Last updated on September 14th, 2024 at 11:01 am
ಕುಡ್ಲ : ತುಳುನಾಡ್‌ದ ಪ್ರಾಥಮಿಕ ಬೊಕ್ಕ ಪ್ರೌಢ ಶಾಲೆಲೆಡ್ ತುಳು ಕಲ್ಪಾವುನ ತುಳು ಶಿಕ್ಷಕೆರೆಗ್ 2023 ನೇ ಸಾಲ್‌ದ ಗೌರವ ಧನೊ 10 ಲಕ್ಷ ರೂ. ಬುಡುಗಡೆ ಆತ್ಂಡ್.
ತುಳು ಅಕಾಡೆಮಿ ವಾರ್ಷಿಕ ಕಾರ್ಯಕ್ರಮೊಲೆನ ಅನುದಾನೊರ್ದು ಈ ಕಾಸ್‌ನ್ ಬುಡುಗಡೆ ಮಲ್ದ್ಂಡ್ ಪಂದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ತಾರಾನಾಥ್ ಗಟ್ಟಿ ಕಾಪಿಕಾಡ್ ಮೇರ್ ತೆರಿಪಾಯೆರ್.
ತುಳು ಶಿಕ್ಷಕೆರೆ ಗೌರವಧನೊತ ಬುಡುಗಡೆಗೆ ಅನುಮೋದನೆ ಕೊರ್ನ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಸಚಿವೆ ಶಿವರಾಜ್ ತಂಗಡಗಿ ಬೊಕ್ಕ ಇಲಾಖೆದ ನಿರ್ದೇಶಕಿ ಡಾ.ಧರಣಿದೇವಿ ಮಾಲಗತ್ತಿ ಮೊಕಲೆಗ್ ಅಕಾಡೆಮಿ ಗುರ್ಕಾರೆ ತಾರಾನಾಥ್ ಗಟ್ಟಿ ಕಾಪಿಕಾಡ್ ಸೊಲ್ಮೆ ಸಂದಾಯೆರ್.
2010ಟ್ ತುಳು ಪಠ್ಯ ಐಚ್ಛಿಕ ವಿಷಯವಾದ್ ಗೋಡಿದಿತ್ತ್ಂಡ್. ಇತ್ತೆ ರಾಜ್ಯ ಪಠ್ಯಕ್ರಮೊತಂಚ ನಡಪುನ 33 ಶಾಲೆಲೆಡ್ ತುಳು ಕಲ್ಪಾವೊಂದುಲ್ಲೆರ್. ಕರಿನ ವರ್ಸ 681 ವಿದ್ಯಾರ್ಥಿಲು ಎಸ್.ಎಸ್.ಎಲ್.ಸಿ ಡ್ ಐಚ್ಛಿಕ ಭಾಷೆಯಾದ್ ಅಜತ್‌ದ್ ಪರೀಕ್ಷೆ ಬರೆದ್ ಮಾತಾ 681 ವಿದ್ಯಾರ್ಥಿಲು ಪಾಸ್ ಆದಿತ್ತೆರ್. ಉಂದೆಟ್ 320 ವಿದ್ಯಾರ್ಥಿಲು ತುಳು ವಿಷಯೊಡು ನೂದೆಕ್ ನೂದು ಅಂಕೊಲೆನ್ ಗೆತೊಂದಿತ್ತೆರ್. ನೂದೆಕ್ ನೂದು ಅಂಕೊಲೆನ್ ಗೆತೊಂದಿನ ಮಾತಾ 320 ವಿದ್ಯಾರ್ಥಿಲೆಗ್ಲಾ ಒಂಜಿ ಸಾರದ ಲೆಕ ಪಣವುದ ಇನಾಮು ಕೊರ್ದು ತುಳುಭವನೊಡು ಇಂಚಿಪ ನಡತಿನ ಕಾರ್ಯಕ್ರಮೊಟು ಮಾನಾದಿಗೆ ಮಲ್ದ ಪಂದ್ ಅಕಾಡೆಮಿ ಗುರ್ಕಾರೆ ತಾರಾನಾಥ್ ಗಟ್ಟಿ ಕಾಪಿಕಾಡ್ ತೆರಿಪಾದೆರ್.
ಈ ಗೌರವ ಧನೊ 2023ನೇ ಸಾಲ್‌ಗ್ ಮಾತ್ರ. ಉಂದೆಕ್ ದುಂಬುದ ಸಾಲ್‌ದವು ಇತ್ತೆದ ಅಕಾಡೆಮಿದ ಸೀಮೆಗ್ ಬರ್ಪುಜಿ. ಅವೆನ್ ಸಂಸ್ಕೃತಿ ಇಲಾಖೆ ಅತ್ತ್ಂಡ ರಾಜ್ಯ ಸರಕಾರೊ ತೂವೊಡಾಪುಂಡು.
ಕಡೇಕಾಂಡಲಾ ಒಂಜಿ ವರ್ಸೊದ ಗೌರವ ಧನೊ ಆಂಡಲಾ ಬತ್ತ್ಂಡತ್ತಾ ಪನ್ಪಿನವೇ ಕುಸಿತ ಸುದ್ದಿ. ಸುಮಾರ್ ಮೂಜಿ ಮೂಜರೆ ವರ್ಸೊರ್ದು ಗೌರವಧನದಾಂತೆ ತುಳು ಕಲ್ಪಾವೊಂದು ತುಳುತ ಬಗೆಟ್ ಜೋಕುಲೆಗ್ ತೆರಿಪಾವೊಂದುಪ್ಪುನ ಮಾತಾ ಆ ಮದೆಟುಪ್ಪುನ ಟೀಚರ್‌ನಕಲೆಗ್ ತುಳು ಸಮಾಚಾರದ ಕಡೆರ್ದ್ ಸೊಲ್ಮೆಲೆನ್ ಸಂದಾವೊಂದುಲ್ಲ.