Last updated on July 14th, 2026 at 08:58 am
ದುಂಬು ಚಾಯಗ್ ಸರಾಗ್ ಪುಂಡಿ, ಅಂದ್ ಪುಂಡಿ ತಿಂದ್ಂಡ ಬಂಜಿಗ್ಲಾ ಗಟ್ಟಿ, ಕಾಂಡೆ ನಾಲ್ ಮಲ್ಲ ಮಲ್ಲ ಪುಂಡಿ ತಿಂದ್ದ್ ಒಂಜಿ ಲೋಟೆ ಚಾ ಪರ್ದ್ ಬೇಲೆಗ್ ಪಿದಡ್ಂಡ ಮದ್ಯನ ಮುಟ್ಟ ಬಡವಿಜ್ಜಿ. ನಡು ನಡುಟು ರಡ್ಡ್ ಮುಕುಲಿ ನೀರ್ ಪರ್ಂಡ ಆಂಡ್. ದುಂಬುದ ಅಡ್ಯೆಲೆಡ್ ಪುಂಡಿ ಬಾರಿ ಸುಲಬೊಡು ಬೇಗ ಆಪುನ ಅಡ್ಯೆ. ಬೊಕ ಅಮಸರಮಸರೊಡು ಪುಂಡಿ ತಿಂದ್ಂಡ ದೊಂಡೆಡ್ ತಿಕೊಂದು ಅತಗತಿ ಆತಿನಲಾ ಉಂಡು. ದುಂಬು ಏತ್ ಬಗೆತ ಪುಂಡಿ ಮನ್ಪೆದೆರ್ ಪಂಡ್ದ್ ತೂದು ಬರ್ಕನೇ…!!
ನಟ್ಟಿದಕ್ಲೆಗ್ ಪತ್ತ್ ಗಂಟೆದ ಚಾಯದ ಬಾಯಿಗ್ ಉರ್ಪೆಲರಿತ ಪುಂಡಿ ಆವೊಡಾಂಡ ದುಂಬುನಾನಿ ನಾಲ್ ಸೇರ್ ಅರಿ ನೀರ್ಡ್ ಪಾಡ್ಂಡ ಬೊಲ್ಪುಗು ಬೇಗ ಲಕ್ಕ್ದ್ ಮಲ್ಲ ಕಡೆಪಿಕಲ್ಲ್ಗ್ ಪಾಡ್ದ್ ಕಡೆಯೆರೆ ಕುಲ್ಲೊಡು, ಒರ ಪಾಡ್ನಗ ಒಂಜಿ ಸೇರ್ ಅರಿಲ ಒಂಜಿ ಗಡಿ ತಾರಯಿಲ ಪಾಡ್ದ್ ಯಾನ್ಲಾ ಎಲ್ಯಣ್ಣೆ ಲ ಕಡೆಯೆರೆ ಕುಲ್ಲೊಂದಿತ್ತ. ಪುಂಡಿದ ಬಂದಗ್ ಅದೋಟು ನೀರ್ ಪಾಡ್ದ್ ಕಡೆಯೊಡು, ನೀರ್ ಎಚ್ಚಾಂಡ ಅಂಚಿರ್ದ್ ಅಕ್ಕನ ನೆರಡೆಲ ತರೆಕ್ ಕುಟ್ಟಿಲಾ ಬೂರೊಂದಿತ್ತ್ಂಡ್!!! ದಾಯೆ ಪಂಡ ಪುಂಡಿದ ಬಂದ ನೀರ್ ಎಚ್ಚಾದ್ ಚೋರ್ ಚೋರ್ ಆಂಡ ಬೊಕ್ಕ ಪುಂಡಿ ಮನ್ಪೊಡಾಂಡ ಅಯಿನ್ ಒರ ತೊಂದೊರುಗು ಬೈರಾಸ್ ಚಂಡಿಮಂತ್ ಪಾಡ್ದ್ ಒರ ಸಿಕೆ ಬರ್ಪಾದ್ ಮಾಜಾವುನ ಒಂಜಿ ಬೇಲೆ ಅಕ್ಕಗ್ ಎಚ್ಚಾಪುಂಡತ್ತಾ…., ನಾಲ್ ಕಲ್ಲ್ ಪುಂಡಿದ ಬಂದ ಕಡೆದಾನಗ ಎಂಕ್ಲೆಗ್ ಸಾಕಾವೊಂದಿತ್ತ್ಂಡ್!! ಪುಂಡಿದ ಬಂದ ಎಚ್ಚ ನಸೆ ಆಯೆರೆಲಾ ಬಲ್ಲಿ ದಿಂಜ ನಿಂಗಲ್ ನಿಂಗಲ್ ಲಾ ಆಯೆರೆ ಬಲ್ಲಿ , ಅದಾ ಸಜ್ಜಿಗೆದ ಲೆಕ ಆಂಡ ಎಡ್ಡೆ. ಪುಂಡಿ ಕಡೆದಾದ್ ಅಯಿಕ್ ಒಂಜಿ ತಾರಾಯಿದ ಚಟ್ನಿ ಕಡೆವೊಡು. ಚಟ್ನಿ ಸಣ್ಣಾದ್ ಎಂಕುಲು ಕಡೆಪ್ಯಲ್ಲ್ರ್ದ್ ಲಕ್ಕ್ನಗ ಪುಂಡಿ ಬೈತೊಂದು ಉಪ್ಪುಂಡು. ಬೊಕ್ಕ ಆನಿ ಚಾಯಗ್ಲಾ ಅವ್ವೆ ಶಾಲೆಗ್ ಬುತ್ತಿಗ್ಲಾ ಅವ್ವೆ. ರಡ್ಡ್ ಪುಂಡಿನ್ ಪೊಡಿ ಮಂತ್ದ್ ಅಯಿಕ್ ಪನಿ ಚಟ್ನಿ ಮೈತ್ದ್ ಬುತ್ತಿಗ್ ಪಾಡೊಂದು ಪೋಪುನಿ. ಆನಿದ ಕಾಲೊಡು ಅವು ಬಂಜಿಗ್ಲಾ ಗಟ್ಟಿ ಬಾಯಿಗ್ಲಾ ರುಚಿ. ಆನಿ ಕಂಡದ ಬೇಲೆದಕುಲು ತಿನೊಂದಿತ್ತಿನ ಪುಂಡಿ ಒಂತೆ ಸಮಯ ಕರಿನಗ ಅಕ್ಲೆಗ್ಲಾ ಬೊರ್ಚಾಯೆರೆ ಸುರುವಾಂಡ್. ಕೆಯಿ ನಟ್ಟಿಗ್ ಇಡಿ ದಿನತ ಬತ್ತ ಒಂಜಿ ಸೇರ್ ಅರಿರ್ದ್ ರಡ್ಡ್ ಸೇರ್ ಅರಿಯಾದ್ ಏರ್ನಗ ಅಕ್ಲೆಗ್ಲಾ ಪನಿ ಮಲ್ಲಾದಿಗೆ ಬತ್ತ್ಂಡ್. ದುಂಬು ಮಗ್ತೆಗ್ ಕೇಂದ್ ಪುಂಡಿ ತಿನೊಂದಿತ್ತಿನಕ್ಲೆಗ್ ಬೊಕ್ಕ ಪುಂಡಿ ಮಂತ್ಂಡ “ಪುಂಡಿಯಾ…? ಎಂಕ್ ಬೊರ್ಚಿ, ಎಂಕ್ ತಿಗಲೆ ಸುಡು ಸುಡು ಬರ್ಪುಂಡು” ನ್ದ್ ಒರ್ತಿ ಪಂಡ ಬೊಕ್ಕೊರ್ತಿ “ಎಂಕ್ಲಾ ದೊಂಡೆ ಪುಗೆಪುಂಡು” ಪನಿಯೆರೆ ಸುರುಮಂತೆರ್, ಬೊಕ ಮೆಲ್ಲ ಮೆಲ್ಲ ಗುಸು ಗುಸುಟು “ಮುಕ್ಲೆನ ಯಾಪತೂಂಡಲಾ ಪುಂಡಿಯೇ… ಅವ್ವೇ ಪುಂಡಿನ್ ಸೇಮೆದ ಮನೆಟ್ ಒತ್ತೆರೆ ಆಪುಜಾ…?” ಪನ್ಪುನಲಾ ಕೇನೆರೆ ಸುರುವಾಂಡ್, ಅಕ್ಲೆನ ದಿಸೆಟ್ ಎಂಕ್ಲೆಗ್ ಸೇಮೆದಡ್ಯೆ ಒತ್ತುನ ಬೇಲೆ ಎಚ್ಚಾಂಡ್. ಶಾಲೆಗ್ ಪೋನಗ ಕಡೆಸೆರೆಲಾ, ಒರವೊರ ಪಿದಯಿ ಉಂತೆರೆ, ಒರೊರ ಪೆಟ್ಟ್ ತಿನ್ಯೆರೆ ಕಾರಣಲಾ ಆಂಡ್.
ಎಂಕ್ಲೆಗ್ ಮರಿಯಲಡ್ ಬೈತರಿತ ಪುಂಡಿಲಾ ಮಂತೊಂದಿತ್ತೆರ್. ಮರಿಯಲಡ್ ಅರಿ ಮುಗಿಂಡ ಬೊಕ್ಕ ಬೈತರಿತನೇ ನುಪ್ಪು, ಬೈತರಿತನೇ ಪುಂಡಿ, ಎಣೆಲ್ದ ಕೆಯಿ ನೀರ್ಡ್ ಬೂರ್ದು ಬೊದುಲ್ದು ಕದೆಲೆರೇತಿನೆನ್ ಕೊಯಿಂಡ ಅಯಿನ್ ಪಡಿಕ್ ನೋಪೆರೆ ಸೂಡಿ ದೇರ್ಪೆರೆ ತೀರುಜಿ, ಮಗ್ರ್ದಿನ ಕೈತ ತರೆ ಕೊಯಿದ್ ಸೂಡಿ ಕಟ್ಟ್ಂಡ ಅರೆವಸಿ ಕುರಲ್ ಸೂಡಿದ ಮುದೆಲ್ಡೇ ಒರಿಯುನಿ!! ಬೊಕ್ಕ ಅವು ಬಯಿ ಕುರಿನಗ ಕಪ್ಪೇರ್ದುಪ್ಪುಂಡು, ಅಯಿನ್ ಬೈ ಕುಡ್ತುದು ದೆತ್ತ್ದ್ ದೊಂಬುಡು ನುಂಗಾದ್, ಬೈಪಾದ್ ಮಂತಿನ ಅರಿ ಬೈತರಿ!! ತೂನಗನೇ ಕಪ್ಪು ಕಪ್ಪು, ಅಯಿತಾ ಕಮ್ಮೆನಲಾ ಬೇತೆ. ಅಯಿತ ಪುಂಡಿ ಮಂತ್ಂಡ ನುಂಗೆಲ್ ಕೊಲ್ಲತರು ಅತ್ತ್ಂಡ ನುಂಗೆಲ್ ತೊರಕೆದ ರೇಸ ಬಾರಿ ಸೋಕಾಪುಂಡು. ಮರಿಯಲಡ್ ತೊಡು ಆಂಡ ಒರವೊರ ಅಯಿನೇ ಸೇಮೆದಡ್ಯೆ ಮಂತಿನಲಾ ಉಂಡು.
ಬೊಕ ದುಂಬು ರೇಶನ್ದ ಅಂಗಡಿಡ್ ಬೊಲ್ದುದ ಉರ್ಪೆಲರಿ ತಿಕ್ಕೊಂದಿತ್ತ್ಂಡ್.ಅಯಿತ ಪುಂಡಿ ಮಂತ್ಂಡ ಆ ಪುಂಡಿಡ್ ಆಕ್ದ್ ಏರೆನ್ಲಾ ಗಿಡಪೊಲಿ!! ಆತ್ ಗಟ್ಟಿ!! ಕಲ್ಲ್ದ ಲೆಕ ಆಪೆದ್ಂಡ್. ಸ್ಟೋರುದ ಅರಿತ ಮೆತ್ತೆನದ ಪುಂಡಿ ಆವೊಡಾಂಡ ಒಂತೆ ಮಾಲೆಸ್ ಮನ್ಪೊಡಾಪುಂಡು. ಸ್ಟೋರ್ದ ಅರಿನ್ ಸಜ್ಜಿಗೆಲೆಕ ಕಡೆದ್ ತೆಲ್ಪು ಬಂದ ದೆತ್ತ್ದ ಆಯಿನ್ ಮಾಜಾದ್ ಪುಂಡಿ ಮಂತ್ಂಡ ಒಂತೆ ಮೆತ್ತೆನ ಆದ್ ಸೋಕಾಪುಂಡು.ಸಣ್ಣ ಕಡೆಂಡ ಆನಿ ಪುಂಡಿ ಕಲ್ಲೇ…!!
ಪುಂಡಿ ಮನ್ಪುನಲಾ ಪಾಕ ಬಗೆತ ಉಂಡು. ನೀರ್ ಪುಂಡಿ ಮಂತ್ಂಡ ಜೋಕ್ಲೆಗ್ ಬಾರೀ ಕೊಸಿ. ಎಲೆಲ್ಯ ಪುಂಡಿ ಮಂತ್ ಕೊದ್ಯುನ ನೀರ್ಗ್ ಪಾಡ್ದ್ ನೀರ್ದೊಟ್ಟಿಗೆ ಬೈಪಾದ್ ಅಯಿಕ್ ಒಂಜಿ ಗಡಿ ತಾರಾಯಿ ಸಣ್ಣ ಕಡೇದ್ ಕೂಟುದು ಪನಿ ಬೆಲ್ಲಲಾ ಪಾಡ್ಂಡ ಬಾರಿ ರುಚಿ.ಜೋಕುಲು ಇಷ್ಟೊಡು ತಿನ್ಪೆರ್. ದುಂಬು ಎಂಕ್ಲೆನ ಅಮ್ಮೆರೆನ ಅಪ್ಪೆ ಪ್ರಾಯಾದ್ ಉಸಾರಿಜ್ಯಂದೆ ಜೆತ್ತಿನವುಲಾದ್ ನುಪ್ಪು ನೀರ್ ಜಪ್ಪಂದೇನಗ ಅಮ್ಮ ನೀರ್ಪುಂಡಿ ಮಂತ್ದ್ ಆಯಿತ ಗಸಿನೇ ಚಮ್ಚಡ್ ಪರ್ಪಾದ್ ಅರೆನ್ ಅರೈಕೆ ಮಂತೊಂದಿತ್ತೆರ್.ಅಪಗ ಇತ್ತೆದಲೆಕ ಮಿಕ್ಸ್ ಮಾತ ಇಜ್ಯಂಡತ್ತಾ….
ನೀರ್ ಪುಂಡಿಗ್ ಬೆಲ್ಲ ಪಾಡಂದೆ ಮಂತ್ದ್ ಉದ್ದ ಮುಂಚಿ ಪೊಲ್ತು ಪಾಡ್ದ್ ಒಗ್ಗರ್ಣೆ ಪುಂಡಿ ಮಂತ್ಂಡ,ಗಟ್ಟಿ ಪುಂಡಿನ್ ಅರೆಪು ಕೊದ್ದಿನಗ ಮೂರ್ದು ಪಾಡ್ದ್ ಅರೆಪು ಪುಂಡಿಲಾ ಮನ್ತೊಂದಿತ್ತೆರ್.ದುಂಬುನಾನಿದ ಪುಂಡಿ ಒರಿಂಡ ಮನದಾನಿ ನೆಲಸ್ ಪುಂಡಿ ಅತ್ತ್ಂಡ ಅರೆಪು ಪುಂಡಿಯಾದ್ ಬಂಜಿಗ್ ಸೇರೊಂದಿತ್ತ್ಂಡ್.
ಬೊಕ ಬಸಳೆ ಪುಂಡಿ ಲಾ ತುಲುವೆರ್ ಮೋಕೆಡ್ ತಿನ್ಪುನ ತಿಂಡಿ. ಕೆಲವೆರ್ ಬಸಳೆದ ಕಜಿಪುಗು ಎಲ್ಲೆಲ್ಯ ಪುಂಡಿ ಬೈಪಾದ್ ಪಾಡ್ಂಡ,ಕೆಲವೆರ್ ಬಸಳೆದ ಮಲ್ಲ ಮಲ್ಲ ತಪ್ಪುಡು ಪುಂಡಿದ ಬಂದನ್ ಮೆತ್ತಾದ್ ಮಡ್ತ್ದ್ ಬೈಪಾದ್ ಬೊಕ್ಕ ಅರೆಪು ಕೊದ್ದಿನಗ ಅಯಿನ್ ತುಂಡು ತುಂಡು ಮಂತ್ ಪಾಡುನಲಾ ಉಂಡು. ಬೊಕ ಕೆಲವು ಮೀನ್ಗ್ಲಾ ಪುಂಡಿ ಮನ್ಪೆರೇಪುಂಡು!!ಅಯಿಟ್ ಮಲ್ಲ ಪುಗಾರ್ತೆ ಉಪ್ಪುನಿ ಮರುವಾಯಿ ಪುಂಡಿಗ್. ಪುಲ್ಪೆನದ ಮರುವಾಯಿ ಪುಂಡಿ ತುಲುವೆರೆಗ್ ಮೋಕೆದ ತೆನಸ್. ಇತ್ತಿತ್ತೆ ಮದಿಮೆ,ತಮ್ಮನದ ಒನಸ್ಡ್ಲಾ ಮರ್ವಾಯಿ ಪುಂಡಿ ಬಲಸುನ ತೂಯೆರೆ ತಿಕ್ಕುಂಡು. ಬೊಕ ಕಡಲ ಬರಿತಕ್ಲೆಗ್ ಪಚ್ಚಿಲೆ ಪುಂಡಿ, ಎಟ್ಟಿ ಪುಂಡಿ ಮನ್ಪುನಲಾ ಮರ್ಲ್ ಉಂಡು. ದುಂಬು ಬೆನ್ನಿದ ಇಲ್ಲಡ್ ನರ್ತೆ ಪುಂಡಿ, ಗುಲ್ಲ ಪುಂಡಿ ಲಾ ಮನ್ಪೆದೆರ್. ದುಂಬು ಕಾವೇರ್ಸಂಕ್ರಾಂದಿಗ್ ಬೆನ್ನಿದ ಇಲ್ಲಡ್ ನರ್ತೆಪುಂಡಿ ಆವೊಂದಿತ್ತ್ಂಡ್. ನೀರ್ ಪುಂಡಿದ ಲೆಕ ಗಸಿ ಪುಂಡಿಗ್ ನರ್ತೆದ ಕಜಿಪು ಮಂತ್ದ್ ಬೆರಕೆ ಮನ್ಪುನಿ, ಅಯಿತ ರುಚಿಲ ಕಮ್ಮೆನಲ ವಾ ಸೋಕು. ಎಂಕ್ಲು ಎಲ್ಯ ಉಪ್ಪುನಗ ಅಜ್ಜಿ ಇಲ್ಲಲ್ ತಿಂತಿನ ನೆಂಪು ಇತ್ತೆಲಾ ಬಾಯಿಡ್ ನೀರ್ ಬರ್ಪಾವುಂಡು. ಅಪಗ ಎಂಕ್ಲೆನ ಮಲ್ಲ ಚಿಕ್ಕಮ್ಮ ಪನೊಂದಿತ್ತಿನ ಕತೆ ಒಂಜಿ ನೆಂಪಾಂಡ್!!!
ಒರ ಕಾವೇರ್ಸಂಕ್ರಾಂದಿಗ್ ದನಿಕುಲೆ ಇಲ್ಲಡ್ ನರ್ತೆ ಪುಂಡಿ ಮಂತಿತ್ತೆರ್ಗೆ, ಆನಿ ಕಂಡ ದಪ್ಪುನಾಯನ್ ಒನಸ್ಗ್ ಬರ್ರೆ ಪಂಡೆರ್ಗೆ. ಆಯೆ ಪಾಪ ಬಡವೆ ಇಲ್ಲಲ್ ಪಿದಡ್ನಗ ಜೋಕುಲೆಡ್ ಪಂಡೆಗೆ “ಇನಿ ದನಿಕುಲು ಒನಸ್ಗ್ ಲೈದೆರ್. ನರ್ತೆ ಪುಂಡಿ ಮಂತಿತ್ತೆರ್ಂಡ ಯಾನ್ ಅಯಿನ್ ಕಟ್ಟೊಂದು ಬರ್ಪೆ, ನಮ ಒಟ್ಟಿಗೆ ತಿನ್ಕ” ಅಂಚ ಇಲ್ಲಡ್ ಜೋಕುಲು ಆಸೆಡ್ ಕಾತ್ ಕುಲ್ಲಿಯೆರ್ಗೆ. ಬೇಲೆದಾಯೆ ಬನ್ನಗನೇ ತೋಟರ್ದ್ ಒಂಜಿ ಗುಂಡಿದ ಪಾಲೆ ತೂದು ಆಯಿತ ಮಡಲ್ ಕಡ್ತ್ದ್ ಪತೊಂದು ಬತ್ತೆಗೆ. ಒನಸ್ಗ್ ಕುಲ್ಲುನಗ ದನಿಕುಲು ಅರೆನ ಜೋಕುಲೆನ ಒಟ್ಟಿಗೆ ಚಾವಡಿ ಡ್ ಮಣೆಟ್ ಕುಲ್ಯೆರ್ಗೆ. ಬೇಲೆದಾಯಗ್ ತಿರ್ತ್ ಚಿಣೆಟ್ ಇರೆಪಾಡ್ಯೆರ್ಗೆ. ದನಿನ ಬೊಡೆದಿ ತೊಂದೊರುಡು ನರ್ತೆ ಪುಂಡಿ ಬಲಸೊಂದು ಬತ್ತೆರ್, ಚಾವಡಿ ಡ್ ಕುಲ್ಲಿನ ಜೋಕುಲೆಗ್ ಮಾತಾ ರಡ್ಡ್ ರಡ್ಡ್ ಕೈಲ್ ಬಲಸಿಯೆರ್!! ದನಿನ ಇರೆಕ್ ಗೋರು ಗೋರುದು ನಾಲ್ ಕೈಲ್ ಬಲಸಿಯೆರ್!! ಉಂದೆನ್ ತೂನಗ ತಿರ್ತ್ ಕುಲ್ಲಿನ ಬೇಲೆದಾಯಗ್ ಕೊದಿ ಅರಿಯೊಂದಿತ್ತ್ಂಡ್, ಮಿತ್ತ್ ಕುಲ್ಲಿನಕ್ಲೆಗ್ ಮಾತಾ ಬಲಸ್ದಾದ್ ತಿರ್ತ್ ಚಿಣೆಟ್ ಕುಲ್ಲಿನ ಬೇಲೆದಾಯನಡೆ ಬತ್ತೆದ್ ಕೈಲ್ನೊರ ತೊಂದೊರುಡು ತಿರ್ಗಾದ್ ರಡ್ಡ್ ಪುಂಡಿ ಲಾ ಪನಿ ಗಸಿ ಲ ಆಯನ ಇರೆಕ್ ಬಲಸಿಯೆರ್. ಅಯಿನ್ ತೂಯಿನ ಬೇಲೆದಾಯಗ್ ಆಯನ ಜೋಕುಲೆನ ಮೋನೆ ಕಣ್ಣೆದುರು ಬತ್ತಿಲೆಕಾಂಡ್,ಇಲ್ಲಡ್ ನರ್ತೆ ಪುಂಡಿಗಾದ್ ಜೋಕುಲು ಕಾತೊಂದುಪ್ಪೆರ್,ಈ ರಡ್ಡ್ ಪುಂಡಿನ್ ದಾದ ಮನ್ಪುನೀಂದ್ ಒಂಜಿಗಲಿಗೆ ಆಲೆಚನ ಮಂತೆಗೆ, ಒರ ತರೆದೇರ್ತ್ದ್ ಚಾವಡಿಗ್ ತೂಯೆ!! ಜೋಕುಲು ಮಾತ ನರ್ತೆ ಪುಂಡಿ ತಿನೊಂದುಲ್ಲೆರ್,ದನಿಕುಲು ನನಲಾ ಕೈ ಪಾಡ್ದಿಜೆರ್!!! ಕೂಡ್ಲೆ ಬೇಲೆದಾಯೆ ಆಯನ ಇರೆತ ಒಂತೆ ಗಸಿನ್ ನಕ್ಕ್ದ್ ಒಂಜಿ ಪುಂಡಿನ್ ಪೆಜ್ಜಿದ್ ಅಂಗೈತ ಉಲಾಯಿ ದೀದ್ ಪುಸ್ಕ ರಟ್ಟುಲೆಕ ಮಂತೆಗೆ… ಅವು ಸೀದಾ ಪೋದು ಮಿತ್ತ್ ಕುಲ್ದಿನ ದನಿನ ಇರೆಕ್ ಬೂರುಂಡು.ದನಿಕ್ ಪಿಸ್ರ್ ಬತ್ತ್ದ್ ಲಕ್ಕ್ದ್ ಉಂತ್ಯೆರ್. “ದಾನೆಯಾ…ಕೈಟ್ ಬಸ ಇಜ್ಜಾ…. ಎನ್ನ ಇರೆಕ್ ಮಡೆ ಮಂತತ್ತಾ…?”ಪಂಡೆರ್. ಅಪಗ ಬೇಲೆದಾಯೆ “ಅಯ್ಯೋ ಉಲ್ಲಯಾ ಯಾನ್ ದಾಲ ಬೋಡುಂದು ಮನ್ತಿನತ್ತ್!! ಎಂಕ್ ಬೂರ್ದಿನೇ ರಡ್ಡ್ ಪುಂಡಿ ಅಯಿಟ್ಲಾ ಒಂಜಿ ಮರ್ಲ್ ಪುಂಡಿ” ಪಂಡೆಗೆ. ಅಪಗ ದನಿಕ್ಲೆಗ್ ದಾದ ಪನೊಡುಂದು ತೋಜಿಜಿ. ಬೊಡೆದಿನ್ ಲೆತ್ತ್ದ್ ಬೇತೆ ಇರೆ ಪಾಡಾಯೆರ್, ಆ ಇರೆನ್ ಬೇಲೆದಾಯಗ್ ಕೊರ್ಪಾಯೆರ್. ಬೇಲೆದಾಯೆ ಅಯಿನ್ ಪಾಲೆಡ್ ಕಟ್ಟೊಂದು ಇಲ್ಲಡೆ ಕನತ್ದ್ ಜೋಕ್ಲೆಡಪ್ಪ ತಿಂದೆಗೆ. ದುಂಬುದ ಬಡಪತ್ತ್ದ ಕತೆ.ಅಂಚ ಯಾಪಾಂಡಲಾ ಪುಂಡಿ ಕೈರ್ದ್ ತಿರ್ತ್ ಬೂರುಂಡ ‘ಅವು ಮರ್ಲ್ ಪುಂಡಿ’ ಪಂಡ್ದ್ ತೆಲಿತೊಂದಿತ್ತ.
ತುಲುವೆರೆ ಕೆಲವು ಆಚರಿಪುಲೆಡ್ ಪುಂಡಿಗ್ ಇಸೇಸ ತಾನ ಮಾನ ಉಂಡು. ಶಿವರಾತ್ರೆಗ್ ಪೇರ್ ಪುಂಡಿ ಮನ್ಪುನ ಕ್ರಮ ಉಂಡು. ಉಂದು ಪುಂಡಿದ ಬಂದನ್ ಸಾರ್ನೆದ ಕುಡ್ಪುಗು ಒತ್ತುದು ಮನ್ಪುನ ಅಡ್ಯೆ. ಅಂಚೆನೆ ಮಾರಿಪೂಜೆಗ್ ಮಾರಿಗ್ ಪುಂಡಿ ಬಲಸುನ, ಮಾರಿ ಪೂಜೆಗ್ ಕಡ್ಪಾಯಿನ ಕೋರಿನ್ ರೇಸ ಮಂತ್ದ್ ಅಯಿಕ್ ಪುಂಡಿ ಮನ್ಪುನ ಕ್ರಮ ಉಂಡು.ಗಣಪತಿ ದೇವೆರೆಗ್ಲಾ ಪುಂಡಿ ಮೋಕೆದ ತೆನಸ್ಂದ್ ಪನ್ಪೆರ್,ಪುಂಡಿದ ಉಲಾಯಿ ಬೆಲ್ಲ ತಾರಯಿ ಮೊರೆತ್ದ್ ದಿಂಜಾದ್ ಮಂತಿನ ಪುಂಡಿನ್ ಗಣಪತಿಗ್ ಬಲಸುವೆರ್.ಕನ್ನಡದಕುಲು ಸಿಹಿ ಕಡುಬು,ಮೋದಕ ಪನ್ಪೆರ್.
ಕೆಲವೆರ್ ಬಾಯಿರುಚಿಕ್ ಕಾರ ತಿನ್ಪುನಕುಲು ನುಂಗೆಲ್ ಪೊಡಿ ಎಟ್ಟಿದ ಚಟ್ನಿದಿಂಜಾದ್ ಪುಂಡಿ ಮನ್ಪುನಲಾ ಉಂಡು.ಇತ್ತೆ ಆ ಜಾಗೆಗ್ ಪೇಂಟೆಡ್ ತಿಕ್ಕುನ ಮಯಿದದ ಉಂಡೆ ಮೊಮೊಸ್ ಬೈದ್ಂಡ್.
ಕೊರಗ ತನಿಯಗ್ ಆವಾರ ಬಲಸ್ನಗಲಾ ಪುಂಡಿ ಬಸಳೆ ಕುಡು ಕಜಿಪು ಆವೊಡೆ.
ಸೈತ್ಂಡ ಸಾವುದಾನಿ ರಾತ್ರೆ ಉಲಯಿಲೆಪ್ಪುನಗ ಸೈತಿನಕ್ಲೆಗ್ ಬಲಸೆರೆ ಪುಂಡಿ ಆವೊಡೇ!!! ಒಂಜಿ ಸೇರ್ ಅರಿನ್ ಕುಟುಮದಕುಲು ಕಡೆದ್ ಮಾಜಾದ್ ಒಂಜಿ ಕೈಟ್ ಪುಂಡಿ ಮನ್ಪುನ ಕ್ರಮ, ಅಂಚಾದ್ ಅವು ಉರುಂಟು ಪುಂಡಿಯೇ ಆವೊಡೂಂದು ಇಜ್ಜಿ,ಉದ್ದ ಪುಂಡಿಲಾ ಆಪುಂಡು.
ದುಂಬು ಜೋಕ್ಲೆಗ್ ಕೋರ ಕೊಟ್ಲೆ ಬೂರುಂಡ ಅಕ್ಲೆನ ಮೆಯಿತ ಪುಡಿ ನುಂಗಿಬೊಕ್ಕ ಮೀಪಾದ್ ದೇವಸ್ಥಾನಗ್ ಲೆತೊಂದು ಪೋದು ಆನಿ ಪುಂಡಿಲ ಬಸಳೆ ಕುಡು ಕಜಿಪುಲ ಮಂತ್ದ್ ಕೊಡಿಯಿರೆಟ್ ಬಲಸೊಂದಿತ್ತೆರ್.ಜೋಕ್ಲೆನ ಕೊದಿ ಪೋಯೆರೆ ಇಂಚ ಮನ್ಪುನಿಂದ್ ಪನೊಂದಿತ್ತೆರ್, ಬೊಕ ಪೆದ್ದೊಲ್ದಿಗ್ಲಾ ಒರುಂಬನೆ ಅಮೆತಾನಿ ಪುಂಡಿಲ ಕೋರಿ ಕಜಿಪುಲ ಬಲಸುನ ಕ್ರಮ ಇತ್ತ್ಂಡ್.
ಇತ್ತೆ ಒರು ಪಗರಿನ ಜೂವನದ ರೀತಿ ರಿವಾಜುಲೆಡ್ ಪುಂಡಿ ಬಾರಿ ಸಸಾರ ಆತಿನಲಾ ಅಂದ್. ಓಡೆ ಮುಟ್ಟ ಪಂಡ ಇತ್ತೆ ದಿಂಜ ಪೊರ್ತು ಮೊಬೈಲ್ ಡ್ ಪಾತೆರ್ಂಡ ‘ದಾನೇ ಪುಂಡಿ ಬೈಪಾವುನಾ’ ಪಂಡ್ದ್ ಮಕ್ಕರ್ ಮನ್ಪುನಲಾ ತೋಜುಂಡು, ಪುಂಡಿದ ಬಗ್ಗೆ ಕುಸಾಲ್ ಕುಸಾಲ್ದ ಪದ್ಯೊಲುಲಾ ಕೇನೆರೆ ತಿಕ್ಕುಂಡು. ದಾದನೇ ಪನ್ಲೆ ಪುಂಡಿ ತುಲುನಾಡ್ಡ್ ಒಂಜಿ ಇಸೇಸ ತಾನ ಮಾನ ಪಡೆತಿನ ಅಡ್ಯೆ ಪಂಡ ತಪ್ಪಾವಂದ್.