Last updated on July 24th, 2024 at 07:41 am
ಬೆಂಗಳೂರು: ತುಳು ಭಾಷೆನ್ (Tulu language) 2ನೇ ಎಚ್ಚಿಗೆದ ಅಧಿಕೃತ ಭಾಷೆಯಾದ್ ಘೋಷಣೆ ಮನ್ಪುಲೆ ಪಂದ್ ಕಾಂಗ್ರೆಸ್ ಶಾಸಕೆ ಅಶೋಕ್ ರೈಕುಲು ವಿಧಾನಸಭೆಟ್ ಒಸ ಪತ್ತಿಯೆರ್. ತುಳುಟೇ ಪಾತೆರ್ದಾ ಅಶೋಕ್ ರೈ (Ashok Kumar Rai) ಬಿನ್ನಪು ದೀಯೆರ್. ಅಂಚಿರ್ದ್ ಸ್ಪೀಕರ್ ಯು.ಟಿ ಖಾದರ್‌ (UT Khader) ಲಾ ತುಳುಟೇ ಸ್ಪಷ್ಟನೆ ಕೊರ್ಯೆರ್.
ಈ ಪೊರ್ತುಡು ನಿಕುಲಿರ್ವೆರೇ ಪಾತೆರ್ನ್ಡ ಎಂಚ? ಎಂಕ್ಲು ನಿಕ್ಲೆನ ಭಾಷೆ ಎಂಚ ಪಿಂದೊನೊಡು? ಪಂದ್ ಕೆಲ ಶಾಸಕೆರೆ ಚದಿತ ಪಾತೆರಲಾ ಸದನೊಡು ಕೇಂದ್ ಬತ್ತ್ಂಡ್. ನಿಕುಲು ದಾದ ಪಾತೆರ್ಯರ್ ಎಂಕ್ಲೆಗ್ ಗೊತ್ತಾಯಿಜಿ. ನಮ ದಾದ ಕುಡ್ಲದ ಅಧಿವೇಶನೊಡು ಉಲ್ಲನಾ? ಪಂದ್ ಪ್ರತಿಪಕ್ಷ ನಾಯಕೆ ಆರ್. ಅಶೋಕ್ (R Ashoka) ಜೋರು ಮಕ್ಕರ್ ಮಲ್ತ್ ತೆಲ್ತ್‌ದ್, ಕನ್ನಡೊಡು ಪಾತೆರ್ಲೆ ಪಂಡೆರ್.
ಈ ಪೊರ್ತುಡು ವೇದವ್ಯಾಸ ಕಾಮತೆರ್ಲಾ (Veda Vyasa Kamath) ತುಳುತ ಪರವಾದ್, ಅಶೋಕ್ ರೈಕ್ಲೆನ ಪರವಾದ್ ತುಳುಟೇ ಪಾತೆರ್ಯೆರ್. ಶಾಸಕೆ ಅಶೋಕ್ ರೈಕುಲು ಪಂಡಿನಂಚ 2ನೇ ಅಧಿಕೃತ ಭಾಷೆ ಮನ್ಪುಲೆ ಪಂದ್ ಸದನೊಡು ಕೈಮುಗಿದ್ ಕೇಂಡೊಂಡೆರ್.
ಈ ಇಸಯೊಗು ಸಂಬಂಧಿತಿನ ಕನಾಪಡ ಇಲಾಖೆದ ಸಚಿವೆ ತಂಗಡಗಿ ಇಜ್ಜಂದಿನೆರ್ದಾವರ ಪ್ರಿಯಾಂಕ್ ಖರ್ಗೆ ಸದು ಕೊರ್ದು, ಬೇತೆ ರಾಜ್ಯೊಲೆಡ್ ಎರಡು ಭಾಷೆಲು ಉಲ್ಲ. ಬಿಹಾರೊಡ್ಲಾ ರಡ್ಡ್ ಭಾಷೆಲು ಉಲ್ಲ, ಸ್ವಂತ ಕರ್ಚಿಡ್ ಅಧ್ಯಯನ ಮಲ್ತ್ ರಿಪೋರ್ಟ್ ಕನತ್‌ದೆರ್. ತುಳು ಭಾಷೆದ ಪ್ರಾಚೀನತೆ ಇತಿಹಾಸ ಎಂಕ್ ಗೊತ್ತುಂಡು. ನನ್ನ ಎಲ್ಯ ಪ್ರಾಯೊದ ಪಾಸಾಡಿ ಶ್ರವಣ್ ರೈ ಪನ್ಪಿನ ತುಳುವೆ ಒರಿ ಇತ್ತೆರ್. ಎಂಕ್ಲೆ ಎದುರು ಆರೆಗ್ ಆರೆನ ಅಪ್ಪೆ ತುಳುಟೇ ನೆರೊಂದಿತ್ತೆರ್. ಅಂಚಾಜ್ ನಿಕುಲು ದಾದ ಪಾತೆರ್ಯರ್ ಪಂದ್ ಎಂಕ್ ಅರ್ಥ ಆತ್ಂಡ್. ಯಾನ್ ಉಂದೆತ ಪರವಾದ್ ಉಲ್ಲೆ. ಎಲ್ಲೆನೇ ಸಚಿವೆರೆ ಗೇನೊಗು ಕನಪೆ. ಸಭೆ ಮಲ್ತ್‌ದ್ ನಿರ್ಧಾರ ಮನ್ಪುವ, ಪಂದ್ ಸದನೊಗು ಪ್ರಿಯಾಂಕ್ ಖರ್ಗೆ ಸದು ಕೊರ್ಯೆರ್.