Last updated on May 2nd, 2026 at 01:57 pm
ಬೆಂಗಳೂರ್: ಇನಿ (ಮೇ 2) ದೇಶೊದ ಕೋಟಿಗಟ್ಲೆ ಮೊಬೈಲ್ ಫೋನ್ಲೆಗ್ ಒರರ್ದ್ ಒರಾನೆ ‘ಎಮರ್ಜೆನ್ಸಿ ಅಲರ್ಟ್’ ಮೆಸೇಜ್ ಬೈದ್ಂಡ್. ಸೈಲೆಂಟ್ ಮೋಡ್ಡ್ ಇತ್ತಿನ ಫೋನ್ಲುಲಾ ಜೋರು ಸೌಂಡ್ ಮಲ್ತ್ದ್ ವೈಬ್ರೇಟ್ (Vibrate) ಆತಿನೆರ್ದಾವರ ಎಚ್ಚಿನಕುಲು ಪೋಡಿದಿನವು ಸಹಜ. ಆಂಡ, ಸಾರ್ವಜನಿಕೆರ್ ಪೋಡ್ಯುನ ಅಗತ್ಯ ಇಜ್ಜಿ. ಇಂದು ಕೇಂದ್ರ ಸರ್ಕಾರ ಪೊಸತಾದ್ ಜಾರಿ ಮಲ್ದಿನ ‘ಸೆಲ್ ಬ್ರಾಡ್ಕಾಸ್ಟ್’ (Cell Broadcast) ವ್ಯವಸ್ಥೆದ ಅಧಿಕೃತ ಪರೀಕ್ಷೆ, ಆತೇ..
ಅಮಿತ್ ಶಾ ಮೆರೆರ್ದ್ ಅಧಿಕೃತ ಚಾಲನೆ:
ಕೇಂದ್ರ ಗೃಹ ಸಚಿವೆ ಅಮಿತ್ ಶಾ ಬೊಕ್ಕ ಸಂವಹನ ಸಚಿವೆ ಜ್ಯೋತಿರಾದಿತ್ಯ ಸಿಂಧಿಯಾ ಮೊಕುಲು ಇನಿ ದೆಲ್ಲಿಡ್ ಈ ಸ್ವದೇಶಿ ವಿಪತ್ತು ಸಂವಹನ ವ್ಯವಸ್ಥೆನ್ ಅಧಿಕೃತವಾದ್ ಉದಿಪನ ಮಲ್ತ್ದೆರ್. ಭಾರತೊದ 36 ರಾಜ್ಯೊಲು ಬೊಕ್ಕ ಕೇಂದ್ರಾಡಳಿತ ಪ್ರದೇಶೊಲೆನ ರಾಜಧಾನಿಲೆಡ್ ಇನಿ ಈ ಪರೀಕ್ಷಾರ್ಥ ಮೆಸೇಜ್ ಕಡಪುಡ್ದೆರ್.
ದಾದ ಉಂದು ‘ಸಚೇತ್’ (SACHET) ವ್ಯವಸ್ಥೆ?
ಈ ತಂತ್ರಜ್ಞಾನೊನು ದೂರಸಂಪರ್ಕ ಇಲಾಖೆ (DoT) ಬೊಕ್ಕ ಸಿ-ಡಾಟ್ (C-DOT) ಸಂಸ್ಥೆ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರೊದ (NDMA) ಒಟ್ಟುಗು ಬುಲೆಪಾದ್ಂಡ್. ಇಂದು ಇಂಟರ್ನೆಟ್ ಅತ್ತ್ಂಡ ನೆಟ್ವರ್ಕ್ದ ಮಿತ್ತ್ ತಾಂಗ್ದಿಜ್ಜಿ. ಒಂಜಿ ಜಾಗೆದ ಮಾತಾ ಮೊಬೈಲ್ ಟವರ್ಲೆನ ಮುಕೇನ ಒಂಜೇ ಪೊರ್ತುಡು ಮೆಸೇಜ್ ಕಡಪುಡುಂಡು. ಭೂಕಂಪ, ಸುನಾಮಿ, ಚಂಡಮಾರುತ, ತೆಡಿಲ್ಮೆಂಚಿ ಅತ್ತ್ಂಡ ಗ್ಯಾಸ್ ಲೀಕ್ದಂಚಿನ ತುರ್ತದ ಪೊರ್ತುಡು ಜನೊಕ್ಲೆಗ್ ಕಾಲಿ ಒಂತೆ ಸೆಕೆಂಡ್ದುಲಯಿ ಎಚ್ಚರ್ಗೆ ಕೊರ್ಪಾದ್ ಸುರಕ್ಷಿತ ಜಾಗೆಗ್ ಪೋಯೆರ ಪೊರ್ತು ಮಲ್ತ್ ಕೊರ್ಪುನ ಉದ್ದೇಶೊಡು ಮಲ್ತ್ದೆರ್