Last updated on June 18th, 2024 at 08:57 pm
ಉಬಾರ್: ಪೆರ್ನೆ ಗ್ರಾ.ಪಂ. ಸೀಮೆದ ಬೆಳಿಯೂರ್‌ದ ದರ್ಕಾಸ್ ಪನ್ಪಿನವುಲು ಪೊಂಜೊವು ಒರ್ತಿನ್ ನಾಲಿಡ್ ಪತ್ತ್‌ದ್ ಕೆರ್ತಿನ ನಡಕೆ ನಡತ್‌ದಿತ್ತ್‌ದ್, ಆರೆನ ಪಲಿನ ಮಗೆ ಅಪ್ರಾಪ್ತ ಪ್ರಾಯೊದ ಆಣನ ಮಿತ್ತ್ ಬಾರೀ ಸಂಶಯ ಉಂಡಾತ್ಂಡ್.
ದರ್ಕಾಸ್‌ದ ಕಮಲಾ ಪನ್ಪಿನಾರೆನ ಮಗಲ್ ಹೇಮಾವತಿ (37) ತೀರ್ದಿನಾರ್. ಮೇರ್ ಜೂ.16ತಾನಿ ನಡಿರ್ ಕರಿ ಬೊಕ್ಕ ಹೃದಯಾಘಾತೊಡು ತೀರ್ದೆರ್ ಪನ್ಪಿ ಸುದ್ದಿ ಪರಡ್‌ದಿತ್ತ್‌ದ್, ಆಂಡ ಮೆರೆನ ಸಾವುದ ಬಗೆಟ್ ಪಾಕ ಅನುಮಾನೊಲು ಮೂಡಿನೆರ್ದಾವರ ಪೊಲೀಸೆರ್ ಜಾಗೆಗ್ ಬತ್ತ್‌ದ್, ಮಹಜರ್ ಮಲ್ತಿತ್ತ್‌ದ್, ಆ ಪೊರ್ತುಡು ಮೆರೆನ್ ರಾತ್ರೆರ್ದ್ ಕಾಂಡೆದ ನಡುಟು ಕೆಕ್ಕಿಲ್ ಪೊಜೆಂಕ್‌ದ್ ಕೆರ್ತೆರ್ ಪನ್ದ್ ಸಾಬೀತ್ ಆತ್ಂಡ್. ಈ ಕೊಲೆ ಪ್ರಕರಣೊಗು ಸಂಬಂಧಿತ್‌ದ್ ಆ ರಾತ್ರೆ ಆ ಇಲ್ಲಡಿತ್ತಿನ ಹೇಮಾವತಿ ಮೆರೆನ ಪಲಿನ ಮಗೆ ಎಸ್ಸೆಸ್ಸೆಲ್ಸಿ ಕಲ್ತೊಂದುಪ್ಪುನ ಅಪ್ರಾಪ್ತ ಆಣನ ಮಿತ್ತ್ ಸಂಶಯ ಬತ್ತಿತ್ತ್‌ದ್, ನಡಕೆದ ಇಸಯೊಡು ಈ ಆಣ್, ಅಮ್ಮೆರ್ ಶಂಕರೆ ಅಂಚೆನೇ ಆರೆನ ಇರ್ವೆರ್ ಮಗನಕ್ಲೆನ್ ಉಬಾರ್ ಪೊಲೀಸೆರ್ ವಿಚಾರಣೆ ಮಲ್ತೊಂದುಲ್ಲೆರ್. ಪೊಲೀಸೆರೆ ಎಚ್ಚಿನ ವಿಚಾರಣೆ ಆಯಿಬೊಕ್ಕನೇ ಈ ಕೊಲೆ ಮಲ್ತಿನಕುಲೇರ್ ಪಂದ್ ತೆರಿದ್ ಬರೊಡಾತೆ.
ಸಂಶಯಕ್ಕೆ ದಾಯೆ?:
ಜೂ.17ತ ಕಾಂಡೆ ಸುಮಾರ್ 6.30ಕ್ಕ್ ಶಂಕರೆ ಮೇರ್ ತೀರ್ದಿನ ಹೇಮಾವತಿಯೆರೆನ ಇಲ್ಲದ ಬರಿತಿಲ್ಲಗ್ ಪೋದು, ಹೇಮಾವತಿಯೆರ್ ಹೃದಯಾಘಾತೊಡು ತೀರ್ದೆರ್ ಪಂದ್ ಪಂಡಿನತ್ತಂದೆ, ತನ್ನ ಮಗನ ಮಿತ್ತ್‌ಲಾ ಪರಂಕ್‌ದಿನ ಗುರ್ತ ಉಂಡು ಪಂದ್ ಪಂತೆರ್. ಅಪಗ ಆ ಇಲ್ಲದಕುಲು ಈ ಇಸಯೊನು ಈರ್ ಪೊಲೀಸೆರೆಗ್ ತೆರಿಪಾಯಿಜರ್ನ್ಡ, ಎಂಕ್ಲು ತೆರಿಪಾವೊಡಾಪುಂಡು ಪಂದ್ ಪನ್ನಗ, ಯಾನೇ ಪನ್ಪೆ ಪಂದ್ ಪಂಡ್‌ದ್ ಅಲ್ಪರ್ದ್ ಬತ್ತ್‌ದ್ ಪೊಲೀಸೆರೆಗ್ಲಾ ವಿಷಯ ತೆರಿಪಾದೆರ್. ಈ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ತಿನಗ ಪೊಂಜೊವುನು ಕೆಕ್ಕಿಲ್ ಪೊಜೆಂಕ್‌ದ್ ಕೆರ್ತಿನ ಮಿತ್ತ್‌ರ್ದ್ ದೃಢ ಆತ್ಂಡ್. ನಡಕೆದ ಬಗೆಟ್ ಆ ರಾತ್ರೆ ಇಲ್ಲಡ್ ಆತ್ತಿನ ಈ ಅಪ್ರಾಪ್ತ ಆಣ್, ಆಯನ ಅಮ್ಮೆ ಶಂಕರೆ ಅಂಚೆನೇ ಶಂಕರನ ಕುಡ ಇರ್ವೆರ್ ಜೋಕುಲೆನ್ ಸ್ಟೇಶನ್‌ಗ್ ಲೆತೊಂದು ಪೋದು ಉಬಾರ್ ಪೊಲೀಸೆರ್ ಮೊಕ್ಲೆನ ತೀವ್ರ ವಿಚಾರಣೆ ಮಲ್ದೆರ್. ನಡಕೆದ ಜಾಗೆಗ್ ಎಚ್ಚಿಗೆದ ಪೊಲೀಸ್ ಅಧೀಕ್ಷಕೆರಾಯಿನ ಜಗದೀಶ್ ಬತ್ತ್‌ದ್, ಪರಿಶೀಲನೆ ಮಲ್ದೆರ್.
