Last updated on June 25th, 2026 at 01:52 pm
ತುಳುನಾಡ್ದ ಸಾಂಪ್ರದಾಯಿಕ ಆಚರಣೆಲೆಡ್ ಒಂಜಾಯಿನ ಕುಲೆಮದಿಮೆ ಕಾರ್ಯಕ್ರಮ ಪುತ್ತೂರ್ದ ಮುಂಡೂರ್ ಪನ್ಪಿನಲ್ಪ ನಡತ್ಂಡ್. ಪಾಕ ವರ್ಸೊಗು ದುಂಬು ತೀರ್ದಿನ ಆನಂದೆ ಬೊಕ್ಕ ಸರೋಜಾ ಪನ್ಪಿನಕ್ಲೆನ ಕುಲೆಕ್ ಶಾಂತಿ ತಿಕ್ಕಡ್ ಬೊಕ್ಕ ಅಕ್ಲೆನ ಕುಟುಮೊದ ದೋಷೊಲು ಮಾತ್ ಕಲೆಯಡ್ ಪನ್ಪಿ ಉದ್ದೇಶೊಡು ಈ ಕುಲೆಮದಿಮೆನ್ ಬಾರೀ ಶ್ರದ್ಧಾಭಕ್ತಿಡ್ ಮಲ್ತೆರ್. ಜೂವೊಡಿತ್ತಿನಕಲೆಗ್ ಎಂಚ ಮದಿಮೆ ಆಪುಂಡಾ ಅಂಚೆನೇ ಕುಲೆಕ್ಲೆಗ್ಲಾ ಮದಿಮೆ ನಡತ್ಂಡ್.
ಈ ಕುಲೆಮದಿಮೆ ಮಲ್ಪೆರೆ ಮುಖ್ಯ ನೆವವ ತೀರ್ದಿನ ಆನಂದೆರೆನ ಕುಟುಮಡ್ ಕರಿನ ಪಾಕ ಸಮೆರ್ದಿಂಚಿ ಜೋಕುಲಾವಂದಿನ, ಮದಿಮೆಗ್ ಅಡ್ಡ ಆಪಿನಂಚಿನ ಪಾಕ ಸಮಸ್ಯೆಲು ತೋಜಿದ್ ಬರೊಂದಿತ್ತ. ಈ ಬಂಙೊಗು ನೆವನ ಪಿನ್ದೊನರೆ ಜೋಯಿಸೆರೆನ ಪಾತೆರೊದ ಲೆಕ ‘ಪ್ರಶ್ನಾ ಚಿಂತನೆ’ ಮಲ್ತೆರ್. ಈ ಪ್ರಕ್ರಿಯೆಡ್, ತೀರ್ದಿನ ಆನಂದೆರೆಗ್ ಮದಿಮೆ ಆವಂದೆ ಆ ಕುಲೆ ಅತೃಪ್ತವಾದುಂಡು. ಅಂಚಾದ್ ಇಂಚಿನ ದೋಷೊಲು ತೋಜಿದ್ ಬರೊಂದುಲ್ಲ ಪನ್ದ್ ತೋಜಿದ್ ಬೈದ್ಂಡ್, ಅಂಚಾದ್ ಈ ಕುಲೆಕ್ ಮದಿಮೆ ಮಲ್ತ್ಂಡ ಮಾತಲಾ ಸಮ ಆಪುಂಡು ಪನ್ದ್ ಜೋಯಿಸೆರ್ ಪನ್ತೆರ್. ಈ ದೋಷೊಗು ಪಿರಿಕಟ್ಟ್ ಮಲ್ತ್ದ್, ತೀರ್ದಿನಕ್ಲೆನ ಕುಲೆಕ್ ಸದ್ಗತಿ ಅಂಚೆನೇ ಕುಟುಮೊಗು ಎಡ್ಡೆ ಆಯೆರ ಪೆರಿಯಾಕ್ಲು ಬೊಕ್ಕ ಕುಟುಮೊದಕ್ಲು ಈ ಮದಿಮೆ ಮಲ್ಪೆರ ನಿರ್ಧಾರ ಮಲ್ತೆರ್. ಆ ಪ್ರಕಾರ ಆನಂದೆರೆನ ಸೋದರಡ್ ಮಾಮು ಆಪಿನಾರೆನ ಮಗಲ್ ಸರೋಜಾ ಪನ್ಪಿನಾರೆನ ಒಟ್ಟುಗು ಆನಂದೆರೆನ ಮದಿಮೆ ನಡತ್ಂಡ್.
ಆನಂದೆರ್ ಬಾರಿಕೆ ತಿಮ್ಮಪ್ಪ ಬೊಕ್ಕ ಗಿರಿಜಾ ಮೊಕಲೆನ ಮಗೆ ಆದಿತ್ತ್ದ್, ಎಲ್ಯ ಪ್ರಾಯೊಡೇ ತೀರ್ದಿತ್ತೇರ್. ಅಂಚೆನೇ ಸರೋಜ ಮೇರ್ ಮುಂಡೂರ್ ಬದಿಯಡ್ಕ ಮುತ್ತಪ್ಪ ಬೊಕ್ಕ ದೇವಕಿ ಮೊಕಲೆನ ಮಗಲಾದಿತ್ತ್ದ್ ಮೇರ್ಲಾ ಎಲ್ಯೆಡೇ ತೀರ್ದಿತ್ತೆರ್. ಇರ್ವೆರ್ಲಾ ತೀರ್ದ್ ಸುಮಾರ್ 25 ವರ್ಸ ಕರಿವು. ಈ ರಡ್ಡ್ ಕುಲೆಕ್ಲೆಗ್ಲಾ ಮದಿಮೆ ಮಲ್ತ್ ಮುಕ್ತಿ ಕೊರ್ದು ಇರ್ವೆರೆ ಇಲ್ಲಡ್ ತೋಜೊಂದು ಬರೊಂದಿತ್ತಿನ ದೋಷೊಲೆಗ್ ಮುಕ್ತಿ ಮಲ್ತೊಂಡೆರ್. ಮದಿಮೆಗ್ ಬತ್ತಿನ ಬಿನ್ನೆರೆಗ್ ಮದಿಮೆದ ವನಸ್ದ ಅಟ್ಟನೆಲಾ ಆದಿತ್ತ್ಂಡ್.
ಮುಂಡೂರ್ ಬಾರಿಕೆಡ್ ನಡತಿನ ಈ ಕುಲೆಮದಿಮೆಗ್ ಕುಲೆಮದಿಮೆಡ್ ಪಾಕ ಗೇನ ಇಪ್ಪುನ ಧರ್ಮಪಾಲ ಶೇಣಿ ಮೇರ್ ಪೌರೋಹಿತ್ಯ ಮಲ್ತೆರ್.
ಉಂದು ಪನ್ರೆ ಮಾತ್ರ ಕುಲೆ ಮದಿಮೆ, ಆಂಡ ಮಾತಾ ಕಾರ್ಯಕ್ರಮೊಲಾ ಜೂವೊಡಿತ್ತಿನಕ್ಲೆನ ಮದಿಮೆದ ಲೆಕಾನೆ ನಡಪುಂಡು. ಪೊದು ತೂಪುನ, ನಿಶ್ಚಯ, ಮದ್ರೆಂಗಿ ಮಾತಲಾ ಇಪ್ಪುಂಡು. ಮದಿಮೆದಾನಿ ಮದಿಮಲ್ ಮದಿಮಯಗ್ ಕುಂಟುರ್ದ್ ಪತ್ತ್ದ್ ಜೋಡು ಮುಟ್ಟಲಾ ಪೊಸತೇ ಪಾಡುವೆರ್.