Last updated on April 5th, 2026 at 02:22 pm
ಕುಡ್ಲ, ಏ. 05: ಮಂಗಳೂರು ಬೊಕ್ಕ ಒಡಿಪು ಜಿಲ್ಲೆಲೆಡ್ ಕರಿನ ಕೆಲ ವರ್ಸರ್ದಿಂಚಿ ಎಲಿ ಜ್ವರ ಪ್ರಕರಣೊಲು ಬಾರೀ ಎಚ್ಚ ಆದಿತ್ತ್ದ್, ಕರಿನ ಮೂಜಿ ವರ್ಸೊಡು ಒಟ್ಟು 1,700 ಪ್ರಕರಣೊಲು ದೃಢ ಆತ.
ಮಂಗಳೂರು ಜಿಲ್ಲೆಡ್ 751 ಪ್ರಕರಣೊಲು ಬೊಕ್ಕ ಒಡಿಪು ಜಿಲ್ಲೆಡ್ 949 ಪ್ರಕರಣೊಲು ತಿಕ್ಕ್ದ. ಈ ವರ್ಸ ಮಂಗಳೂರು ಜಿಲ್ಲೆಡ್ 13 ಬೊಕ್ಕ ಒಡಿಪುಡ್ 11 ಪ್ರಕರಣೊಲು ವರದಿ ಆತ. ನನ ಒಂತೆ ತಿಂಗೊಲುಡು ಮರಿಯಾಲ ಸುರು ಆವರೆ ಇತ್ತ್ದ್, ಇಂದು ಎಲಿ ಜ್ವರ ಪಗರೆರೆ ಎಡ್ಡೆ ವಾತಾವರಣ ಮಲ್ತ್ ಕೊರ್ಪುಂಡು.
ಮರಿಯಾಲಡ್ ಬೊಲ್ಲ ಏರ್ನಗ ಎಲಿಕುಲು ಮಾಟೆಲೆರ್ದ್ ಪಿದಯಿ ಬರ್ಪ, ಅಂಚಾದ್ ತೆಟ್ಟ್ ನೀರ್ ನರಮಾನ್ಯನ ಸಂಪರ್ಕೊಗು ಬರ್ಪಿನ ಸಾಧ್ಯತೆ ಎಚ್ಚ. ಎಲಿಕ್ಲೆನ ಪಡಿಕೆಡ್ ಇಪ್ಪುನ ‘ಲೆಪ್ಟೊಸ್ಪೈರಾ’ ಪನ್ಪಿ ಬ್ಯಾಕ್ಟೀರಿಯಾ ಬರ್ಸದ ನೀರ್ ಅತ್ತ್ಂಡ ಉಂತಿ ನೀರ್ಡ್ ಸೇರ್ನಗ ಈ ಸೀಕ್ ಪಗರುಂಡು.
ಗ್ರಾಮೀಣ ಭಾಗೊರ್ದು ಪೇಂಟೆಡೇ ಎಚ್ಚ ಪ್ರಕರಣೊಲು ತಿಕ್ಕೊಂದುಲ್ಲ, ನೈರ್ಮಲ್ಯದಾಂತಿನ ಅಂಚೆನೇ ಕಜವುಲೆನ್ ಸಮಗಟ್ಟ್ ದಕ್ಕಂದೆ ಓಲೋಲು ಪಾಡುನನೇ ಇಂದೆಕ್ ಮುಖ್ಯ ನೆವನ ಆದುಂಡು. ಹೋಟೆಲ್ಲೆನ ತೆನಸ್ಲೆನ್ ಕಣಿಕ್ಲೆಗ್ ದಕ್ಕುನು, ತಿರ್ಗುನಾಯಿಲೆಗ್ ಓಲೋಲು ತಿನರೆ ಪಾಡುನು ಇಂಚ ಬೇತೆ ಬೇತೆ ನೆವನೊಲೆರ್ದಾವರ ಸೀಕ್ ಪಗರುಂಡು.
ಆರೋಗ್ಯ ಇಲಾಖೆ ಆಶಾ ಕಾರ್ಯಕರ್ತೆದಿಯೆರ್ ಬೊಕ್ಕ ಆರೋಗ್ಯ ಸಹಾಯಕೆರೆ ಮುಕೇನ ಇಲ್ಲ ಇಲ್ಲಗ್ ಪೋದು ಜಾಗೃತೆ ಪುಟ್ಟಾವೊಂದುಂಡು. ಶೇ. 20ದಾತ್ ಪ್ರಕರಣೊಲು ಗಾತಿದ ಸ್ವರೂಪಗ್ ಪೋಪುನ ಸಾಧ್ಯತೆ ಇತ್ತ್ದ್ ಅಂಗಾಂಗ ವೈಫಲ್ಯೊಗು ನೆವನ ಆವು. ಉಂತಿ ನೀರ್ಡ್ ಜೋಕುಲು ಗೊಬ್ಬಂದಿಲೆಕ ಅಪ್ಪೆಅಮ್ಮೆ ಜಾಗೃತೆ ಮಲ್ಪೊಡು. ಈ ಸೀಕ್ ಒರಿಯರ್ದ್ ಒರಿಯಗ್ ಪಗರುಜಿ.
ಎಲಿ ಜ್ವರ ಕ್ ಪರಿಣಾಮಕಾರಿ ಮರ್ದ್ ಉಂಡು. ಪೊರ್ತುಗು ವೈದ್ಯಕೀಯ ಸಕಾಯ ಗೆತೊನ್ಡ ಉಂದೆನ್ ಅಲಕ್ಕ ಗುಣ ಮಲ್ಪೊಲಿ. ಸಾರ್ವಜನಿಕೆರ್ ನೈರ್ಮಲ್ಯ ಕಾತೊನೊಡು ಅಂಚೆನೇ ಉಂತಿನ ತೆಟ್ಟ್ ನೀರ್ರ್ದ್ ದೂರ ಇಪ್ಪೊಡು.