Last updated on April 2nd, 2026 at 02:47 pm
ಪುತ್ತೂರ್, ಎ. 02: ಬಿಜೆಪಿ ಮಾಜಿ ಮುಖಂಡೆ ಜಗನ್ನಿವಾಸ್ ರಾವ್ ಮೆರೆನ್ ಪುತ್ತೂರ್ ಮಹಾಲಿಂಗೇಶ್ವರ ದೇಲಂತಡೆದ ಧಾರ್ಮಿಕ ಕಾರ್ಯೊಲೆರ್ದ್ ದೂರ ದೀವೊಡು, ಇಜಿಂಡ ಜಾತ್ರೆದ ಕೊಡಿ ಏರುನ ಪೊರ್ತುಡು ಕೊಡಿಮರತಡಿಟ್ ಕುಲ್ಲುದು ದೇಬೆರೆಡ ನ್ಯಾಯ ಕೇನುವೆ ಪನ್ದ್ ಸಂತ್ರಸ್ತೆದಿನ ಅಪ್ಪೆ ನಮಿತಾ ಎಚ್ಚರ್ಗೆ ಕೊರ್ತೆರ್.
ಪುತ್ತೂರ್ಡ್ ಪತ್ರಿಕಾಗೋಷ್ಠಿಡ್ ಪಾತೆರ್ನ ಆರ್ ಹಿಂದೂ ಜವನ್ದಿಗ್ ಅನ್ಯಾಯ ಮಲ್ತಿನಕಲೆನ್ ದೇಬೆರೆ ಬೇಲೆಲೆಡ್ ಕೈಗೋಡ್ಯಾಯೆರೆ ಬುಡ್ರೆ ಬಲ್ಲಿ. ಏಪ್ರಿಲ್ 10 ತಾನಿ ನಡಪುನ ಪುತ್ತೂರ್ ಮಹಾಲಿಂಗೇಶ್ವರ ದೇಬೆರೆನ ಜಾತ್ರೆದ ಕೊಡಿ ಏರ್ನಗ ಜಗನ್ನಿವಾಸ್ ರಾವ್ ಪಾಲ್ಪಡೆಯೆರ ಬಲ್ಲಿ. ಓಲಾಂಡಲಾ ಆರೆನ್ ಸೇರಾವೊಂಡ, ಏನ್ ಕೊಡಿಮರತಡಿಟ್ ಕುಲ್ಲುದು ತಂತ್ರಿಲೆಡ ನ್ಯಾಯ ಕೇನುವೆ” ಪನ್ದ್ ಆರ್ ಎಚ್ಚರ್ಗೆ ಕೊರ್ತೆರ್. ಈ ಬಗೆಟ್ ದೇಲಂತಡೆದ ವ್ಯವಸ್ಥಾಪನಾ ಸಮಿತಿಗ್ಲಾ ಆರ್ ಬಿನ್ನಪು ಮಲ್ತ್ದೆರ್.
ಬಿಜೆಪಿ ಮಾಜಿ ಮುಖಂಡೆ ಪಿ.ಜಿ. ಜಗನ್ನಿವಾಸ್ ರಾವ್ನ ಮಗೆ ಶ್ರೀಕೃಷ್ಣೆ, ಜವನ್ದಿ ಒರ್ತಿನ್ ಮದಿಮೆ ಆಪೆ ಪನ್ದ್ ನಂಬಾದ್ ದೈಹಿಕ ಸಂಬಂಧ ಬುಲೆಪಾದಿತ್ತೆ . ಸಂತ್ರಸ್ತೆದಿ ಆಣ್ ಬಾಲೆನ್ ಪೆದ್ದ್ದಿತ್ತ್ದ್, ಬಾಲೆಗ್ ಇತ್ತೆ 9 ತಿಂಗೊಲು ಕರಿದ್ಂಡ್. ಸುರುಕು ಮದಿಮೆ ಮಲ್ತ್ ಲೆತ್ತೊನರೆ ಕಾಲಾವಕಾಶ ಕೇನ್ದಿತ್ತಿನ ಜಗನ್ನಿವಾಸ್ ರಾವ್, ಇತ್ತೆ ಮದಿಮೆಗ್ ಒತ್ತೊಂದಿಜ್ಜೆರ್ ಪನ್ದ್ ನಮಿತಾ ಆರೋಪ ಮಲ್ತ್ದೆರ್.