Last updated on April 8th, 2026 at 01:33 pm
ಹುಬ್ಬಳ್ಳಿ, ಏ. 08: ಹುಬ್ಬಳ್ಳಿಡ್, ತನ್ನ ಮಗಲೆನ್, ಮದಿಮೆ ಆತಿನ ಮುಸ್ಲಿಂ ಆಂಜೊವು ಒರಿ ಬಲಿಪಾವೊಂದು ಪೋತೆ, ಇಲ್ಲ್ ಗೆತೊನ್ರ ಕೊರ್ದಿತ್ತಿನ ಪತ್ತ್ ಲಕ್ಷ ರೂಪಾಯಿ ಕಾಸ್ನ್ಲಾ ಪತೊಂದು ಪೋತೆ. ಇತ್ತೆ ಕಾಸ್ಲಾ ಇಜ್ಜಿ, ಮಗಲ್ಲಾ ಪನ್ಪಿಲೆಕ ಆತ್ಂಡ್. ದಯದೀದ್ ಮಗಲೆನ್ ನಾಡ್ದ್ ಕೊರ್ಲೆ ಪನ್ದ್ ಅಪ್ಪೆ ಒರ್ತಿ ಬಿನ್ನಪು ಮಲ್ತೊಂದೆರ್. ಕರಿನ ರಡ್ಡ್ ವರ್ಸೊರ್ದಿಂಚಿ ಮಗಲೆನ್ ನಾಡ್ಂಡಲಾ ದಾಲ ಪ್ರೇಜನ ಆತಿಜಿ ಪನ್ದ್ ಪನ್ತೆರ್.
ಧಾರವಾಡದ ಕೆಲಗೇರಿದ ನಿವಾಸಿ 22 ವರ್ಸ ಪ್ರಾಯೊದ ತಂಗೆಮ್ಮಾ ಪನ್ಪಿ ಜವನ್ದಿ ಇಲ್ಲ ಎದುರುದ ನಿವಾಸಿ ಕಾರ್ ಡ್ರೈವರ್ ಆದಿತ್ತಿನ ಮುಸ್ಲಿಂ ಆಂಜೊವುನ ಒಟ್ಟುಗು ಬಲ್ತ್ ಪೋತಲ್ಗೆ. ಈ ಬಗೆಟ್ ಆಲೆನ ಅಪ್ಪೆ ಮಂಜುಳಾ ಒಲವು ಕೊರ್ದಿತ್ತ್ದ್, ತನ್ನ ಮಗಲೆಗ್ ಗುರ್ತದ ಜವನನ ಒಟ್ಟುಗು ಮದಿಮೆ ಆದಿತ್ತ್ಂಡ್. ಆಂಡ ಮಗಲ್ ಎಂಕ್ಲೆನ ಒಟ್ಟುಗೇ ಇಪ್ಪೆದಲ್. ಆಲೆನ ಕಂಡನೆ ಅಪಗಪಗ ಬತ್ತ್ದ್ ಪೋಪೆದೆ. ಧಾರವಾಡದ ಕೆಲಗೇರಿಡ್ ಬಾಡಾಯಿದ ಇಲ್ಲಡ್ ಇಪ್ಪುನಗ, ಎಂಕ್ಲೆಗ್ ವಕೀಲೆರ್ ಒರಿಯನ ಗುರ್ತ ಇತ್ತ್ಂಡ್. ಆರೆನ ಕಾರ್ ಡ್ರೈವರ್ ಆದ್ ಮುನ್ನಾ ಪನ್ಪಿನಾಯೆ ಇತ್ತೆ. ಅಪಗ ಎಂಕ್ಲೆನನೇ ಒಂಜಿ ಇಲ್ಲ್ ಮಲ್ಪೊಡು. ಅಂಚಾದ್ ಇಲ್ಲ್ ನಾಡ್ದ್ ಕೊರ್ಲೆ ಪನ್ದ್ ಮುನ್ನಾ ಬೊಕ್ಕ ವಕೀಲೆರೆಗ್ ಪತ್ತ್ ಲಕ್ಷ ಕಾಸ್ ಕೊರ್ದಿತ್ತ. ಅವೆರ್ದ್ ಬೊಕ್ಕ ವಕೀಲೆರ್ ಬೊಕ್ಕ ಮುನ್ನೆ ಅಪಗಪಗ ಇಲ್ಲಗ್ ಬತ್ತ್ ಪೋವೊಂದಿತ್ತೆರ್. ಆಂಡ 2023ಟ್ ಎಂಕ್ಲ ಇಲ್ಲಡ್ ಇಜ್ಜಂದಿನ ಪೊರ್ತುಡು ಮುನ್ನೆ ಎನ್ನ ಮಗಲೆನ್ ಬಲಿಪಾವೊಂದು ಪೋತೆ. ಈ ಬಗೆಟ್ ಧಾರವಾಡದ ಸಬ್ ಅರ್ಬನ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ. ಅಪಗ ಪೊಲೀಸೆರ್ ಮುನ್ನಾನ ಮಿತ್ತ್ ಕೇಸ್ ಪಾಡಂದೆ ಕಾಲಿ ಮಿಸ್ಸಿಂಗ್ ಕಂಪ್ಲೇಟ್ ಬರೆತೆರ್. ಆಂಡ ಇದಮುಟ್ಟ ಮುನ್ನೆ ಬೊಕ್ಕ ಎಂಕ್ಲೆನ ಮಗಲ್ ಒಲ್ಪ ಉಲ್ಲೆರ್ ಪನ್ದ್ ನಾಡ್ದಿಜೆರ್ ಪನ್ದ್ ಆರೋಪ ಮಲ್ತ್ದೆರ್.
ಮುನ್ನಾಗ್ ಬೆಳಗಾವಿ ಜಿಲ್ಲೆದ ರಾಮದುರ್ಗದ ಮುಸ್ಲಿಂ ಪೊಣ್ಣನೊಟ್ಟುಗು ದುಂಬೇ ಮದಿಮೆ ಆದಿತ್ತ್ಂಡ್ಗೆ. ದಂಪತಿಗ್ ಇರ್ವೆರ್ ಜೋಕುಲುಲಾ ಉಲ್ಲೆರ್ಗೆ. ಅಂಚ ಇತ್ತ್ಂಡಲಾ ಬೊಡೆದಿ ಜೋಕುಲೆನ್ ಬುಡ್ದು ಮುನ್ನೆ ತಂಗೆಮ್ಮನ್ ಲೆತೊಂದು ನಾಪತ್ತೆ ಆತೆ. ಆಯನ್ ಸುರೂಟು ಪೊಲೀಸೆರ್ ಪಾಕ ಕಡೆಟ್ ನಾಡ್ದೆರ್. ಹೈದ್ರಾಬಾದ್ ಸೇರ್ದ್ ಬೇತೆ ಪಾಕ ಕಡೆಕ್ ಪೋತೆರ್. ಆಂಡ ಆಯೆ ಸಿಮ್ ಪಗತಿತ್ತ್ದ್, ಇಲ್ಲದಕಲೆನ ಸಂಪರ್ಕಡ್ಲಾ ಇಜ್ಜೆ. ಅಂಚಾದ್ ಮುನ್ನೆ ಬೊಕ್ಕ ತಂಗೆಮ್ಮಾ ಓಲ್ಲೆರ್ ಪನ್ದ್ ನಾಡುನ ಪೊಲೀಸೆರೆಗ್ಲಾ ತರೆಬೇನೆ ಆತ್ಂಡ್. ಮುನ್ನಾನ ಮಿತ್ತ್ ದೆಲ್ಲಿಡ್ ಅತ್ಯಾಚಾರ ಪ್ರಕರಣಲ್
ಆ ಇಪ್ಪುನ ತೆರಿದ್ ಬೈದ್ಂಡ್, ಆಯೆ ಕ್ರಿಮಿನಲ್ ಬ್ಯಾಕ್ಗ್ರೌಂಡ್ ಇತ್ತಿನಾಯೆ ಪನ್ದ್ ತೆರಿದ್ ಬೈದ್ಂಡ್. ತನ್ನ ಮಗಲೆನ್ ನಾಡ್ದ್ ಕೊರ್ಲೆ ಪನ್ದ್ ಧಾರವಾಡ ಸಬ್ ಅರ್ಬನ್ ಪೊಲೀಸೆರೆಗ್ ಪಾಕ ಸರ್ತಿ ಬಿನ್ನಪು ಮಲ್ತ್ಂಡಲಾ ಒವ್ವೇ ಪ್ರೇಜನ ಆವಂದಿನೆರ್ದಾವರ ಹಿಂದೂಪರ ಸಂಘಟನೆಲೆನ ಒಟ್ಟುಗು ಬತ್ತ್ದ್ ಪೊಲೀಸ್ ಕಮಿಷನರ್ಡ ಮಂಜುಳಾ ಒಯಿಲ್ ಕೊರ್ತೆರ್.