Last updated on July 8th, 2026 at 08:52 am
ಬೋಲ್ತೇರ್, ಜು. 08 : ಚುನಾವಣಾ ಆಯೋಗೊದ ಆದೇಶೊದ ಪ್ರಕಾರ ಸರಕಾರೊದ ಸೂಚನೆದ ಲೆಕ ಮತದಾರೆರೆ ಪಟ್ಟಿ ಪರಿಷ್ಕರಣೆ ಮಲ್ಪುನ ಕ್ಷೇತ್ರ ಕಾರ್ಯೊಡು ಇತ್ತಿನ ದಲಿತ ಬಿ.ಎಲ್.ಒ. (ಬೂತ್ ಲೆವೆಲ್ ಆಫೀಸರ್) ಒರ್ತಿಗ್ ಜಾತಿವಾದಿ ಪೊಂಜೊವು ಒರ್ತಿ ಜಾತಿದ ನೆವನೊಗೇ ಅವಮಾನ ಮಲ್ತ್ದ್ ಬರ್ಸಗ್ ಜಾಲ್ಡೇ ಉಂತಾದಿನ ಅಮಾನವೀಯ ಪ್ರಸಂಗ ಶಿರ್ಲಾಲ್ ಗ್ರಾಮೊಡು ಜುಲೈ 6ನೇ ಸೋಮವಾರ ದಾನಿ ನಡತ್ದ್ಂಡ್.
ಬೋಲ್ತೇರ್ ತಾಲೂಕ್ ಶಿರ್ಲಾಲ್ ಗ್ರಾಮೊದ ಬಿ.ಎಲ್.ಒ. ಪರಿಶಿಷ್ಟ ಜಾತಿಗ್ ಸೇರ್ದಿನ ಪೊಂಜೊವು ಅವಮಾನ ಆತಿನ ಅಂಗನವಾಡಿ ಕಾರ್ಯಕರ್ತೆದಿಲಾ ಆದುಲ್ಲೆರ್.
2025 ಟ್ ಶಿರ್ಲಾಲ್ ಗ್ರಾಮೊದ ಬೂತ್ ಒಂಜೆತ ಬಿ.ಎಲ್.ಒ. ಆದ್ ನೇಮಕ ಆತಿನ (ಅಂಗನವಾಡಿ ಕಾರ್ಯಕರ್ತೆದಿ) ಆರೆನ ಸೀಮೆದ ಮತದಾರೆರೆ ಪಟ್ಟಿ ಪರಿಷ್ಕರಣೆ ದ ಕ್ಷೇತ್ರ ಕಾರ್ಯೊಡು ಇಪ್ಪುನಗ, ಕೈತಲ್ದ ಪಲ್ಲದೋಡಿ ಪನ್ಪಿನಲ್ಪ ಒರ್ತಿ ಪೊಂಜೊವು ಆರೆನ ಇಲ್ಲ ಸಿಟೌಟ್ದ ಮೊಟ್ಟು ಬರ್ತ್ನಗನೇ ಬಿ.ಎಲ್.ಒ.ಗ್ “ಇಂಚಿ ಬರೊಡ್ಚಿ, ಅವುಲೇ ಉಂತುಲ, ನಿನ್ನ ಜಾತಿದಕುಲು ಇಂಚಿ ಬರ್ಪುಜೆರ್” ಪನ್ದ್ ಜಾತಿನಿಂದನೆ ಮಲ್ತ್ದ್ ಜೋರು ಬರ್ಸ ಬರೊಂದಿತ್ತ್ಂಡಲಾ ಜಾಲ್ಡೇ ಉಂತಾದ್ ಅಮಾನವೀಯತೆ ತೋಜಾದಿನ ನಡಪು ನಡತ್ದ್ಂಡ್.
ಮತದಾರೆರೆ ಪಟ್ಟಿ ಪರಿಷ್ಕರಣೆದ ಕ್ಷೇತ್ರ ಕಾರ್ಯೊಡು ಇಪ್ಪುನಗ ಜಾತಿದ ನೆವನೊಗು ಜಾತಿವಾದಿ ಪೊಂಜೊವುರ್ದು ಅವಮಾನ ಆದ್ ಬೆಸರ್ಡ್ ಪೊಂಜೊವು ಕೋಡೆ ತಹಶೀಲ್ದಾರ್ ವೈಸಾದಿನ ಬಿ.ಎಲ್.ಒ. ಬೇಲೆಗ್ ರಾಜಿನಾಮೆ ಕೊರ್ಯೆರ ಪಿದಡ್ದೆರ್.
ಈ ಬಗೆಟ್ ತನ್ನ ರಾಜಿನಾಮೆದ ಓಲೆನ್ ಬೋಲ್ತೇರ್ ತಹಶಿಲ್ದಾರ್ರೆಗ್ ಕೊರ್ತಿನ ಬಿ.ಎಲ್.ಒ. ಈ ನಡಪುದ ಬಗೆಟ್ ಜಡ್ತೆ ಮಲ್ತ್ದ್ ಕಾನೂನು ಕ್ರಮ ಗೆತೊನರೆ ಒತ್ತಾಯ ಮಲ್ತ್ದ್ ತಾಲೂಕ್ ದಂಡಾಧಿಕಾರಿಲೆಡ ಒಯಿಲ್ ಬರೆಪಾದೆರ್.
ಅವಮಾನೊರ್ದಾವರ ಬೆಸರ್ಡ್ ಬಿ.ಎಲ್.ಒ. ಈ ಬಗೆಟ್ ವೇಣೂರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.