Last updated on June 17th, 2026 at 09:42 am
ಬಂಟ್ವಾಳ: ಒಂಜಿ ರಡ್ಡ್ ದಿನೊರ್ದಿಂಚಿ ಉಸಾರ್ ತತ್ತ್ದ್ ಇತ್ತಿನ ಬಂಟ್ವಾಳ ಎಸ್.ವಿ.ಎಸ್. ದೇವಳ ಶಾಲೆದ ಯು.ಕೆ.ಜಿ. ವಿದ್ಯಾರ್ಥಿನಿ ಅಲ್ಲಿಪಾದೆ ಅನೇಜ ನಿವಾಸಿ ಹರ್ನಿಕಾ (5) ಪಲಿಪಂದೆ ಜೂ.16 ತಾನಿ ತೀರ್ಯಲ್.
ಶುಕ್ರವಾರ ಶಾಲೆಗ್ ಪೋದಿತ್ತಿನ ಬಾಲೆ, ಉಸಾರ್ ಇತ್ತಲ್. ಸನಿಯಾರ ಜ್ವರ ಕಾಯೊಂದಿತ್ತ್ದ್ ಡಾಕ್ಟ್ರೆನ ಪಾತೆರೊದ ಪ್ರಕಾರ ಕುಡ್ಲದ ಆಸ್ಪತ್ರೆಗ್ ಲೆತೊಂದು ಪೋತೆರ್. ಮರ್ದ್ ಪಲಿಪಂದೆ ಬಾಲೆ ಅಂಗಾರೆ ಕಾಂಡೆ ತೀರ್ದಲ್. ಪ್ರಜ್ವಲ್ ಬೊಕ್ಕ ಛಾಯಾ ದಂಪತಿಗ್ ಹರ್ನಿಕಾ ಒರ್ತಿಯೇ ಮಗಲ್.
ಇಂಚಿಪ ದಂಪತಿ ಬಂಟ್ವಾಳಡ್ ಕುಲ್ಲುದಿತ್ತೆರ್. ಬಾಲೆ ಶಾಲೆಗ್ ಅಲ್ಲಿಪಾದೆದ ಅಜ್ಜಿ ಇಲ್ಲರ್ದ್ ಪೋದು ಬರೊಂದಿತ್ತಲ್.
ಜನವರಿಡ್ ರಿಕ್ಷಾಡ್ ಅಲ್ಲಿಪಾದೆರ್ದ್ ಶಾಲೆಗ್ ಬರೊಂದಿತ್ತಿನ ಪೊಣ್ಣಗ್ ರಿಕ್ಷಾ ಕಬ್ಬೆ ಬೂರ್ದು ಗಡಿಕುಲಾದಿತ್ತ. ಬೊಕ್ಕ ಮರ್ದ್ ಮಲ್ತ್ದ್ ಗುಣ ಆದಿತ್ತ್ಂಡ್.
ಪೊಣ್ಣು ತೀರ್ದಿನ ಬಗೆಟ್ ಮಾಧ್ಯಮೊಲೆಡ ಪಾತೆರ್ನ ಬಂಟ್ವಾಳ ತಾಲೂಕ್ ವೈದ್ಯಾಧಿಕಾರಿ ಡಾ. ಅಶೋಕ್ ಕುಮಾರ್ ರೈ ಮೇರ್, ಜ್ವರಟ್ ಅಡ್ಮಿಟ್ ಆದಿತ್ತಿನ ಬಾಲೆಗ್ ಸರ್ರೊಡು ಸೋಡಿಯಂ ಪೊಟಾಶಿಯಂ ದ ಕುಂದೆಲ್ ಇತ್ತ್ಂಡ್. ಅಂಚಾದ್ ಮೈಸರಿ ಕುಡಲಾ ತೆಟ್ಟೊಂದು ಪೋತುಂಡು ಪನ್ದ್ ಬಾಲೆನ್ ಅಡ್ಮಿಟ್ ಮಲ್ದಿನ ಪ್ರೈವೇಟ್ ಆಸ್ಪತ್ರೆರ್ದ್ ಒಲವು ತಿಕ್ಕ್ದ್ಂಡ್ ಪನ್ದ್ ಪನ್ಡೆರ್.
ಮಾಜಿ ಸಚಿವೆ ಬಿ.ರಮಾನಾಥ ರೈ ಸೇರ್ದ್ ಗಣ್ಯೆರ್ ಬತ್ತ್ದ್ ಸಂತಾಪ ತೂಪಾಯೆರ್. ತೀರ್ದಿನ ಬಾಲೆದ ಗೌರವಾರ್ಥ ಬಂಟ್ವಾಳ ಎಸ್.ವಿ.ಎಸ್. ದೇವಳ ಆಂಗ್ಲ ಮಾಧ್ಯಮ ಶಾಲೆಗ್ ರಜೆ ಕೊರ್ದಿತ್ತೆರ್.