Last updated on September 11th, 2026 at 11:31 am
ಮುಲ್ಕಿ: ಹಳೆಯಂಗಡಿ ರಾಷ್ಟ್ರೀಯ ಪೆರ್ಸಾದಿಡ್ ಬೆದ್ರ್ದ ಕುರುವೆ ಮಾರೊಂದಿತ್ತಿನ ಉತ್ತರ ಪ್ರದೇಶ ಮೂಲೊದ ಅಜಯ್ ಸಿಂಗ್ (37) ಪನ್ಪಿನ ಜವನೆ ಅಸಹಜವಾದ್ ತೀರ್ದಿನ ಬಗೆಟ್ ಆಯನ ಇಲ್ಲದಕುಲು ಕುಡ್ಲ ಪೊಲೀಸ್ ಕಮಿಷನರ್ಡ ಒಯಿಲ್ ಬರೆಪಾದೆರ್. ಅಂಚಾದ್ ಮುಲ್ಕಿ ಪೊಲೀಸೆರ್ ಇನ್ಸ್ಪೆಕ್ಟರ್ ಪ್ರಮೋದ್ ಕುಮಾರ್ ಮುತಾಲಿಕೆಡ್ ಜಾಗೆದ ಮಹಜರ್ ಮಲ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.
ಹಳೆಯಂಗಡಿ ಬಿಲ್ಲವ ಸಂಘೊದ ಎದುರುಡು ರಾಷ್ಟ್ರೀಯ ಪೆರ್ಸಾದಿದ ಬರಿಟ್ ಕರಿನ ಪಾಕ ವರ್ಸೊರ್ದಿಂಚಿ ಬೆದ್ರ್ದ ಬುಟ್ಟಿ ಮಾರೊಂದಿತ್ತಿನ ಉತ್ತರ ಪ್ರದೇಶ ಮೂಲೊದ ಜವನೆ ಅಜಯ್ ಸಿಂಗ್ ಸೆ. 10 ತಾನಿ ಉಸಾರ್ ತತ್ತ್ದ್ ಇತ್ತ್ದ್, ಕೈತಲ್ದಕುಲು ಆರೆನ್ ಕುಡ್ಲದ ವೆನ್ಲಾಕ್ ಆಸ್ಪತ್ರೆಗ್ ದಾಕಲ್ತ್ದೆರ್. ಆಂಡ, ಅಲ್ಪ ಮರ್ದ್ ಪಲಿಪಂದೆ ತೀರ್ದೆರ್.
ಆಂಡ, ಆರೆನ ಅಮ್ಮೆರ್ ಗಿರಿರಾಜ್ ಸಿಂಗ್ ಕುಡ್ಲ ಪೊಲೀಸ್ ಕಮಿಷನರ್ಡ ಆಯಿಲ್ ಬರೆಪಾದ್, ಪದ್ವತ್ ಸಿಂಗ್ ಬೊಕ್ಕ ದೇವು ಪನ್ಪಿನಕುಲು ಆಯನ್ ಆಕ್ದ್ ಕೆರ್ತೆರ್ ಪನ್ದ್ ಆರೋಪ ಮಲ್ತ್ದೆರ್. ಈ ಬಗೆಟ್ ಕೂಲಂಕಷ ಜಡ್ತೆ ನಡಪೊಡು ಪನ್ದ್ ಕಾಯೆಸ್ ಮಲ್ತ್ದೆರ್. ಆ ಪ್ರಕಾರ ಮುಲ್ಕಿ ಪೊಲೀಸೆರ್ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದ್, ಸಾಕ್ಷ್ಯೊಲೆನ್ ಒಟ್ಟು ಮಲ್ತ್ದ್ ಜಡ್ತೆ ಸುರು ಮಲ್ತ್ದೆರ್.