Last updated on May 4th, 2026 at 08:39 am
ಕಾರ್ಲ, ಮೇ. 04: ಆಸ್ತಿ ವಿಚಾರೊಡು ಮೆಗ್ಯೆನೇ ತನ್ನ ಪಲಯನ್ ಕೆರ್ತಿನ ನಡಕೆ ಕಾರ್ಲ ಮಿತ್ತಬೊಟ್ಟು ಹಿರಿಯಂಗಡಿ ಪನ್ಪಿನಲ್ಪ ಶನಿವಾರ ರಾತ್ರೆ ನಡತ್ದ್ಂಡ್.
ತೀರ್ದಿನಾರೆನ್ ರಿಚರ್ಡ್ ಡಿ’ಸೋಜಾ ಪನ್ದ್ ಗುರ್ತ ಪತ್ತ್ದೆರ್. ಆರೆನ ಬೊಡೆದಿ ಜೆಸಿಂತಾ ಡಿ’ಸೋಜಾ ಬರೆಪಾದಿನ ಒಯಿಲ್ದ ಪ್ರಕಾರ, ಮೇ 2 ತಾನಿ ಬಯ್ಯ 6 ಗಂಟೆದ ಅಂದಾಜಿಗ್ ಈ ನಡಕೆ ನಡತ್ದ್ಂಡ್.
ರಿಚರ್ಡ್ ಬೊಕ್ಕ ಆರೆನ ಮೆಗ್ಯೆ ಹೆರಾಲ್ಡ್ ಡಿ’ಸೋಜಾ ಮೊಕಲೆಗ್ ಇಲ್ಲ್ ಬೊಕ್ಕ ಆಸ್ತಿದ ಬಗೆಟ್ ಏಪೊಲ ಲಡಾಯಿ ಆಪೆದ್ಂಡ್. ಮಿತ್ತಬೊಟ್ಟುಡು ಅಕಲೆನ ಆಸ್ತಿದ ಬಗೆಟ್ ಸುರು ಆಯಿನ ಪಾತೆರ ಮೆಯಿಕ್ ಕೈ ಪಾಡೊನುನಡೆ ಮುಟ್ಟ ಪೋತುಂಡು. ಆ ಪೊರ್ತುಡು ಹೆರಾಲ್ಡ್ ಡಿ’ಸೋಜಾ ಮೇರ್ ಮರತ ರೀಪ್ಡ್ ರಿಚರ್ಡ್ ಗ್ ಆಕ್ದ್ ಕೆರ್ತೆರ್ ಪನ್ದ್ ಆರೋಪ ಮಲ್ತ್ದೆರ್. ಮೇ 3 ತಾನಿ ದಾಕಲಾತಿನ ಒಯಿಲ್ದ ಆಧಾರೊಡು ಕಾರ್ಲ ಪೇಂಟೆ ಪೊಲೀಸೆರ್ ಪ್ರಕರಣ ದಾಕಲ್ತೊಂದೆರ್.
ಡಿವೈಎಸ್ಪಿ ವಿಜಯಪ್ರಸಾದ್ ಕೆಎಸ್ಪಿಎಸ್ ಮೆರೆನ ಮಾರ್ಗದರ್ಶನೊಡು ಸಿಪಿಐ ಅಜಮತ್ ಅಲಿ (ಕಾರ್ಲ ನಗರ ಸ್ಟೇಶನ್ ಪ್ರಭಾರಿ ಪಿಐ) ಮುತಾಲಿಕೆಡ್ ಪಿಎಸ್ಐ ಪ್ರಸನ್ನ ಎಂ.ಎಸ್., ಪಿಎಸ್ಐ ಮುರಳೀಧರ ನಾಯ್ಕ್, ಪಿಎಸ್ಐ ಶಿವಕುಮಾರ್, ಎಎಸ್ಐ ಶೇಖರ್ ನಾಯ್ಕ್, ಎಎಸ್ಐ ಮೂರ್ತಿ, ರಂಜಿತ್, ಶ್ರೀನಿವಾಸ್, ಮಹಾಂತೇಶ್, ಗೋಪಾಲಕೃಷ್ಟ, ಗಜಾನಾಯ್ಕ್ ಶಶಿ, ಸಂತೋಷ್ ಆರೋಪಿನ್ ಯಶಸ್ವಿಯಾದ್ ಕೈದ್ ಮಲ್ತ್ದೆರ್.