Last updated on April 16th, 2026 at 10:23 am
ಪಿಜ್ಜೆರ್ ಮನ್ಪಾದಿತ್ತೆರಾನಿ ಶಕ್ತಿ ಕಲ್ಲ್.
ಕದಿರೆದ ಅಂಗಣೊಡು ಬೂರೊಂದಿತ್ತ್ಂಡ್ ಅಯಿಕೊರ ಕಣ್ಣ್
ಲೆತ್ತೊಂದಿತ್ತ್ಂಡ್ ರೆಟ್ಟೆ ಗಟ್ಟಿದ ಜವನೆರೆನ್ ಮುಟ್ಟ
ತಂಕೊಡೊರ ದೇರ್ಪೊಡು ಪುಗೆಲ್ ಮುಟ್ಟ
ವಾರಗೊರ ಅಮ್ಮೆರೆನ ಬೆರಿಯೆ ಪೋದು
ಆಜಿ ಕೆರೆತ ತೀರ್ಥೊ ಮೀದ್
ದೇವೆರೆಂಗಣೊಗು ಜಪ್ಪುನಗ ಒರ ತೂಯಂಡ
ಪಿರಬನ್ನಗಯಿನ್ ಮುಟ್ಟುದು ಪೊರೆಲ್ತ್ದ್ ಪಿಜ್ಜನ ಪುದರ್ ಓದೊಂತ
ಆರೊರಿ ಜಗ ಜಟ್ಟಿ ಪೈಲ್ವಾನ್ಗೆ ಜವನೊಡು
ತೂಯಿನ ನೆಂಪು ಅರೆನ ಮೆನ್ಕುನ ಸಾನೆ ಮಂಡೆ
ಪುದರ್ ಅರೆನ ಎಯ್ಯಾಡಿ ಮದನ ಮೂಲ್ಯೆ
ಶಕ್ತಿ ಕಲ್ಲ್ ಪಾಡಾಯಿ ಯಜಮಾನ್ಯೆ
ಕಾಲ ಮಗ್ರ್ಂಡ್ ಪರತ್ನ್ ಮಗ್ತ್ಂಡ್
ಪಿಜ್ಜನ ಕಲ್ಲ್ ಉಲಯಿರ್ದ್ ಪಿದಯಿ ಬೂರುಂಡು
ಅಪಗಲ ತೂವೊಂದಿತ್ತ ಆನೆ ಬಾಕಿಲ್ದ ಮಾಡಬರಿಟ್
ಕಾತೊಂದೆ ಇತ್ತ್ಂಡ್ ಏರಾಂಡ ಬರುವೆರಾ ?
ಬರೊಂದಿತ್ತೆರ್ ಅಪ್ರೂಪೊಡೊರಿವೊರಿ
ಕಲ್ಲ್ ಪೊರೆಲ್ತೊಂದು ಮೊರಂಪಯಿ ದೇರ್ತೊಂದು
ಬೊಕ್ಕ ದಿಡ್ಕ ತಿರ್ತ್ ಬುಡೊಂದು
ಅಂಗಣಗಂಬಿ ಅಡಿಪುನ ಪೊಂಜನಕ್ಲೆನ ಕೈಟ್ ಪೊರೆಲೊಂದು
ನೆಲಕ್ ಕಲ್ಲಾಸ್ದ್ ಪೊರ್ಲಾಂಡ್ ಸುತ್ತೊರ್ಮೆ
ಜಾತ್ರೆ ತೂಯೆರೆ ಅಂತರಂತೊರ ಪಾಗರ
ಅವುಲುಲಾ ಅವುಲವುಲು ಗುಂಡ ಲಕ್ಕ್ಂಡ್
ಪಿಜ್ಜನ ಶಕ್ತಿ ಕಲ್ಲ್ ಸೇರ್ಂಡ್ ಬರಿತ ಕಣಿಟ್
ಇತ್ತೆ ಓಲುಂಡು,ನಾಡ್ಂಡಲಾ ತಿಕ್ಕೊಂದಿಜ್ಜಿ
ಏರೆಡ್ ಕೇನುನಿ ಜನ ಬದಲಾವೊಂದೇ ಉಂಡು
ಪಿಜ್ಜನ ಪುದರ್ ತರೆದ್ ಪೋತುಂಡು
ಅಂಗಡಿದ ಅರಿತಿಂದಿ ರೆಟ್ಟೆಡ್ ಶಕ್ತಿ ಓಲುಂಡು
……………
ಕುವಿಕು ಕಣ್ವತೀರ್ಥ
ಪೈಲ್ವಾನ್ ಯೆಯ್ಯಾಡಿ ಮದನ ಮೂಲ್ಯೆರ್ ಕದಿರೆಡ್ ಪಾಡ್ಪಾದಿನ ಶಕ್ತಿಕಲ್ಲ್/ಗರೊಡಿಕಲ್ಲ್ದ ನೆಂಪುಡು ಆರೆನ ಪುಡ್ಕೆ/ತಲ್ಲಿ ಕುಶಾಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಮೇರ್ ಬರೆತಿನ ಪದ. ಇತ್ತೆ ಈ ಶಕ್ತಿಕಲ್ಲ್ ಕದಿರೆಡ್ ಓಲ್ಲಾ ತೋಜೊಂದಿಜ್ಜಿ. ಏರೆಗಾಂಡಲಾ ತೆರಿದಿತ್ತ್ಂಡ ತೆರಿಪಾಲೆ. ಇತಿಹಾಸೊದ ಭಾಗ ಆದುಪ್ಪುನ ಈ ಕಲ್ಲ್ಲೆನ್ ಒರಿತೊನುಗ. ಇಂಚಿನ ಕಲ್ಲ್ಲೆನ ಪಾಕ ಕಡೆಟ್ ತೂವೊಲಿ, ಕಬತ್ತಾರ್ ಆಲಡೆದ ಎದುರು ಒಂಜಿ ಮರ್ಗಿಲ್ಡ್, ಬಪ್ಪನಾಡ್ ದೇವಲ್ಯೊದ ಬರಿಟ್, ಪಡುಮಲೆ ಅರಂತಡೆದ ಅರಿದ್ ಒರಿದಿನ ಅವಶೇಷೊಲೆಡ್ ಇಂಚ ಪಾಕ ಕಡೆಟ್ ಇಂಚಿನ ಗರೊಡಿಕಲ್ಲ್ಲ್ ಉಲ್ಲ. ಅಂಕಸಾದಗೊಗು ಈ ಕಲ್ಲ್ಲೆನ್ ಗಲಸೆದೆರ್. ಈ ಕಲ್ಲ್ಲೆನ್ ಪುಗೆಲ್ ಮುಟ್ಟ ದೇರ್ತ್ದ್ ಪಿರವು ದಕ್ಕೆದೆರ್/ಪಾಡೆದೆರ್