Last updated on September 30th, 2024 at 02:01 pm
ಪೊಲೀಸ್ ಅಧಿಕಾರಿ, ಇನ್‌ಕಮ್ ಟ್ಯಾಕ್ಸ್, ಸಿಬಿಐ ಆಫೀಸರ್, ಕ್ರೈಂ ಬ್ರಾಂಚ್, ಸಿಮ್ ಕಾರ್ಡ್, ಇಂಚ ಬೇತೆ ಬೇತೆ ಪುದರ್, ID card ಗಲಸ್‌ದ್ ಫೋನ್ ಕಾಲ್, ಒವ್ವಾ ಪೊಣ್ಣನ ಫೋಟೊ ಗಲಸ್‌ದ್ ವಿಡಿಯೋ ಕಾಲ್ ಬರೊಂದಿತ್ತ್‌ದ್ ಸಾರ್ವಜನಿಕೆರ್ ಜಾಗ್‌ರ್ತೆಡ್ ಇಪ್ಪೊಡು. ತತ್ತ್‌ದ್‌ ಇಂಚಿನ ಕಾಲ್ ರಿಸೀವ್ ಮಲ್ತ್ಂಡಲಾ ಕಾಲ್ ಕಟ್ ಮನ್ಪುಲೆ, ಇಜಿಂಡ ದಾದಂಡಲಾ ಒಂಜಿ ತಲೆಪುಡು ತಿಕ್ಕ್‌ದ್ ಬೂರೊನುನ ಲೆಕ ಆವು.
ಉಬಾರ್ ಸೆ:30 : ಯಾನ್ ಸಿಬಿಐ ಆಫೀಸರ್ ಪಾತೆರೊಂದುಲ್ಲೆ. …. ಈರೆನ ಮಗೆನಾ ? ಆಯನ ಚಟುವಟಿಕೆಲೆನ ಬಗೆಟ್ ಈರೆಗ್ ತೆರಿದ್ಂಡೇ ? ಆಯನ್ ಇತ್ತೆನೇ ಅರೆಸ್ಟ್ ಮನ್ಪೊಡಾತೆ. ಇಂಚ ಮಾತಾ ಪಂಡ್‌ದ್ ಪೋಡಿಕಟಾಟಾದ್ ಕಾಸ್ ನಿಂಗುನ ಬೇಪುದ ಕಾಲ್ ಒಂಜಿ ಉಬಾರ್‌ದ ಒರ್ಯಗ್ ಬತ್ತ್‌ದ್ಂಡ್. ಆಂಡ ಮಂಡೆಕರ್ಚಿರ್ದಾವರ ಕಾಲ್ ರಿಸೀವ್ ಮಲ್ತಿನಾರ್ ದಗೆರ್ದ್ ಬಚಾವಾತೆರ್.
ಉಬಾರ್ ಬ್ಯಾಂಕ್‌ರೋಡ್‌ದ ನಿವಾಸಿ ಅಬ್ಬಾಸ್ ಪನ್ಪಿನಾರೆನ ಮೊಬೈಲ್‌ಗ್ 92-3471745608 ನಂಬರ್‌ರ್ದ್ ಪೋನ್ ಬತ್ತಿತ್ತ್‌ದ್, ಹಿಂದಿ ಭಾಷೆಡ್ ತಾನ್ ಸಿಬಿಐ ಆಫೀಸರ್, ದೆಲ್ಲಿ ಆಫೀಸ್‌ರ್ದ್ ಪಾತೆರೊಂದುಲ್ಲೆ. (ಅಬ್ಬಾಸ್‌ರೆನ ಸುರುತ ವರ್ಸೊದ ಇಂಜಿನಿಯರಿಂಗ್ ಓದೊಂದುಪ್ಪುನ ಮಗನ ಪುದರ್‌ನ್ ಇತ್ತಿಲೆಕ ಪಂಡ್‌ದ್) , ಈರೆನ ಮಗೆ ಅತೆ ? ಆಯೆ ದಾದ ಮಾತಾ ಮಲ್ತೊಂದುಲ್ಲೆ ಪಂಡ್‌ದ್ ಈರೆಗ್ ತೆರಿದ್ಂಡೇ? ಆಯನ್ ಇತ್ತೆನೇ ಅರೆಸ್ಟ್ ಮನ್ಪೊಡಾತೆ, ಇಂಚ ಮಾತಾ ಪಂಡ್‌ದ್ ಪೋಡಿಪಾವೆ. ಪೋನ್ ಬತ್ತಿನ ನಂಬ್ರಡ್ ಪ್ರೊಫೈಲ್ ಪೋಟೋಲಾ ಪೊಲೀಸ್ ಆಫೀಸರ್‌‌ಲೆಕ ಇತ್ತಿನ ಜನತ ಇತ್ತ್‌ದ್, ಪೋನ್ ನಂಬ್ರದ ತಿರ್ತ್ ಸಿಬಿಐ ಪಂದ್‌ಲಾ ಬರೆತಿನ ತೋಜಿದ್ ಬತ್ತ್‌ದ್ಂಡ್.
ಆಂಡ ತನ್ನ ಮಗನ ಬಗೆಟ್ ಪತ್ತ ಪಿನ್ಪಿತ್ತಿನ ಅಬ್ಬಾಸ್ , ಪೋನ್ ಮಲ್ತಿನಾಯಡ ಒಂಜಾತ್ ಪ್ರಶ್ನೆ ಕೇನ್ನಗ, ನಿಕ್ಲೆಗ್ ಎಂಕ್ಲೆನ್ ಪ್ರಶ್ನೆ ಮನ್ಪುನ ಹಕ್ಕಿಜ್ಜಿ . ದಾದ ಇತ್ತ್ಂಡಲಾ ಎಂಕ್ಲ ಕೇನುನ ಕೇನ್ಪುಲೆಗ್ ಮಾತ್ರ ಸದು ಕೊರೊಡು ಪಂಡ್‌ದ್ ಮಲ್ಲಸ್ತಿಕೆಡ್ ಪನ್ಪೆ. ಮಗನ ನಡಕೆದ ಬಗೆಟ್ ಪತ್ತ ನಂಬಿಕೆ ಅಂಚೆನೇ ಪೋನ್ ಮಲ್ತ್‌ದ್ ಪೋಡಿಪಾದ್ ಕಾಸ್ ನಿಂಗುನಕಲೆನ ಬಗೆತ್ ತೆರಿದಿತ್ತಿನ ಅಬ್ಬಾಸ್, ಜೋರುಡೇ ತಂಕ್ ಗೊತ್ತಿತ್ತಿನಾತ್ ಹಿಂದಿ ಭಾಷೆಡ್ ನಾಲಾಯಿದ ಕೊಡಿಕ್ ಬತ್ತಿನ ಮಾತಾ ನೆರಡೆಲೆನ್ ನೆರ್ನಗ ಪೋನ್ ಮಲ್ತಿನಾಯೆ ಕಾಲ್ ಕಟ್ ಮಲ್ತ್‌ದೆ.
ಅಂತರಾಷ್ಟ್ರೀಯ ಮೊಬೈಲ್ ಕಾಲ್‌ದ ಕೋಡ್ ನಂಬ್ರ 92 ಪಂದ್ ಇತ್ತ್‌ದ್ ಅವು ಪಾಕಿಸ್ತಾನೊಡು ಗಲಸುನ ಪೋನ್ ನಂಬ್ರ ಆದುಪ್ಪುಂಡು. ಅಲ್ಪದ ಜನಕ್ ಉಬಾರ್‌ದ ಅಬ್ಬಾಸ್‌ರೆನ ಮೊಬೈಲ್ ನಂಬ್ರ ಅಕಚೆನೇ ಆರೆನ ಮಗನ ಪುದರ್ ಸಮ ಗೊತ್ತುಪ್ಪೊಡಾಂಡ ನಮ ಬೇತೆ ಬೇತೆ ವೆಬ್‌ಸೈಟ್‌ಲೆಡ್ ಕೊರ್ಪಿನ ನಮ್ಮ ಒಲವುಲೆನ ಬಗೆಟ್ ಕುಡೊರ ಅಲೆಚನೆ ಮನ್ಪೊಡಾಪುಂಡು.
ತೋಜುನ ಶತ್ರುರ್ದ್ ತೋಜಂದಿನ ಶತ್ರುನು ಸೋಪಾವುನ ಬಾರೀ ಬಂಙ. ಮಾತೆರ್ಲಾ ಆಯಿನಾತ್ ನಮಕ್ ಬತ್ತಿನ ಮಾತಾ ಲಿಂಕ್‌ಲೆನ ಮಿತ್ತ್ ಎದುರುಪಿರ ತೂವಂದೆ ಕ್ಲಿಕ್ ಮನ್ಪುನೆನ್ ಉಂತಾದ್, ಕಡಪುಡ್ದಿನಕ್ಲೆಡ ಅವೂ ದಾದ ಲಿಂಕ್, ದಾಯೆ ಕಡಪುಡ್ದೆರ್ ಪಂದ್ ಕೇಂಡ್‌ದ್ ಬೊಕ್ಕ ನಿರ್ಧಾರ ಗೆತೊನೊಡು. ಆಯಿನಾತ್ ಆ ಆಫರ್, ಈ ಆಫರ್ ಪಂದ್ ಬರ್ಪಿನ ಲಿಂಕ್‌ಲೆನ್ ಗೆನ್ಪಂದೆ ಇತ್ತ್ಂಡನೇ ಎಡ್ಡೆ.