Last updated on August 29th, 2022 at 06:10 am
ಐತಾರೊದಾನಿ ನಡತಿನ ಭಾರತ – ಪಾಕಿಸ್ತಾನ ಕ್ರಿಕೆಟ್ ಮ್ಯಾಚ್‌ಡ್ ಭಾರತ ಅಕೇರಿದ ಓವರ್‌ಡ್ ಪಾಕಿಸ್ತಾನೊನು ಐನ್ ವಿಕೆಟ್‌ರ್ದ್ ಸೋಪಾದ್ ಕರಿನ ಮ್ಯಾಚ್‌ದ ಪಗೆ ತೀರ್ಸಾವೊಂಡು.
ಮ್ಯಾಚ್ ಗೆಂದೆರೆ ಭಾರತೊಗು 20 ಓವರ್‌ಡ್ 148 ರನ್ ಬೋಡಿತ್ತ್ಂಡ್. ಆಲ್‌ರೌಂಡರ್ಸ್ ರವೀಂದ್ರ ಜಡೇಜಾ ಬೊಕ್ಕ ಹಾರ್ದಿಕ್ ಪಾಂಡ್ಯೆರ್ನ ಗೊಬ್ಬು ಪಾಕಿಸ್ತಾನೊದ ಗೆಲ್ಮೆದ ಕನೊನು ಪೊಡಿಮಲ್ತ್ಂಡ್. 20 ಓವರ್‌ಗ್ ನನಲಾ 2 ಬಾಲ್ ಇಪ್ಪುನಗನೇ ಭಾರತ ಈ ಮ್ಯಾಚ್ ಗೆಂದ್‌ದ್ ಪಾಕಿಸ್ತಾನೊದ ಎದ್‌ರ್ ಈತ್‌ನೇಟದ ಮಲ್ಲ ರನ್‌ಚೇಸ್‌ದ ದಾಖಲೆ ಮಲ್ತ್ಂಡ್.
ಪಾಕಿಸ್ತಾನೊದ ಕಡೆರ್ದ್ ಮೊಹಮ್ಮದ್ ರಿಜ್ವಾನ್ (43) ಬೊಕ್ಕ ಇಫ್ತಿಕರ್ ಅಹ್ಮದ್ (28) ಬುಡ್ಂಡ ಬೇತೆ ಏರ್ಲಾ ಮಲ್ಲ ರನ್ ಮಲ್ತಿಜೆರ್. ಭಾರತೊದ ಕಡೆರ್ದ್ ಬೌಲಿಂಗ್‌ಡ್ ಭುವನೇಶ್ವರ್ ಕುಮಾರ್ 4, ಹಾರ್ದಿಕ್ ಪಾಂಡ್ಯ 3, ಅರ್ಷದೀಪ್ ಸಿಂಗ್ 2 ಬೊಕ್ಕ ಆವೇಶ್ ಖಾನ್ 1 ವಿಕೆಟ್ ಪಡೆಯೊಂಡೆರ್.
148 ರನ್ ಚೇಸ್‌ಗ್ ಜತ್ತಿನ ಭಾರತೊಗು ಕೆ ಎಲ್ ರಾಹುಲ್ ಕಡೀರ್ದ ಬಾಲ್‌ಗ್ ಔಟ್ ಆದ್ ಮಲ್ಲ ತೆಡಿಲ್‌ದ ಪೆಟ್ಟ್ ಕೊರ್ಯೆರ್. ಬೊಕ್ಕ ಒಂಜಾಯಿ ರೋಹಿತ್ ಶರ್ಮಾ ಬೊಕ್ಕ ವಿರಾಟ್ ಕೊಹ್ಲಿ ಎಡ್ಡೆ ಕಲ ಪಾಡ್ದ್ ಕೊರ್ಯೆರ್. ಸೂರ್ಯಕುಮಾರ್ ಯಾದವ್‌ನ ಗೊಬ್ಬು ಪೋಡಿಗೆ ಪುಟ್ಟಾವು ಲೆಕ ತೋಜಿಂಡಲಾ ಎಚ್ಚ ಸಮೆ ನಡತಿಜಿ. ಸೋಲ್‌ದ ಸುಳಿಟ್ ತಿಕಲೊಂದಿತ್ತಿನ ಭಾರತೊನು ರವೀಂದ್ರ ಜಡೇಜಾ ಬೊಕ್ಕ ಹಾರ್ದಿಕ್ ಪಾಂಡ್ಯ ಗೆಲ್ಮೆದ ಕರೆ ಸೇರಾಯೆರ್. ಪಾಂಡ್ಯ ಕಾಲಿ 17 ಚೆಂಡ್‌ಡ್ ರಣತ ಲೆಕ ಗೊಬ್ಬುದ್ 33 ರನ್ ಒಟ್ಟು ಮಲ್ತೆರ್. ಪಾಕಿಸ್ತಾನೊದ ಕಡೆರ್ದ್ ಮೊಹಮ್ಮದ್ ನವಾಜ್ 3 ಬೊಕ್ಕ ನಸೀಮ್ ಷಾ 2 ವಿಕೆಟ್ ಮಾತ್ರ ಪಡೆಯೊಂಡೆರ್.