Last updated on July 6th, 2026 at 08:36 am
ಒಡಿಪು, ಜು. 06: ಶ್ರೀ ಪೇಜಾವರ ಅಧೋಕ್ಷಜ ಮಠೊತ ಮುತಾಲಿಕೆದ ನೀಲಾವರ ಗೋಶಾಲೆದ ಪುದರ್ ಬೊಕ್ಕ ಪೇಜಾವರ ಸ್ವಾಮಿಲೆನ ಫೋಟೋ ಗಲಸೊಂದು ಸಾರ್ವಜನಿಕೆರೆರ್ದ್ ಅನಧಿಕೃತವಾದ್ ದೇಣಿಗೆ ಒಟ್ಟುಮಲ್ತೊಂದಿತ್ತಿನ ಆರೋಪೊರ್ದಾವರ ಒಡಿಪುದ ಭಾರತೀಶ ಜುವೆಲ್ಲರ್ಸ್ದ ಶಶಿಧರ ಭಟ್ ಮೆರೆನ್ ನೀಲಾವರ ಗೋಶಾಲೆದ ಟ್ರಸ್ಟ್ರ್ದ್ ವಜಾ ಮಲ್ತ್ದೆರ್.
ಈ ಬಗೆಟ್ ಒಡಿಪು ಶ್ರೀ ಪೇಜಾವರ ಮಠ ಬೊಕ್ಕ ಗೋವರ್ಧನಗಿರಿ ಟ್ರಸ್ಟ್ (ನೀಲಾವರ ಗೋಶಾಲೆ) ಜಂಟಿ ಅಧಿಕೃತ ಪ್ರಕಟಣೆ ಪಿದಡ್ಪಾದಿತ್ತ್ದ್, ಸಾರ್ವಜನಿಕೆರ್ ಇಂಚಿನ ಒವ್ವೇ ಅನಧಿಕೃತ ಜಾಲೊಲೆಗ್ ಕಾಸ್ ಕೊರ್ದು ಮಂಗೆ ಆವರೆ ಬಲ್ಲಿ ಪನ್ದ್ ಬಿನ್ನಪು ಮಲ್ದ್ಂಡ್. ಒಡಿಪು ಭಾರತೀಶ ಜುವೆಲ್ಲರ್ಸ್ದ ಶಶಿಧರ ಭಟ್ ಪನ್ಪಿನ ಜನ
‘ನೀಲಾವರ ಗೋಗ್ರಾಸ ಸೇವಾ ತಂಡʼ ಪನ್ಪಿ ಕೂಟ ಕಟೊಂದು, ಸಾರ್ವಜನಿಕ ದೇಣಿಗೆಲೆನ್ಲಾ ಗೆತೊಂದಿನ ಬಗೆಟ್ ಒಲವು ತಿಕ್ಕ್ದ್ಂಡ್. ಪೇಜಾವರ ಸ್ವಾಮೀಜಿ ಬೊಕ್ಕ ಟ್ರಸ್ಟ್ಗ್ ತೆರಿಯಂದಿಲೆಕ ಅನಧಿಕೃತವಾದ್, ಸ್ವಾಮೀಜಿನ ಫೋಟೋ ಬೊಕ್ಕ ಮಠೊತ ಪುದರ್ನ್ ಬಿನ್ನಪುಡು ಗಲಸ್ದ್ ದೇಣಿಗೆ ಒಟ್ಟುಮಲ್ತ್ದೆ ಪನ್ದ್ ತೆರಿದ್ ಬೈದ್ಂಡ್.
ಅಂಚಾದ್ ಶಶಿಧರ್ ಭಟ್ ನ್ ಇತ್ತೆರ್ದೇ ನೀಲಾವರ ಗೋಶಾಲೆದ ಟ್ರಸ್ಟ್ರ್ದ್ ವಜಾ ಮಲ್ತ್ದ. ಗೋಶಾಲೆಗ್ಲಾ ಆಯನ ಕೂಟೊಗ್ಲಾ ಒವ್ವೇ ಸಂಬಂಧ ಇಜ್ಜಿ. ಸಾರ್ವಜನಿಕೆರ್ ಮಂಗೆ ಆವರೆ ಬಲ್ಲಿ. ಗೋಶಾಲೆಗ್ ದೇಣಿಗೆ ಕೊರ್ಪುನಕ್ಲು ಟ್ರಸ್ಟ್ದ ಅಧಿಕೃತ ರಶೀದಿನ್ ಕಡ್ಡಾಯವಾದ್ ಗೆತೊನೊಡು ಪನ್ದ್ ಪೇಜಾವರ ಅಧೋಕ್ಷಜ ಮಠೊತ ಗೋವರ್ಧನಗಿರಿ ಟ್ರಸ್ಟ್ದ ವಿಶ್ವಸ್ಥ ಲಕ್ಷ್ಮೀನಾರಾಯಣ ರಾವ್ ಪ್ರಕಟಣೆಡ್ ತೆರಿಪಾದೆರ್.