Last updated on August 16th, 2026 at 05:33 pm
ಮುಲ್ಕಿ, ಆ. 16: ತುಳುನಾಡ್‌ಡ್, ಐಟ್‌ಲಾ ಮುಲ್ಕಿ, ಪೆಜಮಾಡಿ, ಒಡಿಪು, ಮಂಗಳೂರುಡು ಕೋರ್ದಬ್ಬು ಕಂಬೆರ್ಲು ದೈವದ ಪಾತ್ರಿಯಾದ್ ಪುಗರ್ತೆ ದೆತೊಂದು, ಕರಿನ 37 ವರ್ಸಡ್ದ್ ದೈವದ ಸೇವೆನ್ ನಿಷ್ಠೆ ಬೊಕ್ಕ ಪ್ರಾಮಾಣಿಕತೆಡ್ ಮಲ್ತೊಂದು ಬೈದಿನ ಪ್ರಸ್ತುತ ನಂದಿಕೂರುದ ನಿವಾಸಿಯಾಯಿನ ಶ್ರೀ ಶೀನ ಪಾತ್ರಿ ಮೆರೆಗ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ (ರಿ.) ಮೊಕ್ಲೆನ ವರ್ಸದ “ತುಳುವ ಜವನೆರೆ ಆಯನ, ತುಳುನಾಡ್ ಕಾನ್ಕ್ಲೇವ್ – 2026″ದ ಜೀವಮಾನದ ಸಾಧನಾ ಪುರಸ್ಕಾರ “ತುಳುವಾಲ ಕುಲಸಿರಿ” ಪ್ರಶಸ್ತಿನ್ ಆಗಸ್ಟ್ 23ತ್ತಾನಿ ಮುಲ್ಕಿದ ಸರ್ಕಾರಿ ಪದವಿ ಪೂರ್ವ ಕಾಲೇಜಿಡ್ ನಡಪರೆ ಉಪ್ಪುನ ತುಳುನಾಡ್ ಕಾನ್ಕ್ಲೇವ್ ಸಮಾವೇಶೊಡು ಕೊರಿಯೆರೆ ನಿರ್ಧಾರ ಮಲ್ತ್‌ದೆರ್.
ಶ್ರೀ ಶೀನ ಪಾತ್ರಿ ಮೇರ್ ಸುಮಾರು 37 ವರ್ಸಡ್ದ್ ಬಬ್ಬು ಸ್ವಾಮಿನ ದರ್ಶನ ಸೇವೆನ್ ಮಲ್ತೊಂದು ಬೈದೆರ್. ಬಬ್ಬುಸ್ವಾಮಿನ ಚರಿತ್ರೆಯಾಯಿನ “ಬೈದ”ನ್ ಎಡ್ಡೆಡೇ ತೆರಿದಿನಾರಾದ್ ಬೇತೆ ಬೇತೆ ಕಡೆಟ್ ಸೇವೆನ್ ಮಲ್ತ್‌ದೆರ್. ಕಚ್ಚೂರು ಮಾಲ್ದಿದೇವಿ ಬೊಕ್ಕ ಬಬ್ಬುಸ್ವಾಮಿನ ಮೂಲಕ್ಷೇತ್ರ ಕಚ್ಚೂರುಡುಲಾ ಬಬ್ಬು ಸ್ವಾಮಿನ ದರ್ಶನ ಪಾತ್ರಿಯಾದ್ ಸೇವೆ ಸಂದಾದೆರ್. ಮುಲ್ಕಿ ಮಟ್ಟು ಗ್ರಾಮದ ಕೂಡುಕಟ್ಟುಗು ಸೇರ್ದಿನ ಮೇರ್, ಮಟ್ಟು ಬೊಕ್ಕ ಸುತ್ತಮುತ್ತದ ಬಬ್ಬುಸ್ವಾಮಿ ದೈವಸ್ಥಾನೊಲೆಡ್ ಸುದೀರ್ಘ ಸೇವೆ ಸಂದಾದೆರ್. ಇಂಚಿನ ಒರಿ ನಿಷ್ಠಾವಂತೆ ಹಿರಿಯ ವ್ಯಕ್ತಿನ್ ಗುರ್ತ ಪತ್ತ್‌ದ್ ಜೀವಮಾನದ ಸಾಧನಾ ಪ್ರಶಸ್ತಿ ಕೊರ್ಪುನ ನಮಕ್ ಭಾರಿ ಉಮೇದ್‌ದ ವಿಚಾರೊ ಪಂಡ್‌ದ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್‌ದ ಪ್ರಶಸ್ತಿ ಆಯ್ಕೆ ಸಮಿತಿದಕುಲು ತೆರಿಪಾದೆರ್.
ತುಳು ಬಾಸೆ, ಸಂಸ್ಕೃತಿ ಬೊಕ್ಕ ತುಳುತ್ವದ ಒರಿಪುಗಾದ್ ಸಾಹಿತ್ಯ ಬೊಕ್ಕ ದಾಖಲೆದ ನೆಲೆಟ್ ಕರಿನ್ 4 ವರ್ಸಡ್ದ್ ವ್ಯವಸ್ಥಿತವಾದ್ ಬೇಲೆ ಮಲ್ತೊಂದು ಬೈದಿನ “ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್” ಪುದರ್‌ದ ಸಂಸ್ಥೆ, ಪ್ರತಿ ವರ್ಸೊಲಾ “ತುಳುನಾಡ್ ಕಾನ್ಕ್ಲೇವ್” ಪನ್ಪಿನ ವರ್ಸದ ಲೇಸ್‌ನ್ ನಡಪಾವೊಂದು, ತುಳು ಸಾಹಿತ್ಯ ಕಾರ್ಯಾಗಾರ, ತುಳು ಲಿಪಿದ ಪುನರುಜ್ಜೀವನ, ತುಳು ಬೂಕುಲೆನ್ ಬುಡುಗಡೆ ಮಲ್ಪುನೆ, ಇರೆಮದೆತ ಕಾಯಿಲೆಕ್ಕ ಉಪ್ಪುನ ತುಳುವ ಪ್ರತಿಭೆಲೆನ್ ಗುರ್ತ ಪತ್ತೊಂದು ಬೈದ್‌ಂಡ್. ತುಳುನ್ ದುಂಬುದ ಪೀಳಿಗೆಗ್ ಎತ್ತಾವುನೆನ್ ಶಾಲೆ-ಕಾಲೇಜುಲೆನ ಒತ್ತು ಸೇರಿಗೆಡ್ ಅಜನೆದಾಂತೆ ಮಲ್ತೊಂದು ಬೈದ್‌ಂಡ್. ಈ ಸರ್ತಿಲಾ ತುಳು ಸಾಹಿತ್ಯದ ಒರಿಪುಗಾದ್, ಮಂದಾರ ಕೇಶವ ಭಟ್ ಬರೆದಿನ ಮಹಾಕಾವ್ಯ “ಬೀರದ ಬೊಳ್ಪು”, ಹರ್ಷ ತುಳುನಾಡ್ ಮೆರೆನ ಅನುಭವದ ಬರವುಲೆನ ಗೊಂಚಲಾಯಿನ “ವಜ್ರದಾರಗೆ”, ಸುಶಾನ್ ಮೆರೆನ ಸಂಶೋಧನಾ ಬೂಕು “ಕಾಂತಬಾರೆ ಬೂದಬಾರೆ”, ಅಮ್ಮನ ಬಗೆಟ್ ಮಸ್ತ್ ಬರಹಗಾರೆರ್ ಬರೆತಿನ ಲೇಖನೊಲೆನ ಬೂಕು “ಅಪ್ಪೆ”, ಸುಮಾರು 2000 ಪ್ರತಿ ಮಾರಾಟವಾಯಿನ ತುಳು ಲಿಪಿ ಕಲ್ಪುನ ಬೂಕು “ಜೀಟಿಗೆ”ದ ಮೂಜಿನೆ ಮುದ್ರಣ “ತುಳುನಾಡ್ ಕಾನ್ಕ್ಲೇವ್ – 2026″ಡ್ ಬುಡುಗಡೆ ಆವರೆ ಉಂಡು.
ಆಗಸ್ಟ್ 23ತ್ತಾನಿ ಕಾಂಡೆ 10 ಗಂಟೆಡ್ದ್ ಬಯ್ಯ 5:30 ಗಂಟೆ ಮುಟ್ಟ, ಮುಲ್ಕಿದ ಸರ್ಕಾರಿ ಪದವಿ ಪೂರ್ವ ಕಾಲೇಜಿಡ್ (ಜೂನಿಯರ್ ಕಾಲೇಜ್) ಸತತವಾದ್ ಮಸ್ತ್ ಕಾರ್ಯಾಗಾರೊಲು ನಡಪರೆ ಉಂಡು. ಮಾತಾ ತುಳುವರೆಗ್‌ಲಾ ಮುಕ್ತ ಪ್ರವೇಶ ಉಂಡು ಪಂಡ್‌ದ್ ಸಂಘಟಕೆರ್ ತೆರಿಪಾದೆರ್.