Last updated on March 18th, 2026 at 01:59 pm
ಮಾ. 18: ತುಳು ಸಿನಿಮಾ ರಂಗ ಏಪೊಗುಲಾ ಮದಪಂದಿ ಪುದರ್ ಪನ್ಡ ಕೆ. ಎನ್. ಟೇಲರ್ (ಕಡಂದಲೆ ನಾರಾಯಣ ಟೇಲರ್). ಸುಮಾರ್ 1950 ದ ದಶಕೊಡು ‘ಗಣೇಶ ನಾಟಕ ಸಭಾ ಕುಡ್ಲ’ ಪನ್ಪಿ ಸಂಸ್ಥೆದ ಅಡಿಟ್ ಪಾಕ ಜನಪ್ರಿಯ ನಾಟಕೊಲೆನ್ ಮಲ್ತೊಂದು, ಅಂಚೆನೇ 70ದ ದಶಕೊಡು ತುಳು ಸಿನಿಮಾ ರಂಗೊಗು ಗಟ್ಟಿದ ಪಾಯ ಪಾಡ್ದಿನ ಕೆ. ಎನ್. ಟೇಲರ್ರೆನ್ ತುಳುವೆರ್ ಮದಪುನಾಂಡಲಾ ಎಂಚ??
ಮೇರ್ ನಟೆ, ನಿರ್ದೇಶಕೆ, ನಿರ್ಮಾಪಕೆ, ಲೇಖಕೆ ಆದ್ ತುಳು ರಂಗಭೂಮಿಗ್ ಜೂವ ದಿಂಜಾದಿನಾರ್. ತುಳು ರಂಗಭೂಮಿದ ಭೀಷ್ಮೆ ಪನ್ದೇ ಪುದರಾದಿತ್ತಿನ ಕೆ. ಎನ್. ಟೇಲರ್, ಪಾಕ ಸಮೆರ್ದಿಂಚಿ ಉಸಾರ್ತತ್ತ್ದ್ ಇತ್ತ್ದ್ 2015ನೇ ಮಾರ್ಚ್ 18 ದಾನಿ ತೀರ್ಯೆರ್. ಆರ್ ನಮನ್ ಬುಡ್ದು ಪೋತಿನ ಈ ದಿನೊತಾನಿ ಆರೆನ್ ನೆನೆತೊಂದು ಆರ್ ತುಳು ಸಿನಿಮಾ ರಂಗೊಗು ಕೊರ್ತಿನ ಸೇಜಲೆನ ಬಗೆಟ್ ತೆರಿಯೊನುಗ.
ಕೆ. ಎನ್. ಟೇಲರ್ ನಟನೆ ಮಲ್ದಿನ ಅಂಚೆನೇ ಬೆನ್ತಿನ ಸಿನಿಮಾಲೆನ ಪಟ್ಟಿ
1. ದಾರೆದ ಬುಡೆದಿ
2. ಪಗೆತ ಪುಗೆ
3. ಬಿಸತ್ತಿ ಬಾಬು
4. ಯಾನ್ ಸನ್ಯಾಸಿ ಆಪೆ
5. ಕಾಸ್ದಾಯೆ ಕಂಡನೆ
6. ಏರ್ ಮಲ್ತಿನ ತಪ್ಪು
7. ತುಳುನಾಡ ಸಿರಿ
8. ಸಾವಿರಡೊರ್ತಿ ಸಾವಿತ್ರಿ
9. ಭಾಗ್ಯವಂತೆದಿ (ಚಿತ್ರಕಥೆ, ಡೈಲಾಗ್)
ಆರೆನ ‘ನಮ್ಮ ಭಾಗ್ಯ’ ಸಿನಿಮಾ ಬುಡಗಡೆ ಆತಿಜಿ! ತುಳುನಾಡ ಪರಂಪರೆನ್ ತೋಜಾವುನೆತ ಒಟ್ಟುಗು ಅಪಗದ ಪುಗರ್ತೆದ ನಟಿಕುಲಾಯಿನ ಜಯಮಾಲಾ, ರತ್ನಮಾಲಾ, ಲೀಲಾವತಿ ಮೊಕಲೆನ್ ತುಳು ಸಿನಿಮಾಗ್ ಕನತಿನಲಾ ಮೇರೇ. ಲೀಲಾವತಿ ನಟನೆ ಮಲ್ದಿನ ‘ಬಿಸತ್ತಿ ಬಾಬು’ ಚಿತ್ರಗ್ 1972-73 ದ ಕರ್ನಾಟಕ ರಾಜ್ಯ ಸರ್ಕಾರೊದ 3 ನೇ ಅತ್ಯುತ್ತಮ ಚಲನಚಿತ್ರ ಮಾನಾದಿಗೆ ತಿಕ್ಕ್ದಿನ ಅತ್ತಂದೆ ತುಳು ಚಿತ್ರರಂಗೊಗು ರಾಷ್ಟ್ರೀಯ ಮಾನಾದಿಗೆಲಾ ಕನತ್ ಕೊರ್ತುಂಡು. ಈ ಪಿಚ್ಚರ್ 75ನೇ ದಿನೊತಾನಿ ಕನ್ನಡೊದ ಮಲ್ಲ ಪುದರ್ ಡಾ. ರಾಜ್ಕುಮಾರ್ಲಾ ಕುಡ್ಲದ ಜ್ಯೋತಿ ಟಾಕೀಸ್ಗ್ ಬತ್ತಿತ್ತೆರ್.
ಆರೆನ ‘ದಾರೆದ ಬುಡೆದಿ’ ಆ ಕಾಲೊಡೇ ಮುಂಬಯಿಡ್ಲಾ ರಿಲೀಸ್ ಆದ್ ಪುದರ್ ಮಲ್ತಿತ್ತ್ಂಡ್.