ಕಾಸ್‌ದ ಆಸೆಡ್ ದೋಸ್ತಿನ ತರೆಕ್ ಕಲ್ಲ್ ತುಂಬುದ್ ಪಾಡ್ದ್ ಕೆರ್ಪುನ ಪುನೆಪು: ಮಣಿಪಾಲಡ್ ಪದ್ದೈ ಬಂಗಾರ್ ಲಕ್ಕಾಯಿನಾಲ್ ಅರೆಸ್ಟ್

Last updated on May 21st, 2026 at 08:39 am

ಮಣಿಪಾಲ, ಮೇ. 21: ಮಣಿಪಾಲದ ಶಾಂತಿನಗರದ ಬಾಡಾಯಿದ ಅದೆಟ್ ಅಂಕೋಲಾ ಮೂಲೊದ ಯೋಗೀತಾ (23) ಪನ್ಪಿನ ಪೊಣ್ಣನ್ ಕೆರ್ಯೆರೆ ತೂದು, ಪದ್ದೈ ಬಂಗಾರ್ ಕನ್ಡ್‌ದಿನ ರಹಸ್ಯ ಪ್ರಕರಣೊಗು ಮಣಿಪಾಲ ಪೊಲೀಸೆರ್ ಪಿರಿಕಟ್ಟ್ ಮಲ್ತ್‌ದೆರ್. ಯೋಗೀತಾನ ಬರಿತ ಅದೆಟೇ ಇತ್ತಿನ ಆಲೆನ ಪಾಸಾಡಿಯೇ ಈ ಭೀಕರ ಕೃತ್ಯ ಮಲ್ತಿನ ಆರೋಪಡ್ ಕೈದಾತಲ್. ಅಂಕೋಲಾ ತಾಲೂಕ್‌ದ ಖೇಣಿ ಬಾವಿಕೇರಿ ಗ್ರಾಮೊದ ನಿವಾಸಿ ಸುಷ್ಮಾ ಅಣ್ಣಪ್ಪ ನಾಯ್ಕ (31) ಕೈದಾತಿನ ಆರೋಪಿ ಪನ್ದ್ ಗುರ್ತ ಪತ್ತ್‌ದೆರ್.

ಯೋಗೀತಾ ಬೊಕ್ಕ ಇರ್ವೆರ್ ದೋಸ್ತಿಯರ್ಲು ಶಾಂತಿನಗರದ ಬಾಡಾಯಿದ ಇಲ್ಲಡ್ ಇತ್ತೆರ್. ಮೇ 12 ತಾನಿ ಆರೆನ ರೂಮ್‌ಮೇಟ್‌ನಕುಲು ರಾತ್ರೆದ  ಶಿಫ್ಟ್‌ದ ಬೇಲೆಗ್ ಪೋದಿತ್ತೆರ್ . ಮೇ 13ತಾನಿ ಬುಧವಾರ ಕಾಂಡೆ ಅಕುಲು ಬೇಲೆ ಮುಗಿತ್‌ದ್ ರೂಮ್‌ಗ್ ಪಿರ ಬನ್ನಗ, ಯೋಗೀತಾ ತರೆಕ್ ಗಾತಿದ ಗಡಿಕುಲಾದ್ ನೆತ್ತೆರ್‌ದ ಮಡುಟು ಬೂರ್ದಿನೆನ್ ತೂತೆರ್. ಅಂಚೆನೇ ರೂಮ್‌ಡ್ ಇತ್ತಿನ ಬಂಗಾರ್‌ದ ಕಂಟಿ ಬೊಕ್ಕ ಕೆಬಿತ ನಾಪತ್ತೆ ಆದಿತ್ತ. ಏರೋ ಸಿಮೆಂಟ್ ಬ್ಲಾಕ್‌ಡ್ ಆಕ್‌ದ್ ಬಂಗಾರ್ ಕನ್ಡ್‌ದೆರ್ ಪನ್ದ್ ಮಣಿಪಾಲ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್.

ಮಣಿಪಾಲ ಪೊಲೀಸ್ ನಿರೀಕ್ಷಕೆ (ಸಿಪಿಐ) ಮಹೇಶ್ ಪ್ರಸಾದ್ ಮುತಾಲಿಕೆದ ವಿಶೇಷ ಕೂಕ ಜಡ್ತೆಗ್ ಜತ್ತ್‌ದ್ಂಡ್. ಅಲ್ಪದ ಸುತ್ತಮುತ್ತೊದ ಸಿಸಿಟಿವಿ ಫೂಟೇಜ್ ಪರಿಶೀಲನೆ ಬೊಕ್ಕ ಸ್ಥಳೀಯೆರೆ ವಿಚಾರಣೆರ್ದ್ ಬೊಕ್ಕ ಪೊಲೀಸೆರೆಗ್ ಯೋಗೀತಾನ ಬರಿತ ರೂಮ್‌ದ ಸುಷ್ಮಾನ ಮಿತ್ತ್ ಸಂಶಯ ಬೈದ್ಂಡ್. ಆಲೆನ್ ವಶೊಕು ಗೆತೊಂದು ವಿಚಾರಣೆ ಮಲ್ಪುನಗ ಕಾಸ್‌ದ ಆಸೆಗ್ ಆಲೇ ಈ ಕೃತ್ಯ ಮಲ್ದಿನೆನ್ ಒತ್ತೊಂದಲ್.

ಇಂಚ ಮಲ್ಪೆರ ನೆವನ ದಾದ?
ಪೊಲೀಸ್ ಜಡ್ತೆದ ಪ್ರಕಾರ, ಆರೋಪಿ ಸುಷ್ಮಾಗ್ ಕಾಸ್‌ದ ಬಾರೀ ತೊಂದರೆ ಇತ್ತ್ಂಡ್. ಕರಿನ 3 ವರ್ಸೊರ್ದಿಂಚಿ ಆಲ್ ಬೆನ್ದಿನ ಕಾಸ್ ಆಲೆನ ಕರ್ಚಿಗೇ ಆಪೆದಿನೆರ್ದಾವರ ಊರ್‌ಡಿತ್ತಿನ ಅಪ್ಪೆಅಮ್ಮಗ್ ಕಾಸ್ ಕಡಪುಡ್ಯೆರ ಆಪೆದಿಜಿ. ಅಂಚಾದ್ ಪಿಸ್‌ರ್‌ಡ್ ಇಲ್ಲದಕುಲು, ಬೇಲೆ ಬುಡ್ದು ಊರ್‌ಗ್ ಪಿರ ಬರ್ಯೆರ ಪನೊಂದಿತ್ತೆರ್. ಇಲ್ಲದಕಲೆಗ್ ಕಾಸ್ ಕಡಪುಡ್ನ ಅನಿವಾರ್ಯತೆಡ್ ಇತ್ತಿನ ಸುಷ್ಮಾ, ತನ್ನ ದೋಸ್ತಿ ಯೋಗೀತಾನ ಬಂಗಾರ್‌ದ ಚೈನ್ ಬೊಕ್ಕ ಕೆಬಿತ ಬೆಂಡ‌ನ್ ಲಕ್ಕಾಯೆರ ಪ್ಲಾನ್ ಮಲ್ತ್‌ದಲ್.

ಆ ಪ್ರಕಾರ ಮೇ 12ತ ರಾತ್ರೆ 9:30ತ  ಅಂದಾಜಿಗ್ ಸುಷ್ಮಾ, ಯೋಗೀತಾನ ರೂಮ್‌ಗ್ ಬತ್ತ್‌ದ್ ಆಲೆನ ಒಟ್ಟುಗೇ ಜೆತ್ತಿತ್ತಲ್. ಮೇ 13ತ ಪುಲ್ಯ 4:30ತ ಅಂದಾಜಿಗ್ ಯೋಗೀತಾ ಎಡ್ಡೆ ನಿದ್ರೆಡ್ ಇಪ್ಪುನಗ, ಸುಷ್ಮಾ ದುಂಬೇ ರೂಮ್‌ಡ್ ದೆಂಗಾದ್ ದೀದಿತ್ತಿನ ಕಾಂಕ್ರೀಟ್ ಹಾಲೋ ಬ್ಲಾಕ್ (ಸಿಮೆಂಟ್ ಕಲ್ಲ್) ಡ್ ಯೋಗೀತಾನ ತರೆಕ್ ಜೋರುಡು ಆಕ್‌ದಲ್. ಯೋಗೀತಾಗ್ ಮತಿ ತತ್ತಿನೇ ಆಲೆನ ಕೆಕ್ಕಿಲ್‌ಡ್ ಇತ್ತಿನ ಬಂಗಾರ್‌ದ ಮಾಲೆ ಬೊಕ್ಕ ಕೆಬಿತೆನ್ ಲಕ್ಕಾದ್, ಏರೆಗ್ಲಾ ಅನುಮಾನ ಬರಂದಿಲೆಕ ತನ್ನ ಅದೆಕ್ ಪೋದು ಜೆತ್ತ್‌ದಲ್.

ಆಸ್ಪತ್ರೆಗ್ ಗೋಡ್ಯಾನಗಲಾ ನಾಟಕ!

ಕಾಂಡೆ ಯೋಗೀತಾನ ರೂಮ್‌ಮೇಟ್‌ನಕುಲಾಯಿನ ಮೇಘಾ ಗೌಡ, ಗಗನಾ ಬೊಕ್ಕ ನಾಗರತ್ನ ಬೇಲೆ ಮುಗಿತ್‌ದ್ ಪಿರ ಬನ್ನಗ ಯೋಗೀತಾನ ಸ್ಥಿತಿ ತೂದು ಕಲ್ಕ್‌ದೆರ್. ಈ ಪೊರ್ತುಡು ದಾಲ ತೆರಿಯಂದಿನಕಲೆನ ಲೆಕ ತನ್ನ ರೂಮ್‌ರ್ದ್ ಪಾರೊಂದು ಬತ್ತಿನ ಸುಷ್ಮಾ, ಅಕಲೆನ ಒಟ್ಟುಗು ಕೂಡೊಂದು ಯೋಗೀತಾನ್ ಮಣಿಪಾಲ ಆಸ್ಪತ್ರೆಗ್ ದಾಕಲ್ಪೆರ ಸಕಾಯ ಮಲ್ತ್‌ದ್, ಪೊಲೀಸೆರೆ ಸಾದಿ ತಪ್ಪಾಯೆರ ಬುಲ್ಪುನ ನಾಟಕ ಮಲ್ತ್‌ದಲ್ ಪನ್ದ್ ಜಡ್ತೆಡ್ ತೆರಿದ್ ಬೈದ್ಂಡ್.