Last updated on July 15th, 2026 at 11:36 am
ಕೊಕ್ಕಡ, ಜು.15: ಸೌತಡ್ಕ ಅಂಗನವಾಡಿ ಕೇಂದ್ರೊಡು ಬೇತೆ ಜೋಕುಲೆನ ಒಟ್ಟುಗು ಗೊಬ್ಬೊಂದಿತ್ತಿನ ನಾಲ್ ವರ್ಸ ಪ್ರಾಯೊದ ಪೊಣ್ಣು ಬಾಲೆಗ್ ಉಚ್ಚು ತುಚ್ಚಿದಿನ ನಡಪು ಜುಲೈ 14 ತಾನಿ ನಡತ್ದ್ಂಡ್.
ಉಚ್ಚು ತುಚ್ಚಿನೆರ್ದಾವರ ಉಸಾರ್ ತತ್ತಿನ ಬಾಲೆನ್ ಅಪಗನೇ ಆಸ್ಪತ್ರೆಗ್ ದಾಕಲ್ತ್ದ್, ಬೊಕ್ಕ ಎಚ್ಚಿಗೆ ಮರ್ದ್ಗ್ ಕುಡ್ಲದ ಆಸ್ಪತ್ರೆಗ್ ಕಡಪುಡ್ದೆರ್. ಉಚ್ಚು ತುಚ್ಚಿನ ಬಾಲೆನ್ ಮಲ್ಲಿಗೆಮಜಲ್ ಪಲ್ಲಿದ ಅಧ್ಯಕ್ಷೆ ಸಿಯಾಬ್ ಮೆರೆನ ಮಗಲ್ ಫಾತಿಮತ್ ಸಹದಿಯಾ(4) ಪನ್ದ್ ಗುರ್ತ ಪತ್ತ್ದೆರ್.
ಒಲವುದ ಪ್ರಕಾರ ಫಾತಿಮತ್ ಸಹದಿಯಾ ಏಪೊಲ್ದ ಲೆಕ ಅಂಗನವಾಡಿಗ್ ಪೋದು ಬೇತೆ ಜೋಕುಲೆನ ಒಟ್ಟುಗು ಗೊಬ್ಬೊಂದಿತ್ತಲ್. ಈ ಪೊರ್ತುಡು ಅದೆತ ಉಲಯಿ ಜೋಕುಲೆನ ಗೊಬ್ಬುನ ಸಾಮಾನ್ದ ನಡುಟು ದೆಂಗ್ದಿತ್ತಿನ ಉಚ್ಚು ಬಾಲೆಗ್ ತುಚ್ಚಿದ್ಂಡ್ಗೆ. ಉಚ್ಚು ತುಚ್ಚಿನೇ ಬಾಲೆ ಜೋರು ಬುಲ್ಪರೆ ಪತ್ತ್ದಲ್, ಅವೆನ್ ತೂಯಿನ ಅಂಗನವಾಡಿ ಹೆಲ್ಪರ್ ಅಪಗನೇ ಪೊಣ್ಣನ ಇಲ್ಲದಕಲೆಗ್ ತೆರಿಪಾದೆರ್.
ನಡಪು ನಡತಿನ ಪೊರ್ತುಡು ಅಂಗನವಾಡಿದ ಟೀಚರ್ ಬಿ.ಎಲ್.ಓ. ಬೇಲೆಡ್ ಪಿದಯಿ ಪೋದಿತ್ತಿನೆರ್ದಾವರ ಕೇಂದ್ರೊಡು ಹೆಲ್ಪರ್ ಮಾತ್ರ ಇತ್ತೆರ್ ಪನ್ದ್ ತೆರಿದ್ ಬೈದ್ಂಡ್. ಪೊಣ್ಣನ್ ಅಪಗನೇ ಕೊಕ್ಕಡ ಸಮುದಾಯ ಆರೋಗ್ಯ ಕೇಂದ್ರೊಗು ಲೆತೊಂದು ಪೋದು ಕಡೀರ ಮರ್ದ್ ಮಲ್ತ್ದೆರ್.
ಬೊಕ್ಕ ಡಾಕ್ಟ್ರೆನ ಪಾತೆರೊದ ಪ್ರಕಾರ ಎಚ್ಚಿಗೆ ಮರ್ದ್ಗ್ ಪುತ್ತೂರ್ದ ಆಸ್ಪತ್ರೆಗ್ ದಾಕಲ್ತ್ದಿತ್ತ್ದ್, ಅಲ್ಪರ್ದ್ ಕುಡ್ಲದ ವೆನ್ಲಾಕ್ ಆಸ್ಪತ್ರೆಗ್ ಲೆತೊಂದು ಪೋದು, ಅಲ್ಪ ಐಸಿಯು ಡ್ ಮರ್ದ್ ನಡತೊಂದುಂಡು ಪನ್ದ್ ತೆರಿದ್ ಬೈದ್ಂಡ್.