ಕುಡ್ಲ: ಮೊಬೈಲ್ ಕೊರಂದಿನೆಕ್ ಬೀಸತ್ತಿ ಪಾಡ್ದ್ ಕೆರ್ಯೆರೆ ತೂತಿನ ಆರೋಪಿನ ಮಿತ್ತ್ ಎಫ್‌ಐಆರ್!

Last updated on October 14th, 2026 at 08:21 am

ಕುಡ್ಲ, ಅ. 14: ಸಿಟಿ ಸೆಂಟರ್ ತೂವರೆ ಬತ್ತಿತ್ತಿನ ಆಂಜೊವು ಒರಿ ಲೇಡಿಗೋಶನ್ ಆಸ್ಪತ್ರೆದ ಕೈತಲ್ ಬಸ್ ಉಂತಡೆಡ್ ಉಂತುದುಪ್ಪುನಗ, ಮೊಬೈಲ್ ಕೇನ್ಡಿನಾಯಗ್ ಮೊಬೈಲ್ ಫೋನ್ ಕೊರ್ಪುಜಿ ಪನ್ಡಿನೆಕ್ ಆಯೆ ಬೀಸತ್ತಿ ಪಾಡ್ದ್ ಕೆರ್ಯೆರೆ ತೂತಿನ ನಡಪು ನಡತ್‌ದ್ಂಡ್. ದಾಳಿಡ್ ಗಾತಿದ ಗಡಿಕುಲಾತಿನ ಸಂತ್ರಸ್ತೆ ಸಿರಾಜು ಬಿ.ಎನ್. (Siraju B N) ಮೇರ್ ಬರೆಪಾದಿನ ಒಯಿಲ್‌ದ ಪ್ರಕಾರ, ದಾಳಿ ಮಲ್ತಿನ ಆರೋಪಿ ಇರ್ಷಾದ್ ಪನ್ಪಿನಾಯನ ಮಿತ್ತ್ ತೆನ್ಕಾಯಿ ಕುಡ್ಲ (ಪಾಂಡೇಶ್ವರ) ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.

ಅಕ್ಟೋಬರ್ 11, 2026 ತಾನಿ ಬಯ್ಯ ಸುಮಾರ್ 6:30 ಕ್ಕ್ ಸಿರಾಜು ಮೇರ್ ಕುಡ್ಲ ಸಿಟಿ ಸೆಂಟರ್ ಮಾಲ್‌ಗ್ ಬತ್ತಿತ್ತೆರ್. ಬೊಕ್ಕ ರಾತ್ರೆ ಸುಮಾರ್ 10:00 ಗಂಟೆದ ಅಂದಾಜಿಗ್ ಲೇಡಿಗೋಶನ್ ಆಸ್ಪತ್ರೆದ ಕೈತಲ್ ಬಸ್ ಸ್ಟಾಪ್‌ಡ್ ಕುಲೊಂದು ಮೊಬೈಲ್ ಫೋನ್ ತೂವೊಂದಿತ್ತೆರ್. ಈ ಪೊರ್ತುಗು ಅಡೆ ಬತ್ತಿನ ಆರೋಪಿ ಇರ್ಷಾದ್, ಮಲಯಾಳಂ ಭಾಷೆಡ್ “ಮುಲ್ಪ ದಾದ ಮಲ್ತೊಂದುವಲ್ಲ?” ಪನ್ದ್ ಕೇನ್ದೆ. ಅಯಿಕ್ ಸಿರಾಜು ಮೊಬೈಲ್ ತೂವೊಂದುಲ್ಲೆ ಪನ್ದ್ ಪನ್ತೆರ್.

ಅಪಗ ಆರೋಪಿ “ಮೊಬೈಲ್ ಫೋನ್ ತೂಯೆರ ಕೊರ್ಲ” ಪನ್ದ್ ಕೇನ್ದಿತ್ತ್‌ದ್, ಸಿರಾಜು ನಿರಾಕರಿತ್‌ದೆರ್. ಇಂದೆರ್ದಾವರ ಪಿಸ್‌ರಾಯಿನ ಆರೋಪಿ, “ಫೋನ್ ಕೊರ್ಜಂಡ ನಿನನ್ ಬುಡ್ಪುಜಿ” ಪನ್ದ್ ಪೋಡಿಕಟ್ಟಾದೆ. ಸಿರಾಜು ಮೊಬೈಲ್ ಕೊರಂದಿನೆಕ್ ಪಿಸ್‌ರಾದ್ ಆರೋಪಿ ಇರ್ಷಾದ್, ಆಯಡ ಇತ್ತಿನ ಬೀಸತ್ತಿದ್ ದೆತ್ತ್‌ದ್ “ನಿನನ್ ಕೆರ್ಪೆ” ಪನ್ದ್ ಸಿರಾಜು ನ ಕೆಕ್ಕಿಲ್‌ಗ್ ಬೀಸತ್ತಿ ಪಾಡ್ರೆ ಬತ್ತ್‌ದೆ. ದಾಳಿರ್ದ್ ಸಿರಾಜು ತಪ್ಪಾವೊನರೆ ತೂನಗ, ಬೀಬತ್ತಿ ಆರೆನ ಮೂಂಕುದ ಎಡತ ಮಿಯಿಕ್ ಕೊಲ್ತ್‌ದ್ ಮೂಂಕುಗು ಗಡಿ ಆತ್ಂಡ್.

ಕುಡೊರ ಕುತ್ತೆರ ಬನ್ನಗ ಸಿರಾಜು ಕೈ ಅಡ್ಡ ಪತ್ತ್‌ದಿತ್ತ್‌ದ್, ಈ ಪೊರ್ತುಡು ಬಲಕೈಕ್ ಗಾತಿದ ಗಡಿಯಾತ್ಂಡ್. ಸಂತ್ರಸ್ತನ ಬುಲಿಪು ಕೇನ್ದ್ ಕೈತಲ್ ಇತ್ತಿನ ಸಾರ್ವಜನಿಕೆರ್ ಬಲಿತೊಂದು ಬತ್ತ್‌ದೆರ್. ದಾಳಿ ಮಲ್ತಿನಾಯನ ಪುದರ್ ಇರ್ಷಾದ್ ಪನ್ದ್ ಅಲ್ಪ ಇತ್ತಿನಕುಲು ಪನ್ತೆರ್. ಅಪಗನೇ ಸಾರ್ವಜನಿಕೆರ್ ಗಡಿಕುಲಾತಿನ ಸಿರಾಜು ಮೆರೇನ್ ಆಂಬ್ಯುಲೆನ್ಸ್ ಡ್ ವೆನ್‌ಲಾಕ್ ಆಸ್ಪತ್ರೆಗ್ ಲೆತೊಂದು ಪೋದು ಮರ್ದ್ ಮಲ್ಪಾದೆರ್. ನಡಪುದ ಬಗೆಟ್ ಸಿರಾಜು ಬರೆಪಾದಿನ ಒಯಿಲ್‌ದ ಆಧಾರೊಡು ಪೊಲೀಸೆರ್ ಕೆರ್ಪುನ ಪುನೆಪು (Attempt to Murder) ಸೇರ್ದೊ ಬೇತೆ ಬೇತೆ ಕಠಿಣ ಕಾಯ್ದೆಲೆನ ಅಡಿಟ್ ಪ್ರಕರಣ ದಾಕಲ್ತೊಂದು, ದೆಂಗ್‌ತಪ್ಪಾದಿನ ಆರೋಪಿ ಇರ್ಷಾದ್‌ನ್ ಪತ್ತೆರೆ ಬೇಪು ಪಾಡ್ದೆರ್.