Last updated on July 22nd, 2026 at 12:15 pm
ಬೋಲ್ತೇರ್, ಜು. 22: ಬೋಲ್ತೇರ್ ಪೇಂಟೆದ ನಡುಟು ಕರಿನ ಏಲ್ ದಶಕೊರ್ದಿಂಚಿ ಗ್ರಾಹಕೆರೆ ಬಡವು ತೆಕ್ಕಾಯಿನ ಗಣೇಶ್ ಹೋಟೆಲ್ ನ ದುಂಬಗ್ ಅಂಬಲ್ಡ್ ಮಾತ್ರ ಒರಿಯೆರೆ ಇತ್ತ್ದ್ ಜುಲೈ 25ತ ಸನಿಯಾರೊರ್ದ್ ಬೊಕ್ಕ ಪರತಿರಿತ ಪಾಲೆಗ್ ಗೋಡ್ಯುಂಡು.
ರಾಷ್ಟ್ರೀಯ ಪೆರ್ಸಾದಿದ ಬೇಲೆರ್ದಾವರ ಪೇಂಟೆದ ಪಾಕ ಪರ ಕಟ್ವಾನೊಲೆನ ಒಟ್ಟುಗು ಈ ಪರ ಹೋಟೆಲ್ನ್ಲಾ ಜರಿಪರೆ ಇತ್ತ್ದ್ ಸನಿಯಾರ ದಾನಿ ಅಕೇರಿದ ಬೇರ ಮಲ್ತ್ದ್, ಐತಾರ ಜರಿಪುನ ಬೇಲೆ ತೊಡಂಗುಂಡು. 1955 ಟ್ ಸುರು ಆಯಿನ ಗಣೇಶ್ ಹೋಟೆಲ್ಗ್ ಬೋಲ್ತೇರ್ದ ಕಡೀರ ಹೋಟೆಲ್ ಪನ್ಪಿ ಪುಗರ್ತೆಲಾ ಉಂಡು.
ಅವೆರ್ದ್ ಬೊಕ್ಕ ಬೋಲ್ತೇರ್ ಪೇಂಟೆಡ್ ಆಧುನಿಕ ಸೌಲಭ್ಯೊಲು ಇತ್ತಿನ ಪಾಕ ಪೊಸ ಹೋಟೆಲ್ಲ್ ಬತ್ತ್ಂಡಲಾ ಗಣೇಶ್ ಹೋಟೆಲ್ದ ಜನಪ್ರಿಯತೆ ಮಾತ್ರ ಕುಂದುದ್ಜಿ. ಸರ್ಕಾರಿ ಅಧಿಕಾರಿಲು, ವಕೀಲೆರ್, ಟೀಚರ್ನಕುಲು, ಬೇರದಕುಲು ಇಂಚ ಬೇತೆ ಬೇತೆ ಕ್ಷೇತ್ರೊದ ಗಣ್ಯಮಾನಿಲು ಮೂಲ್ಪದ ಖಾಯಂ ಗಿರಾಕಿಲಾದಿತ್ತೆರ್.
ಗಣೇಶ್ ಭಟ್ರೆನ ಈ ಕಟ್ವಾನೊಡು, ಸದಾನಂದ ಪ್ರಭು ಮೇರ್ 1955ಟ್ ಗಣೇಶ್ ಕೃಪಾ ಹೊಟೇಲ್ ಸುರು ಮಲ್ಪುವೆರ್. ಬೊಕ್ಕ ಸದಾನಂದೆರೆನ ಮೆಗ್ಯೆ ನರಸಿಂಹ ಪ್ರಭು ಮೇರ್ ಹೊಟೇಲ್ ನಡಪಾವೆರ್, ಬೊಕ್ಕ ಆರೆನ ಮಗೆ ದಿವಾಕರ ಪ್ರಭು ನಡಪಾವೊಂದಿತ್ತೆರ್, ದಿವಾಕರ ಪ್ರಭುಕುಲು ಕರಿಬೊಕ್ಕ, ಕರಿನ 31 ವರ್ಸೊರ್ದಿಂಚಿ ಹೊಟೇಲ್ಡ್ ಬೇಲೆ ಮಲ್ತೊಂದಿತ್ತಿನ ಶೇಖರ್ ಶೆಟ್ಟಿ ಮೇರ್ ಇತ್ತೆ 3 ವರ್ಸೊರ್ದಿಂಚಿ ಹೊಟೇಲ್ ನಡಪಾವೊಂದುಲ್ಲೆರ್. ಇಂಚಿಪದ ದಿನೊಟು ಗಣೇಶ್ ಕೃಪಾ ಹೊಟೇಲ್ ಶೆಟ್ರೆನ ಹೊಟೇಲ್ ಪನ್ದೇ ಪುದರಾದಿತ್ತ್ಂಡ್.
ರಾಷ್ಟ್ರೀಯ ಪೆರ್ಸಾದಿನ್ ಅಗೆಲ್ಪುನ ಬೇಲೆದ ಭಾಗ ಆದ್ ಬೋಲ್ತೇರ್ ಪೇಂಟೆದ ಪಾಕ ಪರ ಕಟ್ವಾನೊಲೆನ್ ಜರಿತೊಂದುಲ್ಲೆರ್. ಅಂಚಾದ್ ಸಂಬಂಧಿತಿನ ಕಟ್ವಾನೊದಕಲೆಗ್ ನೋಟೀಸ್ ಕೊರ್ದಿತ್ತ್ದ್, ಜುಲೈ 25 ತ ಉಲಯಿ ಕಟ್ವಾನ ಬುಡ್ದು ಕೊರ್ಯೆರ ಸೂಚನೆ ಕೊರ್ತೆರ್.
71 ವರ್ಸೊರ್ದಿಂಚಿ ನಡತೊಂದು ಬೈದಿನ ಗಣೇಶ್ ಕೃಪಾ ಹೋಟೆಲ್ಲಾ ತನ್ನ ಪಯಣೊನು ಇಡೆಗ್ ಉಂತಾವೊಂದುಂಡು. ಹೋಟೆಲ್ದ ಕಟ್ವಾನ ಜರಿದ್ ಪೋವು ಅತ್ತಂದೆ, ಅವೆಟಿತ್ತಿನ ಅಂಬಲ್, ರುಚಿ, ಆತ್ಮೀಯತೆ ಬೋಲ್ತೇರ್ದ ಪರತಿರಿಟ್, ಬೋಲ್ತೇರ್ದ ಜನೊಕ್ಲೆನ ಮನಸ್ಡ್ ಏಪೊಗುಲಾ ಒರಿದುಪ್ಪುಂಡು.