Last updated on September 7th, 2026 at 05:53 pm
ಪುತ್ತೂರ್ ಸೆ. 07: ಪುತ್ತೂರ್ದ ಐತಿಹಾಸಿಕ ಮಹತೋಭಾರ ಮಹಾಲಿಂಗೇಶ್ವರ ದೇಲಂತಡೆದ ವ್ಯವಸ್ಥಾಪನಾ ಸಮಿತಿ ರಾಜ್ಯ ಧಾರ್ಮಿಕ ದತ್ತಿ ಇಲಾಖೆದ ನಿಯಮೊಲೆನ್ ಮಾತಾ ಗೆನ್ಪಂದೆ ಮಲ್ಲ ಪ್ರಮಾಣೊದ ಕಾಸ್ದ ಅವ್ಯವಹಾರ ಮಲ್ದ್ಂಡ್ ಪನ್ದ್ ‘ಪುತ್ತೂರು ಮಹಾಲಿಂಗೇಶ್ವರ ದೇವಸ್ಥಾನ ಸಂರಕ್ಷಣಾ ಸಮಿತಿ’ ಗಾತಿದ ಆರೋಪ ಮಲ್ದ್ಂಡ್. ಈ ಬಗೆಟ್ ಜಿಲ್ಲಾಧಿಕಾರಿಲೆನ ಮುತಾಲಿಕೆಡೇ ಜಡ್ತೆ ನಡೆಡಪೊಡು ಪನ್ದ್ ಸಮಿತಿ ಒತ್ತಾಯ ಮಲ್ದ್ಂಡ್.
ಪುತ್ತೂರ್ಡ್ ಪತ್ರಿಕಾಗೋಷ್ಠಿ ಮಲ್ತ್ದ್, ಈ ಅಕ್ರಮೊಲೆಗ್ ಸಂಬಂಧಿತಿನ ದಾಕಲೆಲೆನ್ ಬುಡುಗಡೆ ಮಲ್ತ್ದ್ ಪಾತೆರ್ನ ಸಮಿತಿದ ಮುಖಂಡೆ ದಿನೇಶ್ ಕುಮಾರ್ ಜೈನ್, “ಅವ್ಯವಹಾರೊದ ಪಾರದರ್ಶಕ ಜಡ್ತೆಗ್ ದೇಲಂತಡೆದ ಇತ್ತೆದ ವ್ಯವಸ್ಥಾಪನಾ ಸಮಿತಿನ್ ಇತ್ತೆನೇ ಅಮಾನತ್ಡ್ ದೀವೊಡು” ಪನ್ದ್ ಒತ್ತಾಯ ಮಲ್ತೆರ್.
ದೇವಸ್ಥಾನೊದ ಇತ್ತೆದ ಆಡಳಿತ ಮಂಡಳಿ ಅಧಿಕಾರ ಗೆತೊಂಡಿಬೊಕ್ಕ 2025 ಜನವರಿರ್ದ್ ಡಿಸೆಂಬರ್ ಮುಟ್ಟ ಬೊಕ್ಕ 2026 ಮೇ ಮುಟ್ಟ ಒಟ್ಟು 40 ಲಕ್ಷ ರೂಪಾಯಿನ್ ಎಲ್ಯ ಎಲ್ಯ ಕರ್ಚಿ ಪನ್ದ್ ಉಲ್ಲೇಖ ಮಲ್ತ್ದ್ ಕಾಸ್ ಗೆತೊಂದೆರ್. ಆತೇ ಅತ್ತಂದೆ 30 ಲಕ್ಷ ರೂಪಾಯಿನ್ ಸೆಲ್ಫ್ ಡ್ರಾ ಮಲ್ದ್ಂಡ್. ಒವ್ವೇ ಸರಕಾರಿ ವ್ಯವಸ್ಥೆಡ್ ಈ ರೀತಿ ಕಾಸ್ನ್ ಸೆಲ್ಫ್ ಡ್ರಾ ಮಲ್ಪೆರೆ ಅವಕಾಶ ಇಜ್ಜಿಂಡಲಾ, ಮಹಾಲಿಂಗೇಶ್ವರ ದೇವಸ್ಥಾನೊದ ಸಮಿತಿ ಕಾನೂನ್ಗ್ ತತ್ತ್ದ್ ಇಂಚ ಮಲ್ದ್ಂಡ್.
ದೇವಸ್ಥಾನೊಗು ಸೇರ್ದಿನ ಜಾಗೆದ ಕಟ್ವಾನ ಜರಿಪರೆ ಜೆಸಿಬಿ, ಹಿಟಾಚಿ ಬೇಲೆಲೆಗ್ 70 ಲಕ್ಷ ರೂಪಾಯಿನ್ ದೇವಸ್ಥಾನೊರ್ದು ಕರ್ಚಿ ಮಲ್ದ್ಂಡ್ ಪನ್ದ್ ಮಾಹಿತಿ ಹಕ್ಕುಡ್ ತೆರಿಪಾದೆರ್. ಕಮಿಟಿದ ಸದಸ್ಯನ ಜೆಸಿಬಿ ಬೇಲೆನ್ ಉಂತಾದ್ ಅಧ್ಯಕ್ಷೆರ್ ಆರೆನನೇ ದೋಸ್ತಿನ ಜೆಸಿಬಿ, ಹಿಟಾಚಿಲೆಡ್ ಬೇಲೆ ಮಲ್ಪಾದೆರ್. ತೆಂಕಿಲಡ್ 15 ಎಕರೆ ಜಾಗೆನ್ ಉಲಕೈ ಮಲ್ಪುನಗ ಆ ಜಾಗೆಡ್ ಇತ್ತಿನ ಪೆಲ, ಪೆಜ, ಬೇಂಗ ಇಂಚಿನ ಎಡ್ಡೆ ಮರೊಕುಲೆನ್ ಕಡ್ತ್ದ್ ಮಾರ್ದೆರ್ ಪನ್ದ್ ಆರೋಪ ಮಲ್ತ್ದ್ ಆರ್ ಈ ಮಾತಾ ನೆವನೊಗು ವ್ಯವಸ್ಥಾಪನಾ ಸಮಿತಿನ್ ಅಮಾನತ್ಡ್ ದೀದ್ ಇಲಾಖೆ ಇತ್ತೆನೇ ಈ ಅವ್ಯವಹಾರೊ ಜಡ್ತೆ ಮಲ್ಪೊಡು.
ಕಾಸ್ದ ಬೊಕ್ಕ ದೇಬೆರೆನ ಜಾಗೆದ ಅವ್ಯವಹಾರ ಜಿಲ್ಲಾಧಿಕಾರಿಲೆನ ಮುತಾಲಿಕೆಡ್ ಜಡ್ತೆ ಆವೊಡು. ಕ್ಷೇತ್ರೊದ ಕಾರ್ಯ ನಿರ್ವಹಣಾಧಿಕಾರಿನ್ಲಾ ಇತ್ತೆನೇ ಬೇಲೆರ್ದ್ ದೆಪ್ಪೊಡು. ಸಂರಕ್ಷಣಾ ಸಮಿತಿದ ಈ ಕಾಯೆಸ್ಲೆನ್ ಧಾರ್ಮಿಕ ದತ್ತಿ ಇಲಾಖೆ ಒಂಜಿ ವಾರೊದುಲಯಿ ಮಲ್ತಿಜಿಂಡ ಸೆಪ್ಟೆಂಬರ್ 21 ತಾನಿ ಬೃಹತ್ ಭಕ್ತೆರೆ ಸಭೆತ ಮುಕೇನ ಜನಾಂದೋಲನ ನಡಪಾವ ಪನ್ದ್ ಎಚ್ಚರ್ಗೆ ಕೊರ್ಯೆರ್.