ಟ್ವೀಟ್ ತುಳುನಾಡ್ ಅಭಿಯಾನ – ನರೇಂದ್ರ ಮೋದಿಡ ತುಳುವೆರ್ನ ಬೇಡಿಕೆ ದಾದ?

Last updated on August 29th, 2022 at 01:23 pm

ತುಳುನಾಡ್ದ ಮಾತಾ ಸಂಘಟನೆಲು ಒಂಜಾರ್ಮೆಡ್ ಪ್ರೆಸ್ ಮೀಟ್ ಮಲ್ತ್ ಕೆಲವು ಹಕ್ಕೊತ್ತಾಯ ಮಲ್ದೆರ್. ತುಳುವೆರ್ ಮಾತಾ ಸೇರ್ದ್ ನರೇಂದ್ರ ಮೋದಿ ಮೇರ್ ತುಳುನಾಡ್ ಗ್ ಬರೊರ್ದು ದುಂಬು ತುಳು ಬಾಸೆ ಕರ್ನಾಟಕೊಡು ಅಧಿಕೃತ ಆಪಿನ ಅಂಚೆನೆ ಬೊಕ್ಕ 8ನೇ ಪರಿಶ್ಛೇದೊಗು ಸೇರುನೆತ್ತ ಬಗೆಟ್ ಅರೆಗ್ ಎಂಕ್ಲೆನ ದುನಿಪು ಎತ್ತುನಡೆಮುಟ್ಟ ಟ್ವೀಟ್ ಮಲ್ಪೊಡು ಪಂಡೆರ್.

ಕರ್ನಾಟಕ ರಾಜ್ಯ ಆದ್, ತುಳುನಾಡ್ ದ ಮಲ್ಲ ಬಾಗ ಕರ್ನಾಟಕ ಸೇರ್ದ್ 1956ರ್ದ್ ಇದಮುಟ್ಟ ನನಲ ನಮಕ್ ನಮ್ಮ ಬಾಸೆಗ್ ಒತ್ತು ಅಧಿಕಾರೊದ ಬಾಸೆಯಾದ್ ಮಾನಾದಿಗೆ ಕೊರಿಯರೆ ಆಯಿಜಿ. ಸಂವಿಧಾನೊದ ಆರ್ಟಿಕಲ್ 345,346 ಬೊಕ್ಕ 347ತ್ತ ಪ್ರಕಾರ ರಾಜ್ಯೊಲು ತನ್ನ ನೆಲತ ಪರಪೋಕುದ ಸ್ವತಂತ್ರ ಬಾಸೆಲೆಗ್ ರಾಜ್ಯಾಡಳಿತದ ಮಾನಾದಿಗೆ ಕೊರೊಲಿ ಪನ್ದ್ ಉಂಡು. ಇಂಚಪ್ಪೊಗು ಸಿಕ್ಕಿಂ ರಾಜ್ಯೊಡು ಕಾಲಿ 22000 ಜನ ಪಾತೆರುನ ಭುಜೆಲ್ ಬಾಸೆಗ್ ಅಧಿಕೃತ ಮಾನಾದಿಗೆ ಕೊರಿಯೆರ್. ರಾಜ್ಯ ಕೇಂದ್ರೊಡು ಒಂಜೇ ಪಕ್ಷ ಆಡಳಿತೊಡು ಇತ್ತ್’ದ್ ತುಳುನಾಡ್ ದಕುಲು ಮಾತೆರ್ಲಾ ಆಡಳಿತ ಪಕ್ಷದ ಪರ ಇತ್ತ್ಂಡಲಾ ತುಳುವೆರೆ ಬೇಡಿಕೆಗ್ ಬಿಲೆದಾಂತೆ ಪೋಂಡು.

ತುಳು ಒಂಜಿ ಬೇರದ ಬಾಸೆ, ತುಳುನಾಡ್ ದ ಜಾತಿ ಧರ್ಮ ಮೀರ್ದ್ ಮಾತೆರ್ಲಾ ಪಾತೆರುನ ಬಾಸೆ. ಅರವಿಂದ ಲಿಂಬಾವಳಿಯೆರ್ ಸಂಸ್ಕೃತಿ ಇಲಾಖೆದ ಮಂತಿರಿಲಾದುಪ್ಪುನಗ ತುಳುನು ಅಧಿಕೃತ ಮಲ್ಪುನ ಉಮೇದ್ ದೆತೊನುದು ಅವೆತ ಕಜ್ಜ ಸುರು ಮಲ್ದಿತ್ತೆರ್ ಆಂಡ ಆರ್ ಅವ್ ಇಲಾಖೆರ್ದ್ ಪೋಯಿನೇ ಉಂದು ಬೇಲೆ ಕೋಡಿ ಸೇರ್ದಿಲೆಕ್ಕ ಉಂಡು. ಪ್ರತಿ ಸಲ ತುಳುವೆರ್ ಕೇನ್ನಗಲ ಪಾತೆರೊನು ಅಡ್ಡಿ ಮಲ್ತ್ ದ್ ದೆಂಗಾವುನ ವಿಷಯ ಆವೊಂದುಂಡು. ಉಂದೆಕ್ ಸ್ಪಷ್ಟ ಉತ್ತರ ಬೋಡು.

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಸಂಸ್ಕೃತಿ , ಬಾಸೆಲೆನ್ ಒರಿಪಾವೊಡು ಪನ್ದ್ ಪನ್ಪೆರ್, ಆಂಡ ಅರೆನ ಪಜ್ಜೆಡ್ ನಡಪೊಡು ಪನ್ಪಿನವು ತಿರ್ತ್ ದ ಒವ್ವೇ ನಾಯಕೆರೆಗ್ ಇಜ್ಜಿ. ತುಳುವೆರೆನ ಸ್ವರ ಪ್ರಧಾನ ಮಂತ್ರಿಗ್ ಎತ್ತ್’ದ್ ನನಾಂಡಲಾ ಆರ್ ರಾಜ್ಯಸರಕಾರೊಗು ನಿರ್ದೇಶನ ಕೊರೊಡು. ನಿರಾಸಕ್ತಿ ತೂಪಾವುನ ತುಳುವ ಪ್ರತಿನಿಧಿನಕಲೆಗ್ ತುಳುನಾಡ ದೈವ ದೇವೆರ್ ಬುದ್ದಿ ಕೊರೊಡು ಪವ್ಪಿನವು ತುಳುವೆರೊನ ಬಿನ್ನಪು.

ಜೈ ತುಳುನಾಡ್, ತುಳುನಾಡ್ ಒಕ್ಕೂಟ, ಯುವ ತುಳುನಾಡ್, ತುಳುವೆರ್ ಕುಡ್ಲ, ತುಳುನಾಡ್ ನಿರ್ಮಾಣ ಸೇನೆ, ತುಳುವಾಸ್ ಕೌನ್ಸಿಲ್, ತುಳುಪೀಡಿಯಾ ಬೊಕ್ಕ ಸಮಸ್ತ ತುಳುವೆರ್.