Last updated on June 18th, 2026 at 09:33 am
ಕುಡ್ಲ, ಜೂ.18: ಮಂಗಳೂರು ಮಹಾನಗರ ಪಾಲಿಕೆದ (MCC) ಅಧಿಕಾರಿಲೆನ ಜಬದರಿದಾಂತಿನೆಕ್ ಅಂಚೆನೇ ಗೋಸ್ಮರಿಗ್ ಕುಡ್ಲದ ನಾಗರಿಕೆರ್ ಭಾರಿ ಬಿಲೆ ಕಟ್ಟುಲೆಕ ಆತ್ಂಡ್. ಪಾಲಿಕೆರ್ದ್ ಸಪ್ಲೈ ಆತಿನ ಕಲುಷಿತ ಪರ್ಪಿನ ನೀರ್ ಪರ್ದ್ ಪೇಂಟೆದ ನೂದೆರ್ದ್ಲಾ ಎಚ್ಚ ಇಲ್ಲದಕುಲೆಗ್ ಬಾರೀ ಆರೋಗ್ಯ ಸಮಸ್ಯೆ ತೋಜಿದ್ ಬೈದ್ಂಡ್. ಜನೊಕ್ಲೆನ ಜೂವೊಡು ಅಧಿಕಾರಿಲು ಗೊಬ್ಬೊಂದುಲ್ಲೆರ್ ಪನ್ದ್ ಸಾರ್ವಜನಿಕೆರ್ ಭಾರಿ ಆಕ್ರೋಶ ತೋಜಾದೆರ್. ಕುಡ್ಲ ಪೇಂಟೆದ ಬಿಜೈ ನ್ಯೂರೋಡ್ ಬೊಕ್ಕ ಬಟ್ಟಗುಡ್ಡೆ ಭಾಗೊಡು ಕರಿನ ಮೂಜಿ-ನಾಲ್ ವಾರೊರ್ದಿಂಚಿ ಇಲ್ಲ್ಲೆನ ಟ್ಯಾಪ್ಡ್ ತೆಟ್ಟ್ ನೀರ್ ಬರೊಂದುಂಡು. ಈ ನೀರ್ನ್ ಗಲಸ್ದಿನ ಪ್ರಾಯೊದಕುಲು ಬೊಕ್ಕ ಜೋಕುಲೆಗ್ ಉರ್ಚುನ ಕಕ್ಕುನ ಸುರುವಾತ್ಂಡ್. ಸುರುಟು ಇಂದು ಸಾಮಾನ್ಯ ಇನ್ಫೆಕ್ಷನ್ ಪನ್ದ್ ಎನ್ನ್ದಿತ್ತಿನ ಜನೊಕ್ಲೆಗ್, ಇಡೀ ಲೇಔಟ್ದ ನೂದೆರ್ದ್ಲಾ ಎಚ್ಚ ಇಲ್ಲ್ಲೆಡ್ ಉಂದೇ ಪರಿಸ್ಥಿತಿ ಇಪ್ಪುನ ತೆರಿನಗ ಪೋಡಿಗೆ ಕುಲ್ಲುದುಂಡು. ನನ ಇಂದೆಕ್ ಪಾಕ ಜನ ಆ್ಯಂಟಿಬಯೋಟಿಕ್ ಮಾತ್ರೆಲೆನ್ ಗೆತೊಂಡಲಾ ಆರೋಗ್ಯ ಅಂಕೆಗ್ ಬರಂದೆ ಬಚ್ಚಿದ್ ಪೋತೆರ್.
ಉಸಾರ್ ತಪ್ಪುನ ಪ್ರಕರಣೊಲು ಎಚ್ಚ ಆವೊಂದಿತ್ತಿಲೆಕನೆ ಲಕ್ಕೊಂಡಿನ ಮುಲ್ಪದ ನಾಗರಿಕೆರ್, ಆರೋಗ್ಯ ಇಲಾಖೆದ ಮುಕೇನ ನೀರ್ದ ಗುಣಮಟ್ಟೊದ ಪರೀಕ್ಷೆ ಮಲ್ಪಾದೆರ್. ವರದಿಡ್ ಬತ್ತಿನ ಸಂಗತಿ ಸಾರ್ವಜನಿಕೆರೆಗ್ ಬೊಕಲಾ ಪೋಡಿಕಟ್ಟಾದ್ಂಡ್. ಪಾಲಿಕೆ ಸಪ್ಲೈ ಮಲ್ತೊಂದುಪ್ಪುನ ಈ ನೀರ್ ‘ಪರ್ಯೆರ ಪನ್ಡಿನವೇ ಅತ್ತ್’ ಪನ್ದ್ ಲ್ಯಾಬ್ ವರದಿಡ್ ಅಧಿಕೃತವಾದ್ ದೃಢ ಆತ್ಂಡ್. ವರದಿ ಬತ್ತಿನೇ ಬೊಲ್ಚಿದ್ ಪೋತಿನ ಬಿಜೈ ನಿವಾಸಿಲು ಇತ್ತೆ ಪಿರಿಯ ಕಾಸ್ ಕೊರ್ದು ಪ್ಯಾಕೇಜ್ಡ್ ಡ್ರಿಂಕಿಂಗ್ ವಾಟರ್ (ಕ್ಯಾನ್ ನೀರ್) ಗೆತೊಂದು ಗಲಸೊಂದುಲ್ಲೆರ್.
ಪೇಂಟೆಡ್ ಪಾಕ ಕಡೆಟ್ ಪರ್ಪುನ ನೀರ್ದ ಪೈಪ್ಲೈನ್ ಬೊಕ್ಕ ಉಲಚರಂಡಿ (ಡ್ರೈನೇಜ್) ಪೈಪ್ಲೈನ್ಲೆನ್ ಒಟ್ಟೊಟ್ಟುಗೇ ಪಾಡ್ದೆರ್. ಇಂಚಿಪ ನಡತಿನ ಒವ್ವಾ ರಿಪೇರಿ ಬೇಲೆದ ಪೊರ್ತುಡು ಜೆಸಿಬಿ ಕೊಲ್ತ್ದಾ ಅತ್ತ್ ಪೈಪ್ ಪುಡದ್ ಪೋದಾ, ಡ್ರೈನೇಜ್ ನೀರ್ ಸೀದಾ ಪರ್ಪುನ ನೀರ್ದ ಪೈಪ್ಲೈನ್ಗ್ ತೋರ್ದಿನ ಬಗೆಟ್ ಸಂಶಯ ಉಂಡಾತ್ಂಡ್. ಈ ಬಗೆಟ್ ಪಾಲಿಕೆದ ತಾಂತ್ರಿಕ ಇಂಜಿನಿಯರ್ನಕುಲು ಇತ್ತೆನೇ ಪರಿಶೀಲನೆ ಮಲ್ತ್ದ್ ಲೀಕೇಜ್ ನಾಡ್ದ್ ಪತ್ತೊಡು ಪನ್ದ್ ಜನ ಒತ್ತಾಯ ಮಲ್ತ್ದೆರ್.
ಈತ್ ಮಾತಾ ಭೀಕರ ಪರಿಸ್ಥಿತಿ ಉಂಡಾದ್, ನೂದೆರ್ದ್ ಎಚ್ಚ ಜನ ಆಸ್ಪತ್ರೆ ಸೇರ್ಂಡಲಾ ಆರೋಗ್ಯ ಇಲಾಖೆದ ಸಿಬ್ಬಂದಿ ಬುಡ್ದು ಮಹಾನಗರ ಪಾಲಿಕೆದ ಒರಿಯೇ ಒರಿ ಅಧಿಕಾರಿಲಾ ಜಾಗೆಗ್ ಬೈದಿಜೆರ್ ಪನ್ದ್ ಸಂತ್ರಸ್ತೆರ್ ಆಕ್ರೋಶ ತೂಪಾದೆರ್. “ತಿರ್ವೆ ಕಟ್ಟ್ಜಿಂಡ, ನೀರ್ದ ಬಿಲ್ ಕಟ್ಟ್ಜಿಂಡ ಯಾರು, ಪಾಲಿಕೆ ಅಧಿಕಾರಿಲು ಇಲ್ಲ ಬಾಕಿಲ್ಗ್ ಬತ್ತ್ದ್ ಉಂತುವೆರ್. ಆಂಡ, ಈತ್ ಜನಕ್ ಅಕ್ಲೆನ ತೆಟ್ಟ್ ನೀರ್ ಪರ್ದ್ ಉರ್ಚುನ ಕಕ್ಕುನ ಸುರು ಆದ್ ಬಂಙ ಬರೊಂದಿತ್ತ್ಂಡಲಾ ಏರ್ಲಾ ಬತ್ತ್ದ್ ಮೋನೆ ತೋಜಾವೊಂದಿಜ್ಜೆರ್. ಮೊಕುಲು ಲಕ್ಷಗಟ್ಲೆ ಸಂಬಳ ಗೆತೊಂದು ಕಾಲಿ ಎಸಿ ರೂಮ್ಡ್ ಕುಲ್ಯೆರ ಇಪ್ಪುನನಾ? ಹೆಲ್ತ್ ಇನ್ಸ್ಪೆಕ್ಟರ್ ಬತ್ತ್ದ್ ಪ್ರತಿ ಇಲ್ಲದ ಸ್ಯಾಂಪಲ್ ಪರಿಶೀಲನೆ ಮಲ್ಪೊಡು. ಪಾಲಿಕೆ ಅಧಿಕಾರಿಲು ಕಾಲಿ ದುಡ್ಡು ಮಲ್ಪುನ ಬೇಲೆಡ್ ಬ್ಯುಸಿ ಆತೆರ್” ಪನ್ದ್ ಸಾರ್ವಜನಿಕೆರ್ ಮಾಧ್ಯಮೊಲೆನ ಎದುರು ಆಕ್ರೋಶ ತೂಪಾದೆರ್.