Last updated on September 2nd, 2026 at 10:51 am
ಬೆಂಗಳೂರ್, ಸೆ. 2: ವಾಜರಹಳ್ಳಿದ ಬಿಸಿಸಿಎಚ್‌ಎಸ್ ಲೇಔಟ್‌ದ ಒಂಜಿ ಇಲ್ಲಡ್ 4 ತಿಂಗೊಲ್ದ ಅಮರ್ ಪೊಣ್ಣು ಜೋಕುಲೆನ್ ನೀರ್ ದಿಂಜಿನ ಬಾಲ್ದಿಡ್ ಮುರ್ಕಾದ್ ಕೆರ್ತಿನ ಅಪ್ಪೆ, ಆಲ್‌ಲಾ ಬಲ್ಲ್ ಪಾಡೊಂದು ಜೂವ ಗೆತ್ತೊನರೆ ತೂತಿನ ನಡಪು ಅಂಗಾರೆ ಡತ್‌ದ್ಂಡ್.
ಜೋಕುಲೆನ್ ಕೆರ್ತಿನ ಪೊಂಜೊವುನು ಉಮಾದೇವಿ (44) ಪನ್ದ್ ಗುರ್ತ ಪತ್ತ್‌ದೆರ್. ಆರೆನ ಕಂಡನೆ ರಾಮಲಿಂಗಪ್ಪೆ ಬರೆಪಾದಿನ ಒಯಿಲ್‌ದ ಆಧಾರೊಡು ತಲಘಟ್ಟಪುರ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್. ರಾಮಲಿಂಗಪ್ಪೆ-ಉಮಾದೇವಿ 2002ಟ್ ಮದಿಮೆ ಆದಿತ್ತೆರ್. ರಾಮಲಿಂಗಪ್ಪೆ ರಿಯಲ್ ಎಸ್ಟೇಟ್ ವೈವಾಟ್ ಮಲ್ತೊಂದುಲ್ಲೆರ್.
ಜೋಕುಲಾವಂದಿನೆರ್ದಾವರ ಕೃತಕ ಗರ್ಭಧಾರಣೆ (ಐವಿಎಫ್)ದ ಮರ್ದ್ ಮಲ್ತಿತ್ತೆರ್. ಉಂದಾಯಿ ಬೊಕ್ಕ ಐವಿಎಫ್ ಮರ್ದ್‌ಡ್ ಉಮಾದೇವಿ ಬಂಜಿನಾಲ್ ಆದಿತ್ತೆರ್. ಕರಿನ ಮೇ 5ಕ್ ಉಮಾದೇವಿ ಅಮರ್ ಪೊಣ್ಣು ಜೋಕುಲೆನ್ ಪೆದ್ದ್‌ದೆರ್. ಈ ನಡುಟು, ಕರಿನ ಕೆಲ ದಿನೊರ್ದಿಂಚಿ ಉಮಾದೇವಿ, ತನ್ನ ಜೋಕುಲೆನ್ ತೂವೊನುನೆಟ್ ಆಸಕ್ತಿ ಕಲೆವೊಂದೆರ್. ಆಶ್ರಮೊಗು ಸೇರಾಯೆರ ಅಪಗಪಗ ಪನೊಂದಿತ್ತಿನ ಉಮಾದೇವಿ ವಿಚಿತ್ರವಾದ್ ನಡತೊನರೆ ಪತ್ತ್‌ದೆರ್. ಪೋಡಿನ ಕಂಡನೆ, ನಿಮ್ಹಾನ್ಸ್ ಆಸ್ಪತ್ರೆಡ್ ಮನೋವೈದ್ಯೆರೆಗ್ ಉಮಾದೇವಿನ್ ತೋಜಾದ್ ಮರ್ದ್ ಮಲ್ಪಾದಿತ್ತೆರ್. ಡಾಕ್ಟರ್‌ನಕುಲು ಪೆದ್ದಿ ಬೊಕ್ಕ ಹಾರ್ಮೋನ್‌ಡ್ ಎಚ್ಚಿಕಮ್ಮಿ ಆಪಿನೆರ್ದಾವರ ಉಮಾದೇವಿ ಇಂಚ ಮಲ್ತೊಂದುಲ್ಲೆರ್ ಪನ್ದ್ ಪನ್ದಿತ್ತೆರ್.
ಅಂಗಾರೆ ಮಧ್ಯಾಹ್ನ ಉಮಾದೇವಿ ಇಲ್ಲದ ಅದೆತ ಬಾಕಿಲ್ ಪಾಡ್ದಿತ್ತೆರ್. ಬೊಕ್ಕ ಇಲ್ಲದಕುಲು ಬಾಕಿಲ್ ದೆತ್ತ್‌ದ್ ತೂನಗ 4 ತಿಂಗೊಲ್ದ ಅಮರ್ ಜೋಕುಲು ತೀರ್ದಿತ್ತ. ಕುಡೊಂಜಿ ಕಡೆಟ್, ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನರೆ ಉಮಾದೇವಿ ತೂವೊಂದುಪ್ಪುನ ತೋಜಿದ್ ಬೈದ್ಂಡ್. ಅಪಗನೇ ಆರೆನ್ ಕೈತಲ್ದ ಆಸ್ಪತ್ರೆಗ್ ದಾಕಲ್ತ್‌ದ್ ಪ್ರಾಣಾಪಾಯೊರ್ದು ದೂರ ಮಲ್ತ್‌ದೆರ್.