Last updated on July 16th, 2024 at 02:37 pm
ಅಂಬಲಪಾಡಿದ ಗಾಂಧಿನಗರದ ಇಲ್ಲೊಂಜೆಟ್ಟ್ ನಡತಿನ ಅಗ್ನಿ ದುರಂತೊಡು ಒಡಿಪುದ ಶೆಟ್ಟಿ ಬಾರ್ ಆಂಡ್ ರೆಸ್ಟೋರೊಂಟ್ ದ ಧನಿ ರಮಾನಂದ ಶೆಟ್ಟಿ ಕೋಡೆ ತೀರ್ ಪೋದಿತ್ತೆರ್. ಈ ದುರಂತೊಡು ಅರೆನ ಬೊಡೆದಿ ಅಶ್ವಿನಿ ಶೆಟ್ಟಿಗ್ ಗಂಭೀರ ಗಾಯ ಆದ್ ಆಸ್ಪತ್ರೆಗ್ ಕೊನೊದಿತ್ತೆರ್. ರಡ್ಡ್ ಜೋಕುಲು ಈ ದುರಂತೊರ್ದು ಅದೃಷ್ಟವಶಾತ್ ಬದ್ಕ್ ದ್ ಬತ್ತೆರ್.
ಇತ್ತೆ ಬತ್ತಿನ ಸಮಾಚಾರದ ಪ್ರಕಾರ ಅಶ್ವಿನಿ ಶೆಟ್ಟಿಲಾ ಮರ್ದ್ ಪಲಿಪಂದೆ ತೀರಿಯೆರ್ ಪನ್ದ್ ತೆರಿದ್ ಬೈದ್ಂಡ್. ಮೇರ್ ತುಳುನಾಡ್ ದ ಸಂಸ್ಕೃತಿ, ಆಚಾರ ವಿಚಾರೊಲೆನ ಬಗೆಟ್ ಜನಕುಲೆಗ್ ಯುಟ್ಯೂಬ್ ಡ್ ತೆರಿಪಾವುನ ಬೇಲೆ ಮಲ್ತೊಂದಿತ್ತೆರ್. ಇಂಚೊಗು ಆತೇ ಒಡಿಪು ನಗರದ ಮಹಿಳಾ ಮೋರ್ಚಾದ ಗುರ್ಕಾರ್ದಿಯಾದಿತ್ತೆರ್. ಶಾರ್ಟ್ ಸರ್ಕೂಟ್ ಆದ್ ಇಲ್ಲದುಲಾಯಿದ ಸೆತ್ತುಲು ಪೂರಾ ಪೊತ್ತುದು ರಮಾನಂದೆರ್ ಅಂಚೆನೆ ಅಶ್ವಿನಿ ಮೊಕುಲು ಮತಿ ತತ್ತ್ ದ್ ಬೂರ್ದಿತ್ತೆರ್. ಜೋಕುಲು ಬೆಂದುರುದುಲಾಯಿ ಕುಲ್ದ್ ಈ ದುರಂತೊರ್ದು ತಪ್ಪಾವೊಂದಿತ್ತೆರ್. ರಮಾನಂದೆರ್ ಹೃದಯಾಘಾತ ಆದ್ ತೀರಿಯೆರ್ ಅಂಚೆನೆ ಇತ್ತೆ ಅಶ್ವಿನಿಲಾ ಮರ್ದ್ ಪಲಿಪಂದೆ ತೀರಿಯೆರ್.