Last updated on August 16th, 2026 at 04:37 am
ಕುಡ್ಲ, ಆ. 16: ಪೇಂಟೆದ ಕೆ.ಎಸ್. ರಾವ್ ರೋಡ್ದ ಮಾಲ್ ಒಂಜೆಟ್ ಇಪ್ಪುನ ಕೆಎಫ್ಸಿಡ್ ತೆಟ್ಟ್ ತೆನಸ್ ಸಪ್ಲೈ ಮಲ್ತಿನ ಆರೋಪಡ್ ಜಿಲ್ಲಾ ಆರೋಗ್ಯಾಧಿಕಾರಿ ಬೊಕ್ಕ ಜಿಲ್ಲಾ ಆಹಾರ ಸುರಕ್ಷತಾ ಅಧಿಕಾರಿ ಶನಿವಾರ ದಾಳಿ ಮಲ್ತ್ದೆರ್.
ಈ ಪೊರ್ತುಡು ಕೆಎಫ್ಸಿಡ್ ಅನೈರ್ಮಲ್ಯ, ಸ್ಟೋರೇಜ್ಡ್ ಪರ ಕುಮೆದಿನ ಮಾಸ ತಿಕ್ಕ್ದ್ಂಡ್, ಎಕ್ಸ್ಪೈರಿ ಟೈಮ್ ಕರಿದಿನ ಎಣ್ಣೆಲಾ ತಿಕ್ಕ್ದ್ಂಡ್. ಇಂದೆನ್ ಮಾತಾ ಅಧಿಕಾರಿಲು ಉಲಕೈ ಮಲ್ತೊಂದು ಬೀಗ ಪಾಡ್ದೆರ್. ಆತೇ ಅತ್ತಂದೆ ತಿಕ್ಕ್ದಿನ ಸ್ಯಾಂಪಲ್ಲೆನ್ ಪರೀಕ್ಷೆ ಮಲ್ಪೆರೆ ಮೈಸೂರ್ಗ್ ಕಡಪುಡ್ರೆ ಉಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.
ಮಾಜಿ ಮೇಯರ್ ಬೊಕ್ಕ ಬಿಜೆಪಿ ನಾಯಕಿ ಕವಿತಾ ಸನಿಲ್ ಆರೆನ ಬಾಲೆಗ್ ಸ್ವಿಗ್ಗಿ ಮುಕೇನ ಪೆರಿ-ಪೆರಿ ಚಿಕನ್ ಆರ್ಡರ್ ಮಲ್ತಿತ್ತೆರ್. ಕೆಎಫ್ಸಿ ಪಾರ್ಸೆಲ್ ಬತ್ತಿ ಬೊಕ್ಕ, ಆರೆನ 10 ವರ್ಸೊದ ಬಾಲೆ ಕೋರಿ ತಿನೊಂದುಪ್ಪುನಗ ಮಾಸ ಕಪ್ಪು ರಂಗ್ಗ್ ತಿರ್ಗ್ದುಪ್ಪುನ ತೋಜಿದ್ ಬೈದ್ಂಡ್. ಅವು ಬಾರೀ ನಾತಲಾ ಬರೊಂದಿತ್ತ್ಂಡ್ ಪನ್ದ್ ವರದಿ ಆತ್ಂಡ್.
ಬಿಲ್ ಪತೊಂದು ಕವಿತಾ, ಅಪಗನೇ ಸಿಟಿ ಸೆಂಟರ್ ಮಾಲ್ಡ್ ಇಪ್ಪುನ ಕೆಎಫ್ಸಿ ಔಟ್ಲೆಟ್ಗ್ ಪೋದು ಡಿಎಚ್ಒ ಬೊಕ್ಕ ಬೇತೆ ಆರೋಗ್ಯ ಇಲಾಖೆ ಅಧಿಕಾರಿಲೆನ್ ಜಾಗೆಗ್ ಲೆಪ್ಪುಡಾದೆರ್. ಆರ್ ಈ ವಿಷಯೊನು ಉಸ್ತುವಾರಿ ಸಚಿವೆ ಯುಟಿ ಖಾದರ್ ರೆನ ಗುಮನೊಗ್ಲಾ ಕನತೆರ್. ಸಚಿವೆರೆ ಸೂಚನೆದ ಪ್ರಕಾರ ಜಿಲ್ಲಾ ಆರೋಗ್ಯಾಧಿಕಾರಿ ಡಾ. ಎಚ್.ಆರ್ ತಿಮ್ಮಯ್ಯೆರ್ ಬೊಕ್ಕ ಜಿಲ್ಲಾ ಆಹಾರ ಸುರಕ್ಷತಾ ಅಧಿಕಾರಿ ಪ್ರವೀಣ್ ಒಟ್ಟುಗು ಕೆಎಫ್ಸಿಗ್ ದಾಳಿ ಮಲ್ತ್ದ್ ಪರಿಶೀಲನೆ ಮಲ್ತ್ದೆರ್.
ಕೆಎಫ್ಸಿಗ್ ಬೆಂಗಳೂರ್ರ್ದ್ ಕೋರಿದ ಮಾಸ ಸಪ್ಲೈ ಆವೊಂದಿತ್ತ್ಂಡ್ಗೆ. ಸುಮಾರ್ 7-8 ತಿಂಗೊಲು ಪಿರವುದ ಮಾಸೊನು ಮುಲ್ಪ ದೆತ್ತ್ ದೀದಿತ್ತೆರ್ಗೆ. ಅಧಿಕಾರಿಲು ಸ್ಟೋರೆಜ್ ರೂಂ ಪೊಗ್ಗುನಗ ಮೂರಿ ಬರೊಂದಿತ್ತ್ದ್, ಈ ಬಗೆಟ್ ಸಿಬ್ಬಂದಿಲೆಡ ಕೇನ್ನಗ ಸಮ ಸದು ಕೊರ್ತುಜೆರ್. ಈ ಸ್ಟೊರೇಜ್ಡ್ ಮೂಜಿ ಬಗೆತ ಚಿಕನ್ಲೆನ್ ದೀದಿತ್ತೆರ್. ಆತೇ ಅತ್ತಂದೆ ಟೈಮ್ ಕರಿದಿನ ಎಣ್ಣೆಲಾ ತಿಕ್ಕ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಮೈಸೂರ್ದ ಆಹಾರ ತಪಾಸಣಾ ಲ್ಯಾಬೋರೇಟರಿಗ್ ಕಡಪುಡ್ದು, ವರದಿ ಬತ್ತಿನೇ ನನದ ಕ್ರಮ ಗೆತೊನುವೆರ್ ಪನ್ದ್ ತೆರಿದ್ ಬೈದ್ಂಡ್. ಮಿತ್ತ್ರ್ದ್ ತೂನಗ ತೆಟ್ಟ್ ತೆನಸ್ ಕೊರ್ತಿನ ಬೊಕ್ಕ ಅನೈರ್ಮಲ್ಯ, ಕುಮೆದಿನ ಮಾಸ, ಟೈಮ್ ಕರಿದಿನ ಎಣ್ಣೆ ಗಲಸುನ ಮಾತಾ ತೋಜಿದ್ ಬೈದ್ಂಡ್.