Last updated on June 13th, 2026 at 12:18 pm
ಬೆಂಗಳೂರ್, ಜೂ. 13: ಪಂಚ ದ್ರಾವಿಡ ಭಾಷೆಲೆಡ್ ಒಂಜಾದುಪ್ಪುನ ತುಳು ಭಾಷೆದ ಸಮಗ್ರ ಬುಲೆಚ್ಚಿಲ್ದ ಬಗೆಟ್ ವಿಶೇಷ ಕಾಳಜಿ ಕೊರ್ಪುನ ದಿಟ್ಟಿಡ್ ರಾಜ್ಯ ಸರಕಾರ ತುಳು ಅಭಿವೃದ್ಧಿ ನಿಗಮ ಉಂಡು ಮಲ್ಪೊಡು ಅಂಚೆನೇ ಕಾರ್ಲಡ್ ತುಳು ಭವನ ಕಟ್ಟೆರೆ ಅನುದಾನ ಬುಡುಗಡೆ ಮಲ್ಪೊಡು ಪನ್ದ್ ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್ ರೆಗ್ ಮುನಿಯಾಲ್ ಉದಯ ಶೆಟ್ರ್ ಓಲೆದ ಮುಕೇನ ಬಿನ್ನಪು ಮಲ್ತ್ದೆರ್.
ತುಳು ಭಾಷೆ, ಸಂಸ್ಕೃತಿ ಬೊಕ್ಕ ಪರಂಪರೆದ ಒರಿಪು ಬೊಕ್ಕ ಬುಲೆಚ್ಚಿಲ್ಗ್ ರಾಜ್ಯ ಸರ್ಕಾರೊದ ಕಡೆರ್ದ್ “ತುಳು ಅಭಿವೃದ್ಧಿ ಪ್ರಾಧಿಕಾರ”ನ್ ಬೇಗೊಡೇ ಉಂಡು ಮಲ್ಪೊಡು. ತುಳು ಭಾಷೆಗ್ ಸಾರಗಟ್ಲೆ ವರ್ಸೊದ ಪರತಿರಿ ಉಂಡು, ಲಕ್ಷಗಟ್ಲೆ ಜನೊಕ್ಲೆನ ಅಪ್ಪೆಬಾಸೆ ಆದುಂಡು. ಜಾಗತೀಕರಣೊರ್ದಾವರ ಪ್ರಾದೇಶಿಕ ಭಾಷೆಲೆನ ಗಲಕೆ ಕಮ್ಮಿ ಆವೊಂದುಪ್ಪುನ ಪೊರ್ತುಡು ತುಳು ಭಾಷೆದ ಸಂರಕ್ಷಣೆ ಬೊಕ್ಕ ಅಭಿವೃದ್ಧಿದ ಅಗತ್ಯತೆ ಎಚ್ಚ ಆತ್ಂಡ್.
ಯುನೆಸ್ಕೋ (UNESCO) ಲಾ ತುಳು ಭಾಷೆನ್ ಸಂರಕ್ಷಿಪೊಡಾಯಿನ ಭಾಷೆಲೆನ ಪಟ್ಟಿಡ್ ಪಾಡ್ದಿನೆರ್ದಾವರ, ತುಳು ಭಾಷೆದ ಒರಿಪುಗು ವಿಶೇಷ ಕ್ರಮ ಗೆತೊನುನ ಅತ್ಯಗತ್ಯ ಪನ್ದ್ ಮುನಿಯಾಲ್ ಉದಯ ಶೆಟ್ರ್ ಪನ್ಡೆರ್.
ಇಂದೆತ ಒಟ್ಟುಗು ಕಾರ್ಲ ತಾಲೂಕ್ಡ್ ತುಳು ಭವನ ಕಟ್ಟುನ ಬಗೆಟ್ಲಾ ಬಿನ್ನಪು ಸಂದಾದಿತ್ತ್ದ್, ತುಳು ಭಾಷೆ, ಸಾಹಿತ್ಯ, ಕಲೆ, ಸಂಸ್ಕೃತಿ ಬೊಕ್ಕ ಪರಂಪರೆನ್ ಒರಿಪಾವುನ ಉದ್ದೇಶೊಡು ತುಳು ಭವನ ಕಟ್ಟುನ ಅಗತ್ಯ ಆದುಂಡು. ಅಂಚಾದ್, ಒಡಿಪು ಜಿಲ್ಲೆ, ಕಾರ್ಲ ತಾಲೂಕ್ಡ್ ಸರ್ಕಾರೊದ ಕಡೆರ್ದ್ ಎಡ್ಡೆ ಜಾಗೆನ್ ಗೊತ್ತು ಮಲ್ತ್ದ್, ಅಗತ್ಯ ಅನುದಾನೊನು ಮಂಜೂರ್ ಮಲ್ತ್ದ್ ಬೇಗೊಡೇ ತುಳು ಭವನ ಕಟ್ಟಾಯೆರ ಮುಖ್ಯಮಂತ್ರಿಲೆಗ್ ಓಲೆದ ಮುಕೇನ ಬಿನ್ನಪು ಮಲ್ತೆರ್.
ಕರಿನ ವಿಧಾನಸಭಾ ಎಲೆಕ್ಷನ್ದ ಪೊರ್ತುಡು ಕಾಂಗ್ರೆಸ್ ಪ್ರಣಾಳಿಕೆಡ್ ತುಳು ಅಭಿವೃದ್ಧಿ ಪ್ರಾಧಿಕಾರೊದ ಪಾತೆರ ಕೊರ್ತುನೆನ್ ತುಳುವೆರ್ ಈ ಪೊರ್ತುಡು ನೆನೆಪು ಮಲ್ತೊನೊಡು.