ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ತುಳುಕಬಿತೆ ಪಂಥೊಗು ಕಬಿತೆಲೆಗ್ ಲೆಪ್ಪು

Last updated on July 24th, 2026 at 01:31 pm

ಜು. 24: ಇತ್ತೆದ ಡಿಜಿಟಲ್ ಕಾಲೊಡು ಇತ್ತೆದ ತಂತ್ರಜ್ಞಾನೊನು ಗಲಸೊಂದು, ಇತ್ತೆದ ಬೊಕ್ಕ ನನದ ತರೆಮಾರ್‌ಗ್ ತುಳುತ ಪಿರಾಕ್‌ದ ಗೇನ, ಅನುಭವ, ಸಾಹಿತ್ಯೊನು ಒರಿಪಾವುನ ದಿಟ್ಟಿಡ್ ಬೆನ್ನಿ ಬೆನೊಂದು, ಒಂಜಾತ್ ಸಂಶೋಧನೆಲೆನ್ ಮಲ್ತೊಂದು ತುಳುವಪ್ಪೆನ ಚಾಕಿರಿ ಮಲ್ತೊಂದುಪ್ಪುನ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ಈ ವರ್ಸೊದ ‘ತುಳುವ ಜವನೆರೆ ಆಯನೊ – ತುಳುನಾಡ್ ಕಾಂಕ್ಲೇವ್ 2026’ ದ ಲೆಕ್ಕೊಡು ‘ತುಳು ಕಬಿತೆ ಪಂಥೊ’ದ ಅಟ್ಟನೆ ಮಲ್ತ್‌ದೆರ್.

ತುಳುನಾಡ್ ಅಂಚೆನೇ ಬೇತೆ ಬೇತೆ ಕಡೆಟ್ ಇಪ್ಪುನ ತುಳುವೆರೆಗ್, ತುಳು ತೆರಿದಿನಕಲೆಗ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ಈ ಮುಕೇನ ಪಂಥೊಗು ಕಬಿತೆಲೆನ್ ಕಡಪುಡ್ಯೆರ ಲೆಪ್ಪು ಕೊರ್ತೆರ್.

ಕಬಿತೆ ಪಂಥೊದ ನಿಯಮೊಲು
– ಕಬಿತೆ ತುಳು ಭಾಷೆಡೇ ಇಪ್ಪೊಡು
– ಒವ್ವೇ ವಿಷಯೊದ ಮಿತ್ತ್ ಕಬಿತೆ ಬರೆಯೊಲಿ
– ಕಮ್ಮಿಡ್ ಪತ್ತ್ ಸಾಲ್ ಆಂಡಲಾ ಬೋಡು, ಐರ್ದ್ ಎಚ್ಚ ಏತ್ ಮಲ್ಲಲಾ ಬರೆಯೊಲಿ
– ತುಳು ಇಜಿಂಡ ಕನ್ನಡ ಲಿಪಿ ಗಲಸೊಲಿ
– ಇದಮುಟ್ಟ ಬೇತೆ ಪಂಥೊಡು ಇಜಿಂಡ ಬೂಕುಡು ಬತ್ತಿಪ್ಪರೆ ಬಲ್ಲಿ
– ಪದ ಕಡಪುಡರೆ ಅಕೇರಿದ ದಿನ : 9 ಆಗಸ್ಟ್ 2026
– ಪದ ಕಡಪುಡೊಡಾಯಿನ ನಂಬ್ರ: 7204813583

ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ತುಳುವೆರೆಗ್ ತುಳುಟ್ಲಾ ಓದುನ ಅವಕಾಶ ಮಲ್ತ್ ಕೊರೊಡು ಪನ್ಪಿ ದಿಟ್ಟಿಡ್ ತನ್ನ ಅಂಗಸಂಸ್ಥೆ ಪುಣ್ಣಮೆ ಪಬ್ಲಿಕೇಶನ್‌ದ ಮುಕೇನ ಪಾಕ ತುಳು ಮಸ್ತಿರೆಲೆನ್ ಬುಡುಗಡೆ ಮಲ್ತ್‌ದ್ಂಡ್. ಈ ವರ್ಸೊದ ತುಳುವ ಜವನೆರೆ ಆಯನೊ ತುಳುನಾಡ್ ಕಾನ್‌ಕ್ಲೇವ್ ಡ್ಲಾ ಎಡ್ಡೇನ ಗುಣಮಟ್ಟೊದ ಒಂಜಾತ್ ಮಸ್ತಿರೆಲೆನ್ ಬುಡುಗಡೆ ಮಲ್ತೊಂದುಲ್ಲ. ಆಯಿನಾತ್ ಎಚ್ಚಿಗೆ ಜನ ತುಳು ಓದುನ ಬರೆಪುನ ಅಭ್ಯಾಸೊನು ರೂಢಿ ಮಲ್ತೊನೊಡು, ಅಪ್ಪೆಬಾಸೆದ ಒರಿಪುಗು ಬೆನ್ನಿ ಬೆನೊಡು ಪನ್ದ್ ಪುಣ್ಣಮೆ ಪಬ್ಲಿಕೇಶನ್‌ದ ನಿದಯಂತೆರ್ ಪೃಥ್ವಿ ತುಳುವೆ ತುಳು ಸಮಾಚಾರ ಗ್ ಪನ್ಡೆರ್.