Last updated on April 19th, 2026 at 10:26 am
ನೆಲ್ಯಾಡಿ, ಏ. 19: ಪೆರಿಯಶಾಂತಿ- ಇಚಿಲಂಪಾಡಿ ಸಾದಿದ ನಡುಟು ಕಾಡ್ದ ಉಲಯಿ ಆಂಜೊವು ಒರಿ ವಿಷ ಗೆತೊಂದು ಆತ್ಮಹತ್ಯೆ ಮಲ್ತೊಂದಿನ ನಡಕೆ ಐತಾರ ಕಾಂಡೆ ತೆರಿದ್ ಬೈದ್ಂಡ್.
ತೀರ್ದಿನಾರೆನ್ ಇಚಿಲಂಪಾಡಿ ಗ್ರಾಮೊದ ಬಿಜೀರ್ ನಿವಾಸಿ ಎಸ್. ಸಜೀವ(46) ಪನ್ದ್ ಗುರ್ತ ಪತ್ತ್ದೆರ್.
ಶನಿವಾರ ಇಲ್ಲರ್ದ್ ಬೈಕ್ಡ್ ಪಿದಡ್ದ್ ಪೋದಿತ್ತಿನ ಆರ್ ಬಯ್ಯಾಂಡಲಾ ಇಲ್ಲಗ್ ಪಿರ ಬರಂದಿನೆರ್ದಾವರ ಇಲ್ಲದಕುಲು ಪೋಡಿದ್ ಒರ್ಮೆಲಾ ನಾಡ್ದೆರ್.
ಐತಾರ ಕಾಂಡೆ ಪೆರಿಯಶಾಂತಿರ್ದ್ ಇಚಿಲಂಪಾಡಿಗ್ ಪೋಪಿ ಸಾದಿದ ಬರಿಟ್ ಆರೆನ ಬೈಕ್ ತಿಕ್ಕ್ದಿತ್ತ್ದ್, ಉಂದೆರ್ದಾವರ ಸಂಶಯೊಡು ಇಲ್ಲದಕುಲು ಸುತ್ತಮುತ್ತ ನಾಡ್ದೆರ್. ಬೊಕ್ಕ ಕಾಡ್ದ ನಡುಟು ಮರೊತ ಮುದೆಲ್ಡ್ ಸಜೀವೆ ಪುನ ಆದ್ ತಿಕ್ಕ್ದೆರ್.
ಅಲ್ಪನೆ ಬಾಟಲಿಲು ಬೂರ್ದಿನ ತೋಜಿದ್ ಬತ್ತಿತ್ತ್ದ್ ಆರ್ ಸುರುಕು ಗಂಗಸರ ಪರ್ದ್ ಬೊಕ್ಕ ವಿಷ ಗೆತೊಂದು ಆತ್ಮಹತ್ಯೆ ಮಲ್ತೊಂದೆರ್ ಪನ್ಪಿ ಸಾಧ್ಯತೆ ಮಿತ್ತ್ರ್ದ್ ತೋಜೊಂದುಂಡು.
ಜಾಗೆಗ್ ನೆಲ್ಯಾಡಿ ಔಟ್ ಸ್ಟೇಶನ್ ಪೊಲೀಸೆರ್ ಬತ್ತ್ದ್ ಪರಿಶೀಲನೆ ಮಲ್ತೊಂದುಲ್ಲೆರ್. ತೀರ್ದಿನಾರೆಗ್ ಇರ್ವೆರ್ ಪೊಣ್ಣು ಜೋಕುಲು ಉಲ್ಲೆರ್. ಪ್ರಕರಣೊಗು ಸಂಬಂಧಿತ್ದ್ ಪೊಲೀಸೆರ್ ನನದ ಜಡ್ತೆ ಮಲ್ತೊಂದುಲ್ಲೆರ್.