Last updated on August 14th, 2024 at 08:26 am
ಅಂದ್ ಅಂದ್! ಹೆಡಿಂಗ್ ಸಮ ಓದಿಯರ್. ಇಂಚಿಪ ಇಡೀ ದೇಸೊಡೇ ಮಲ್ಲ ಸುದ್ದಿ ಇತ್ತಿನಿ ಮುಕೇಶ್ ಅಂಬಾನಿಯೆರೆನ ಮಗೆ ಅನಂತ್ ಅಂಬಾನಿನ ಮದಿಮೆದ. ಏರ್ ಪೋತೆರಾ ಇಜ್ಜಾ, ಆಂಡ ಅವೆತ ಬಗೆಟ್ ಪಾತೆರಂದಿನಕುಲೆನ್ ಪಜಿಸೂಟೆ ಪತೊಂದು ನಾಡೊಡಾತೆ. ಅವು ಬುಡ್ಕ ಈ ತುಳುನಾಡ ಅಟಿಲ್‌ದ ಕತೆಕ್ ಬರ್ಕ.
ತುಳುತ ಕಟೆಂಟ್ ಕ್ರಿಯೇಟರ್ ಪುದರ್‌ಗ್ ತಕ್ಕ ಪವರ್‌ಫುಲ್ ಕಟೆಂಟ್‌ಲೆನ್ ಕೊರ್ಪುನ ಪವರ್‌ಹೌಸ್ ವೈನ್ಸ್ ಪುಗರ್ತೆದ ಶರಣ್ ಚಿಲಿಂಬಿ, ತನ್ನ ಪಾಡ್‌ಕಾಸ್ಟ್ ಕಜ್ಜ, ‘ಚಿಲ್ಲಿಂಗ್ ವಿದ್ ಚಿಲಿಂಬಿ’ಡ್ ಕೋರಿ ರೊಟ್ಟಿ ಗರ್ಲ್ ಪಂದೇ ಪುದರಾತಿನ ಷೆಫ್ ಶ್ರೀಯಾ ಶೆಟ್ಟಿಡ ಪಾತೆರೊಂದಿತ್ತೆರ್. ಆ ಪಾತೆರಕತೆದ ನಡುಟೇ ಶರಣ್ ಅಂಬಾನಿನ ಮದಿಮೆದ ದಾದೆ ಸೀನ್ ಪಂದ್ ಕೇನ್ನಗ ಶ್ರೀಯಾ ಶೆಟ್ಟಿ ಈ ಸುದ್ದಿನ್ ತೆರಿಪಾದೆರ್.
ಜಾಮ್‌ನಗರ್‌ಡ್ ನಡತಿನ ಅಂಬಾನಿನ ಮದಿಮೆದ ಪ್ರಿ-ವೆಡ್ಡಿಂಗ್‌ಗ್ ಮೊಕಲೆಗ್ಲಾ 6 ದಿನೊತ ಅಟಿಲ್‌ಗ್ ಲೆಪ್ಪು ಬತ್ತಿತ್ತ್ಂಡ್‌ಗೆ. ಅವು ಅಂಬಾನಿನಕಲೆನನೇ ಲೇಸ್ ಪಂದ್ ಗೊತ್ತಿಜ್ಜಿಂಡಲಾ ಒತ್ತೊಂದು ಪೋಪೆರ್. ತೂನಗ ಅವು ಮಾತೆರ್ಲಾ ಛೇ! ನಮನ್ಲಾ ಲೆತ್ತುದುವೆರ್ ಮಾರೆ ಂದ್ ಪನೊಂದಿತ್ತಿನ ಅವ್ವೇ ಅಂಬಾನಿನಕ್ಲೆನ ಮದಿಮೆ. ಆತ್ ಮಲ್ಲ ಲೇಸ್‌ಗ್ ಒಂಜೇ ಕಡೆಟ್ ಅಟಿಲ್ ಮನ್ಪುನ ಆಪುನ ಪೋಪುನವಾ? ಅಂಚ 6 ಕಡೆಟ್ ಅಟಿಲ್‌ದ ಅಟ್ಟನೆ ಆದಿತ್ತ್ಂಡ್. ಅವೆಟೊಂಜಿ ಕಡೆತ ಒಂಜಿ ಸೆಕ್ಷನ್ ನಮ್ಮ ಬೊಂಬಾಯಿಡ್ ಪುಟ್ಟುದು ಬಲತಿನ ತುಳುವೆದಿನ. ನನ ಮೆನುಟ್ ದಾದ ಮಾತ ಇತ್ತ್ಂಡ್ ಪಂದ್ ಕೇಂಡರ್ನ್ಡ ನೀರ್‌ದೋಸೆ(ತೆಲ್ಲಾವು), ಕಡ್ಲೆ ಬಜಿಲ್, ತೆಕ್ಕರೆದ ಅಡ್ಯೆ, ಪೆಲಕಾಯಿದ ಗಟ್ಟಿ, ಕೋರಿ ರೊಟ್ಟಿ, ಕೋರಿ ಸುಕ್ಕ, ಕಡ್ಲೆ ಸುಕ್ಕ, ಘೀ ರೋಸ್ಟ್ ಇಂಚ ನಮ್ಮ ತುಳುನಾಡ ತೆನಸ್‌ಲೆನ್ ಮಲ್ತಿತ್ತೆರ್‌ಗೆ.
ಲೋಕೊರ್ಮೆದ ಮಲ್ಲ ಮಲ್ಲ ಜನೊಕುಲು ಬೈದಿನ ಮದಿಮೆ, ಅಲ್ಪ ತುಳುನಾಡ ಅಟಿಲ್‌ದ ಸೆಬಿ ಏರ್ ಮಾತ ತೂತೆರ್ ಪಂದ್ ಕೇಂಡಿನೆಕ್ ಶ್ರೀಯಾ, ಸುನೀಲ್ ಶೆಟ್ಟಿ, ರಿತೇಶ್ ದೇಶ್‌ಮುಖ್, ಜೆನೇಲಿಯಾ, ಹಾರ್ದಿಕ್ ಪಾಂಡ್ಯಾ, ರೋಹಿತ್ ಶರ್ಮಾ, ಟೈಗರ್ ಶ್ರಾಫ್ ಇಂಚ ಮಲ್ಲ ಮಲ್ಲ ಸೆಲೆಬ್ರಿಟಿಲು ಬತ್ತ್‌ದ್ ಗುಜರಾತ್‌ಡ್ ನಮ್ಮ ಊರ್‌ದ ತೆನಸ್‌ದ ಸೆಬಿ ತೂತೆರ್ ಪಂದ್ ಪಂಡೆರ್.
ಮೊಕುಲಿರ್ವೆರೆನ ಪಾತೆರಕತೆತ ಪಾಡ್‌ಕಾಸ್ಟ್‌ಡ್ ನನಲಾ ಪಾಕ ಇಸಯೊಲು ಇತ್ತ, ಎಂಕ್ಲ ಮುಲ್ಪ ಪೆಜ್ಜಿದ್ ಕೆಲ ಇಸಯ ಮಾತ್ರ ಬರೆತ. ಆ ಪಾತೆರಕತೆನ್ ಪವರ್‌ಹೌಸ್ ಯೂಟ್ಯೂಬ್ ಚಾನೆಲ್‌ಡ್ ತೂವೊಲಿ.