Last updated on August 29th, 2026 at 01:45 pm
ಕಾಸ್ರೋಡ್, ಆ. 29: ಓಣಂ ಪರ್ಬೊದಾನಿಯೇ 15 ವರ್ಸ ಪ್ರಾಯೊದ ಆಣ್ ಒರಿ ತತ್ತ್‌ದ್ ಗೂವೆಲ್‌ಗ್ ಬೂರ್ದು ತೀರ್ದಿನ ನಡಪು ಕಾಸ್ರೋಡ್ ಜಿಲ್ಲೆದ ಕಾಞ್ಹಂಗಾಡ್ ಕೈತಲ್ ಚೀಮೇನಿಡ್ ನಡತ್‌ದ್ಂಡ್.
ತೀರ್ದಿನ ಆಣನ್ ಕೊಡಕ್ಕಾಡ್‌ದ ಆನಿಕ್ಕಾಡಿ ನಿವಾಸಿ ಧನೇಶ್ ಪನ್ಪಿನಾರೆನ ಮಗೆ ಸನೂಪ್ (15) ಪನ್ದ್ ಗುರ್ತ ಪತ್ತ್‌ದೆರ್.
ಚೀಮೇನಿ ಪೊಲೀಸ್ ಸ್ಟೇಶನ್‌ ಸೀಮೆಡ್ ಗುರುವಾರ ರಾತ್ರೆ ಈ ನಡಪು ನಡತ್‌ದ್ಂಡ್. ಸನೂಪ್ ರಾತ್ರೆ ನಡತೊಂದಿತ್ತಿನ ಓಣಂ ಕಾರ್ಯಕ್ರಮೊಡು ಪಾಲ್‌ಪಡೆದಿತ್ತೆ. ಈ ಪೊರ್ತುಡು ದೋಸ್ತಿಲೆ ಒಟ್ಟುಗು ಪಿದಯಿ ಪೋದೀಪ್ಪುನಗ, ಕೈತಲ್ಡೇ ಇತ್ತಿನ ಗೂವೆಲ್‌ಗ್ ತತ್ತ್‌ದ್ ಬೂರ್ದೆ. ಅಪಗನೇ ಪೊಲೀಸೆರ್ ಬೊಕ್ಕ ಅಗ್ನಿಶಾಮಕ ರಕ್ಷಣಾ ಸಿಬ್ಬಂದಿ ಜಾಗೆಗ್ ಬತ್ತ್‌ದ್ ಸನೂಪ್ ನ್ ಗೂವೆಲ್‌ರ್ದ್ ಮಿತ್ತ್ ದೇರ್ತ್‌ದೆರ್.
ಬೊಕ್ಕ ಸನೂಪ್ ನ್ ಎಚ್ಚಿಗೆ ಮರ್ದ್‌ಗ್ ಕಣ್ಣೂರ್‌ದ ಆಸ್ಪತ್ರೆಗ್ ದಾಕಲ್ತ್‌ದೆರ್. ಆಂಡ, ಮರ್ದ್ ಪಲಿಪಂದೆ ಶುಕ್ರವಾರ ಬಯ್ಯಡ್ ಸನೂಪ್ ತೀರ್‌ದೆ.
ಸನೂಪ್ ಚೆರುವತ್ತೂರ್‌ದ ತಿಮಿರಿ ಕುಟ್ಟಮಠ ಸರ್ಕಾರಿ ಹೈಯರ್ ಸೆಕೆಂಡರಿ ಶಾಲೆಡ್ 10ನೇ ಕ್ಲಾಸ್ ಓದೊಂದಿತ್ತೆ.