Last updated on July 7th, 2026 at 09:49 am
ಸುಳ್ಯ, ಜು. 07: ‘ಸಂಕೊಲೆನ ಸರದಾರೆ’ ಪನ್ದೇ ಪುದರಾದಿತ್ತಿನ, ಪದ್ಮಶ್ರೀ ಪುರಸ್ಕೃತೆರ್, ಪೆರಿಯ ಸಾಮಾಜಿಕ ಕಾರ್ಯಕರ್ತೆರ್ ಅಂಚೆನೇ ಇಂಜಿನಿಯರ್ ಡಾ. ಗಿರೀಶ್ ಭಾರದ್ವಾಜ್ (76) ಮೇರ್ ಸುಳ್ಯದ ಪ್ರೈವೇಟ್ ಆಸ್ಪತ್ರೆಡ್ ಇನಿ ಅಂಗಾರೆ ಪುಲ್ಯ ತೀರ್ಯೆರ್.
ಕರಿನ ಕೆಲ ದಿನೊರ್ದಿಂಚಿ ಹೃದಯಸಂಬಂಧಿ ಸೀಕ್ಡ್ ನರೆಲೊಂದಿತ್ತಿನ ಆರೆನ್ ಆಸ್ಪತ್ರೆಗ್ ದಾಕಲ್ತ್ದಿತ್ತೆರ್. ಆಂಡ, ಮರ್ದ್ ಪಲಿಪಂದೆ ಇನಿ ಆರ್ ತೀರ್ಯೆರ್ ಪನ್ದ್ ತೆರಿದ್ ಬೈದ್ಂಡ್.
ಸಂಕೊಲೆನ ಸರದಾರೆ:
ಸುಳ್ಯ ತಾಲ್ಲೂಕ್ದ ಅರಂತೋಡು ದ ಗಿರೀಶ್ ಭಾರದ್ವಾಜ್ ಮೇರ್ ಗ್ರಾಮೀಣ ಭಾಗೊದ ಸಂಪರ್ಕ ಕ್ರಾಂತಿಗ್ ಪೊಸ ಪಜ್ಜೆ ದೀತಿನಾರ್. ತಾರ್, ತೋಡು, ಸುದೆ ಕಡಪೆರ ಸಮ ಸಂಪರ್ಕದಾಂತೆ ಕುದುರುದ ಲೆಕ ಆದಿತ್ತಿನ ದೇಶೊದ ಅವೇತೋ ಗ್ರಾಮೀಣ ಪ್ರದೇಶೊಲೆಗ್ ಮೇರ್ ಆಶಾಕಿರಣ ಆದಿತ್ತೆರ್. ಸರ್ಕಾರಿ ಅನುದಾನೊನು ಕಾಪಂದೆ, ಊರ್ದಕಲೆನ ಸಹಭಾಗಿತ್ವೊಡು ಬಾರೀ ಕಮ್ಮಿ ಕರ್ಚಿಡ್ ಸುಲಭಡ್ ಕಟ್ಟೆರೆ ಆಪುನ ನೇಲುಸಂಕೊಲೆನ್ (Suspension Bridges) ಕಟ್ಟಾದ್, ಗೆಂದ್ದ್ Bridgeman Of India ಪನ್ದೇ ಪುದರಾದಿತ್ತೆರ್ . ಕರ್ನಾಟಕ, ಕೇರಳ, ಆಂಧ್ರಪ್ರದೇಶ ಬೊಕ್ಕ ಒಡಿಶಾ ಸೇರ್ದ್ ದೇಶೊದ ಪಾಕ ಕಡೆಟ್ ಸುಮಾರ್ 140ರ್ದ್ಲಾ ಎಚ್ಚ ನೇಲುಸಂಕೊಲೆನ್ ಕಟ್ಟಾದಿನ ಪುಗರ್ತೆ ಈ ಪೆರ್ಮೆದ ತುಳುವಗ್ ಉಂಡು.
ಪದ್ಮಶ್ರೀ ಮಾನಾದಿಗೆ:
ಗ್ರಾಮೀಣ ಭಾಗೊದ ಮೆರೆನ ಈ ಮಾಮಲ್ಲ ಸಾಮಾಜಿಕ ಚಾಕಿರಿನ್ ತೂದು ಕೇಂದ್ರ ಸರ್ಕಾರ 2017ಟ್ ದೇಶೊದ ನಾಲನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿ ‘ಪದ್ಮಶ್ರೀ’ ಕೊರ್ದು ಮಾನಾದಿಗೆ ಮಲ್ತಿತ್ತ್ಂಡ್. ನೇಲುಸಂಕೊಲೆನ ಮುಕೇನ ಗ್ರಾಮೀಣ ಭಾರತೊನು ಒಂಜಿ ಮಲ್ತಿನ ಕೊಲಿಕ್ಕೆ ಒಂಜಿ ಕಡಿದ್ ಪೋಂಡು ಪನ್ದ್ ತುಳುನಾಡ ಜನೊಕುಲು ಕಣನೀರ್ ದೀತೆರ್.