲ್ತೊಂದಿತ್ತ್ದ್, ಅಟ್ಟನೆ ಮಲ್ದಿನಕುಲು ಬೊಕ್ಕ ಪಾಲ್ಪಡೆತಿನಕ್ಲೆನ ಮಿತ್ತ್ ಕೇಸ್ ಪಾಡೊಂದುಲ್ಲೆರ್.