ಸೌಜನ್ಯನ್ ಅತ್ಯಾಚಾರ ಮಲ್ತ್‌ದ್ ಕೆರ್ತಿನ ಕೇಸ್: ಸಿಬಿಐಗ್ ನೊಟೀಸ್ ಜಾರಿ ಮಲ್ತಿನ ಸುಪ್ರೀಂಕೋರ್ಟ್

Last updated on March 23rd, 2026 at 02:55 pm

ಬೋಲ್ತೇರ್: ಧರ್ಮಸ್ಥಳ ಗ್ರಾಮೊದ ಮಣ್ಣಸಂಕಡ್ 13 ವರ್ಸೊಗು ದುಂಬು ನಡತಿತ್ತಿನ ಉಜಿರೆ ಎಸ್‌ಡಿಎಂ ಕಾಲೇಜಿದ ಕು. ಸೌಜನ್ಯನ್ ಅತ್ಯಾಚಾರ ಮಲ್ತ್‌ದ್ ಕೆರ್ತಿನ ಪ್ರಕರಣೊಗು ಸಂಬಂಧಿತ್‌ದ್ ಮಾ.23 ತಾನಿ ಸುಪ್ರೀಂಕೋರ್ಟ್ ಸಿಬಿಐಗ್ ನೊಟೀಸ್ ಜಾರಿ ಮಲ್ದ್ಂಡ್. 2012ತ ಅಕ್ಟೋಬರ್‌ಡ್ ನಾಪತ್ತೆ ಆದಿತ್ತಿನ ಧರ್ಮಸ್ಥಳ ಗ್ರಾಮೊದ ಪಾಂಗಳ ನಿವಾಸಿ ಸೌಜನ್ಯ ಮೆರೆನ ಪುನ ಮನದಾನಿ ಅತ್ಯಾಚಾರ ಮಲ್ತ್‌ದ್ ಕೆರ್ತಿನ ಸ್ಥಿತಿಟ್ ತಿಕ್ಕ್‌ದಿತ್ತ್ಂಡ್. ಈ ಪ್ರಕರಣೊದ ಬಗೆಟ್ ಸುರುಕು ಬೋಲ್ತೇರ್ ಪೊಲೀಸ್ ಸ್ಟೇಶನ್‌ಡ್ ಕೇಸ್ ದಾಕಲಾದಿತ್ತ್ಂಡ್. ಬೊಕ್ಕ ಸಿಐಡಿ ಜಡ್ತೆ ನಡತ್‌ದ್ ಬೊಕ್ಕ ಸಿಬಿಐ ಜಡ್ತೆಲಾ ನಡತಿತ್ತ್ಂಡ್. ಕಾರ್ಲದ ಸಂತೋಷ್ ರಾವ್ ಪನ್ಪಿನಾಯನ್ ಅತ್ಯಾಚಾರ ಮಲ್ತ್‌ದ್ ಕೆರ್ತಿನ ಆರೋಪಡ್ ಕೈದ್ ಮಲ್ತಿತ್ತೆರ್.

ಕೆಲ ಸಮೆಕ್ ದುಂಬು ಬೆಂಗಳೂರ್‌ದ ಸಿಬಿಐ ವಿಶೇಷ ನ್ಯಾಯಂತಡೆ ಸಾಕ್ಷ್ಯಾಧಾರೊಲೆನ ಕುಂದೆಲ್‌ರ್ದಾವರ ಸಂತೋಷ್ ರಾವ್‌ನ್ ನಿರ್ದೋಷಿ ಪನ್ದ್ ತೀರ್ಪು ಕೊರ್ದು ಬುಡುಗಡೆ ಮಲ್ತಿತ್ತ್ಂಡ್. ಆ ಪೊರ್ತುಡು ಸಿಬಿಐ ನ್ಯಾಯಂತಡೆ ಸೌಜನ್ಯ ಪ್ರಕರಣೊಗು ಸಂಬಂಧಿತ್‌ದ್ ತನಿಖಾ ಸಂಸ್ಥೆಲೆನ ಲೋಪದೋಷೊಲೆನ್ ದೆರ್ತ್ ತೋಜಾದಿತ್ತ್ಂಡ್. ನೈಜ ಅಪರಾಧಿಲೆನ್ ನಾಡ್‌ಪತ್ತುನೆಟ್ ಜಡ್ತೆ ಕೂಟ ವಿಫಲ ಆತ್ಂಡ್ ಪನ್ದ್ ನ್ಯಾಯಾಧೀಶೆರ್ ಅಭಿಪ್ರಾಯೊಗು ಬತ್ತಿತ್ತೆರ್. ಅವ್ವೇ ಅಂಶೊನು ಆಧಾರವಾದ್ ದೀವೊಂದು ಸೌಜನ್ಯನ ಅಪ್ಪೆ ಕುಸುಮಾವತಿ ಮೇರ್ ಸುಪ್ರೀಂಕೋರ್ಟ್‌ದ ಮೊಟ್ಟು ಬರ್ತ್‌ದಿತ್ತೆರ್. ಕುಸುಮಾವತಿ ಮೆರೆನ ಮಿತ್ತಬಿನ್ನಪುದ ಅರ್ಜಿದ ವಿಚಾರಣೆ ಮಲ್ತಿನ ಸುಪ್ರೀಂಕೋರ್ಟ್ ಪೀಠ ತಿರ್ತ್‌ದ ನ್ಯಾಯಂತಡೆದ ತೀರ್ಪುನು ತೂದು ಪ್ರಕರಣೊದ ಜಡ್ತೆದ ವರದಿನ್ ಸಂದಾಯೆರ ಸಿಬಿಐಗ್ ಸೂಚನೆ ಕೊರ್ದು ನೋಟೀಸ್ ಜಾರಿ ಮಲ್ದ್ಂಡ್.