Last updated on July 23rd, 2024 at 07:41 pm
ಪುಂಜಾಲಕಟ್ಟೆ, ಜು 23: ದೈವೊಲೆನ ಕಾರಣಿಕೊರ್ದು, ನಡಪರೆಗಿತ್ತಿನ ಮಾಮಲ್ಲ ಅಪಾಯ ಒಂಜಿ ತಲಾದ್ ಪೋಯಿನ ನಡಕೆ ಸಿದ್ದಕಟ್ಟೆ ಮುಟ್ಟದ ಕೊನೆರಬೊಟ್ಟುಡು ನಡತಿತ್ತ್‌ದ್ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್.
ಸಿದ್ದಕಟ್ಟೆ ಬಂಟೆರ ಸಂಘೊದ ಕಡೆರ್ದ್ ಕೆಸರ್‌ಕಂಡೊದ ಗೊಬ್ಬು ಅಟ್ಟನೆ ಆದಿತ್ತ್‌ದ್ , ಪ್ರತೀ ವರ್ಸೊದ ಲೆಕ ಕೆಸರ್ ಕಂಡೊದ ಗೊಬ್ಬುಗು ದುಂಬು ಕೊನೆರಬೊಟ್ಟು ಜಾಗೆದ ಸತ್ಯೊಲೆಗ್ ಪರ್ವ ಮಲ್ತ್‌ದ್ ಪ್ರಾರ್ಥನೆ ಮನ್ಪುನ ಕ್ರಮ ಮಲ್ತೊಂದು ಬೈದೆರ್.
ಈ ಸರ್ತಿಲಾ ಐತಾರ ಕೆಸರ್ ಕಂಡ ಕೂಟೊಗು ದುಂಬು ಪ್ರಾರ್ಥನೆ ಮಲ್ತಿತ್ತೆರ್. ಗೊಬ್ಬು ನಡಪುನ ಕಂಡೊದ ಮಿತ್ತ್‌ಡೆನೆ ಹೈಟೆನ್ಷನ್ ಕರೆಂಟ್ ವಯರ್ ಪೋಪುಂಡು. ಉಂದೆನ್ ತೂಯಿನ ಆಯೋಜಕೆರ್ ಕ್ರೀಡಾಕೂಟೊಡು ವಾಲಿಬಾಲ್‌ದಂಚಿನ ಗೊಬ್ಬುಲು ಇಪ್ಪುನೆರ್ದಾವರ ಗೊಬ್ಬುದ ದಿನೊತಾನಿ ಈ ಲೈನ್‌ಡ್ ಕರೆಂಟ್ ದೆಪ್ಪೆರೆ ಮೆಸ್ಕಾಂ ಇಲಾಖೆಗ್ ಬಿನ್ನೈತಿತ್ತ್‌ದ್ ಲೈನ್ ಕಟ್ ಮಲ್ಪಾದಿತ್ತೆರ್.
ಸೋದ್ಯ ಪಂಡ ಐತಾರ ಗೊಬ್ಬು ನಡತೊಂದುಪ್ಪುನಗನೇ ಭಾರೀ ಗಾಳಿ ಬತ್ತ್‌ದ್ ಕರೆಂಟ್‌ದ ಕುಂದ ಪೊಲಿದ್ ವಯರ್‌ದ ಒಟ್ಟುಗು ಕಂಡೊಗು ಬೂರ್ದುಂಡು. ಕಂಡೊಡು ಜೋಕುಲು ಜವನೆರ್ ಸೇರ್ದ್ ಸುಮಾರ್ ಐನೂದು ಜನ ಸೇರ್ದಿತ್ತೆರ್. ಆಂಡ ದುಂಬೇ ಲೈನ್ ಕಟ್ ಮಲ್ತಿತ್ತಿನೆರ್ದಾವರ ಒವ್ವೇ ಅನಾಹುತ ನಡತ್‌ದಿಜಿ. ಆಯೋಜಕೆರೆಗ್ ಜಾಗೆದ ದೈವೊಲು ದುಂಬೇ ಸೂಚನೆ ಕೊರ್ದಿಪ್ಪೊಡು! ತುಳುನಾಡ್‌ದ ದೈವೊಲೆನ ಕಾರಣಿಕ ಇಪ್ಪುನೆಕ್ ಉಂದೊಂಜಿ ಸ್ಪಷ್ಟ ನಿದರ್ಶನ ಪಂದ್ ಆಯೋಜಕೆರ್ ತೆರಿಪಾದೆರ್. ಈ ನಡಕೆ ಇತ್ತೆ ಪಾಕ ವೈರಲ್ ಆತ್ಂಡ್.