Last updated on July 1st, 2026 at 11:35 am
ಪಣಂಬೂರ್, ಜ, 01: ಬೈಕಂಪಾಡಿ ದ ಕೈತಲ್ ಸೋಮವಾರ ಪುಲ್ಯಾನಗ ನಡತಿನ ಬಂಗಾರ್ ವೈವಾಟ್ದಾರೆನ ಮಿತ್ತ್ದ ಸಿನಿಮೀಯ ಶೈಲಿದ ದಾಳಿ ಬೊಕ್ಕ ಬಂಗಾದ್ ಕನ್ಡ್ದಿನ ಪ್ರಕರಣೊದ ಜಡ್ತೆಗ್ ಇತ್ತೆ ಒಂಜಿ ಪೊಸ ತಿರ್ಗೆಲ್ ತಿಕ್ಕ್ದ್ಂಗ್. ಕಲ್ವೆರ್ ವ್ಯಾಪಾರಿರ್ದ್ ಒಯ್ತೊಂದು ಪೋತಿನ ಐಷಾರಾಮಿ ಕಾರ್ ಬಂಟ್ವಾಳ ಗ್ರಾಮಾಂತರ ಪೊಲೀಸ್ ಸ್ಟೇಶನ್ ಸೀಮೆದ ಬೆಂಜನಪದವುಡ್ ತಿಕ್ಕ್ದ್ಂಡ್ ಪನ್ದ್ ಕುಡ್ಲ ನಗರ ಪೊಲೀಸ್ ಆಯುಕ್ತೆರ್ (CP) ಪ್ರಕಟಣೆಡ್ ತೆರಿಪಾದೆರ್.
ಪೊಲೀಸೆರ್ ನಾಡ್ಪತ್ತಿನ ಕಾರನ್ ಪರಿಶೀಲನೆ ಮಲ್ಪುನಗ ಕಲ್ವೆರೆ ಕ್ರೂರ ಬೇಲೆ ತೆರಿದ್ ಬೈದ್ಂಡ್. ಕಾರ್ಡ್ ಒಲ್ಪಾಂಡಲಾ ಬಂಗಾರ್ ದೆಂಗಾದ್ ದೀದಿಪ್ಪೆರ್ ಪನ್ಪಿ ಡೌಟ್ಡ್ ಕಲ್ವೆರ್ ಕಾರ್ದ ಇಡೀ ಸೀಟ್ ಕವರ್ಲೆನ್ ಪರಿತ್ ಪಾಡ್ದ್, ಅಡಿಮೇಲ್ ಮಲ್ತ್ ನಾಡ್ದೆರ್. ವ್ಯಾಪಾರಿನ ಕೈರ್ದ್ ಒಯ್ತೊಂದಿನ ಮೊಬೈಲ್ ಫೋನ್ ನನಲಾ ತಿಕ್ಕ್ದಿಜಿ. ಕೃತ್ಯೊರ್ದು ಬೊಕ್ಕ ಮೊಬೈಲ್ ಸ್ವಿಚ್ ಆಫ್ ಆತಿನೆರ್ದಾವರ ಆರೋಪಿಲು ಅವೆನ್ ಒಲ್ಪ ಆಂಡಲಾ ದಕ್ಕ್ದುಪ್ಪುನ ಅತ್ತ್ಂಡ ನಾಶ ಮಲ್ತುಪ್ಪುನ ಸಾಧ್ಯತೆ ಉಂಡು. ಇತ್ತೆ ಪೊಲೀಸೆರ್ ಮೊಬೈಲ್ ಟವರ್ ಡಂಪ್ (Tower Dump) ತಂತ್ರಜ್ಞಾನೊದ ಮುಕೇನ ಆರೋಪಿಲೆನ್ ಪತ್ತೆರೆ ತೂವೊಂದುಲ್ಲೆರ್.
ರಾತ್ರೆ 2:30 ತ ಅಂದಾಜಿಗ್ 3 ಕಾರ್ಲೆಡ್ ಬತ್ತಿತ್ತಿನ ಮೋನೆ ಮುಚೊಂದಿನ ಕಲ್ವೆರ್ ವ್ಯಾಪಾರಿನ್ ಅಡ್ಡಕಟ್ಟ್ದ್ 180 ಗ್ರಾಂ ಬಂಗಾರ್ದ ಒಟ್ಟುಗು, ಕಾಸ್ ಅಂಚೆನೇ ಕಾರ್ನ್ಲಾ ಕಂಡೊಂದು ಪೋತೆರ್. ಈ ಕಾರ್ ಬೆಂಜನಪದವುಡು ತಿಕ್ಕ್ದಿನೆರ್ದಾವರ ಆರೋಪಿಲು ಈ ಸಾದಿಯೆ ಆದ್ ಪೆರ್ಸಾದಿಡ್ ಬೆಂಗಳೂರ್, ಕೊಡಗ್, ಧರ್ಮಸ್ಥಳ ಅತ್ತ್ಂಡ ತಲಪಾಡಿ ರಾಷ್ಟ್ರೀಯ ಪೆರ್ಸಾದಿ ಮುಕೇನ ಕೇರಳಗ್ ಪದ್ರಾಡಾತಿನ ಬಗೆಟ್ ಶಂಕೆ ತೋಜಿದ್ ಬೈದ್ಂಡ್. ಅಂಚಾದ್ ಪೊಲೀಸೆರ್ ಟೋಲ್ ಗೇಟ್ ಬೊಕ್ಕ ಪ್ರಮುಖ ಜಂಕ್ಷನ್ಲೆನ ಸಿಸಿಟಿವಿ (CCTV) ದೃಶ್ಯಾವಳಿಲೆನ್ ಒಟ್ಟುಮಲ್ತೊಂದುಲ್ಲೆರ್.