Last updated on April 14th, 2026 at 08:35 am
ದೆಲ್ಲಿ/ನಾಸಿಕ್: ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (TCS) ಕಂಪೆನಿದ ನಾಸಿಕ್ ಶಾಖೆಡ್ ಕೇನ್ದ್ ಬೈದಿನ ಲೈಂಗಿಕ ಕಿರುಕುಳ ಬೊಕ್ಕ ಒತ್ತಾಯೊದ ಧಾರ್ಮಿಕ ಮತಾಂತರೊದ ಆರೋಪೊಲು ಬಾರೀ ಗಾತಿದ ಆದಿತ್ತ್ದ್, ಈ ಬಗೆಟ್ ಉನ್ನತ ಮಟ್ಟೊದ ಜಡ್ತೆ ನಡಪಾವ ಪನ್ದ್ ಟಾಟಾ ಸನ್ಸ್ ಅಧ್ಯಕ್ಷೆ ಎನ್. ಚಂದ್ರಶೇಖರನ್ ತೆರಿಪಾದೆರ್.
ಮಹಾರಾಷ್ಟ್ರದ ನಾಸಿಕ್ಡ್ ಇಪ್ಪುನ ಟಿಸಿಎಸ್ ಕಚೇರಿದ ಎಣ್ಮ ಪೊಂಜೊವು ಉದ್ಯೋಗಿಲು ಅಕ್ಲೆನ ಒಟ್ಟುಗು ಬೇಲೆ ಮಲ್ತೊಂದಿತ್ತಿನಕಲೆನ ಮಿತ್ತ್ ಲೈಂಗಿಕ ದೌರ್ಜನ್ಯ ಬೊಕ್ಕ ಧಾರ್ಮಿಕ ಮತಾಂತರೊಗು ಒತ್ತಾಯ ಮಲ್ದಿನ ಆರೋಪ ಮಲ್ತಿತ್ತೆರ್. ಮದಿಮೆ ಆಪಿನ ಪಾತೆರ ಕೊರ್ದು ದೈಹಿಕ ಸಂಬಂಧ ಬುಲೆಪಾದ್ ದಗೆ ಮಲ್ತ್ದೆರ್ ಪನ್ದ್ ಪೊಂಜೊವು ಒರ್ತಿ ಬರೆಪಾದಿನ ಒಯಿಲ್ದ ಆಧಾರೊಡು ಪೊಲೀಸೆರ್ ಜಡ್ತೆ ಮಲ್ಪುನಗ, ಈ ನೇಲ್ಯ ಜಾಲ ಬೊಲ್ಪುಗು ಬೈದ್ಂಡ್.
“ಈ ನಡಕೆದ ಬಗೆಟ್ ಕೇನ್ದ್ ಮಂಡೆಬೆಚ್ಚ ಬೊಕ್ಕ ಬಾರೀ ಬೆಸರ್ ಆಂಡ್. ಟಾಟಾ ಸಮೂಹ ತನ್ನ ಉದ್ಯೋಗಿಲೆರ್ದ್ ಇಂಚಿನ ಪೆರ್ಚಿ ಬೊಕ್ಕ ದುಷ್ಕೃತ್ಯೊಗು ಏಪೊಗುಲಾ ಸೈರನೆ ತೋಜಾವುಜಿ” ಪನ್ದ್ ಚಂದ್ರಶೇಖರನ್ ಪನ್ತೆರ್. ಪ್ರಕರಣೊದ ಸತ್ಯಾಸತ್ಯತೆ ನಾಡ್ಪತ್ಯೆರ ಕಂಪೆನಿದ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಆರತಿ ಸುಬ್ರಮಣಿಯನ್ ಮೆರೆನ ಮುತಾಲಿಕೆಡ್ ಜಡ್ತೆ ಮಲ್ಪೆರ ನಿರ್ಧಾರ ಮಲ್ತ್ದೆರ್.
ಈ ಪ್ರಕರಣೊಗು ಸಂಬಂಧಿತ್ದ್ ಪೊಲೀಸೆರ್ ಎಣ್ಮ ಎಫ್ಐಆರ್ ದಾಕಲ್ತೊಂದಿತ್ತ್ದ್, ಏಳ್ ಜನನ್ ಕೈದ್ ಮಲ್ತ್ದೆರ್. ಕೈದಾತಿನಕಲೆನ್ ಆಸಿಫ್ ಅನ್ಸಾರಿ, ಶಫಿ ಶೇಖ್, ಶಾರುಖ್ ಖುರೇಷಿ, ರಜಾ ಮೆಮನ್, ತೌಸಿಫ್ ಅತ್ತಾರ್, ಡ್ಯಾನಿಶ್ ಶೇಖ್ ಬೊಕ್ಕ ಒರ್ತಿ ಪೊಂಜೊವು ಪನ್ದ್ ಗುರ್ತ ಪತ್ತ್ದೆರ್. ಪ್ರಕರಣೊದ ಗಾತಿನ್ ತೂದು ಮಹಾರಾಷ್ಟ್ರ ಪೊಲೀಸೆರ್ ವಿಶೇಷ ಜಡ್ತೆ ಕೂಟ (SIT) ಉಂಡು ಮಲ್ತ್ದೆರ್.
“ಆರೋಪಿಲೆನ ಮಿತ್ತ್ ಪ್ರಾಥಮಿಕ ಕ್ರಮ ಗೆತೊಂದಾತಂಡ್. ನಡತೊಂದುಪ್ಪುನ ಜಡ್ತೆಗ್ ಕಂಪೆನಿ ಪತ್ತ ಸಹಕಾರ ಕೊರೊಂದುಂಡು. ತಪ್ಪಿತಸ್ಥೆರ್ ಪನ್ದ್ ಸಾಬೀತಾಯಿನಕಲೆನ ಮಿತ್ತ್ ಕಠಿಣ ಕಾನೂನು ಕ್ರಮ ಗೆತೊನುವ,” ಪನ್ದ್ ಚಂದ್ರಶೇಖರನ್ ಪಾತೆರ ಕೊರ್ತೆರ್.